Tsing'ano 2
2
1Mwana wange, nu u va nu u bugirira amakuva gange,
Nokuvika amalago gange halala na ive;
2Kuduka kutegidza ugutu gugwo kuhulira ubugeeri,
Nokuvika mwoyo gugwo kumanya;
3Yee, nu u va nu wanira limanya,
Nokuginga mwoyo gugwo gu duke kumanya
4Nu u va nu mwenya kuli wenyanga if etha,
Nu u va nu mwenya ligali kuli wenyanga vindu vya viswa:
5Hene yaho u la manya litibwa lya Yahova,
Na u la nyola limanya lya Nyasaye.
6Kigira Yahova a haananga ubugeeri;
Limanya na limanyeridza ri twulanga ku munwa gwigwe.
7A vikira avalungi ubugeeri budukiru;
A veye ingavo kuvo ava genda mu budukiru;
8A duke kulinda tsinzira tsyelikalaga,
Nokulinda tsinzira tsya avataka tifu veve.
9Hene yaho u la manya ubulungi nelikalaga,
Nobulungi, Vee, tsinzira tsyosi tsindahi.
10Kigira ubugeeri bu lingira mwoyo gugwo,
Na limanya li la sangalidza mwoyo gugwo;
11Tsiganagani tsinungi tii la ku linda;
Limanya li la ku linda:
12Kukuhonnya ku inzira yobudamano,
Ku avandu va volanga makuva gobukyamu:
13Ava lekanga tsinzira tsyobulungi,
Kugenda ku tsinzira tsyekisundi;
14Ava sangalira mu ubwoni
Na va yanza ubukyamu bwobudamano;
15Avetsinzira tsyavo tsi veye tsinkyamu,
Avobukyamu mu tsinzira tsyavo:
16Kukuhonnya ku mukali mugeni,
Kali ku mugeni uyu u kolanga makuva gege kuva madoto;
17Uyu u lekanga mulina wewe wobwana buke bwibwe,
Na yivirira lilagana lya Nyasaye wewe:
18Kigira inyumba yeye yikanga ku likudza,
Na tsinzira tsitsye tsi hilanga ha avakudzu;
19Yavo avingira kuye si va galuka mba,
Kandi si va nyola tsinzira tsyelivamwoyo:
20Eve u duke kugenda ku inzira yavandu valahi,
Nokulonda tsinzira tsyavalungi.
21Kigira avobulungi va la menya mu kivala,
Na avadukiru va la tigala mukyo.
22Navutswa avadamano va la kalagirwa kutwula mu kivala,
Na avobugadi va la twulidzwa mu kivala.
©Bible Society of Kenya, 1967