Tsing'ano 28
28
1Avadamano viruka inyinga si a li ho mundu kuvalonderera;
Navutswa avalungi va veye nobuluviriri kuli king'ang'a.
2Ku mahyolo gekivala avanene vakyo va veye avanyingi;
Navutswa avandu vobugeeri na velimanya va la ki dinyeridza.
3Mundu mudaka u tindiranga avadaka
A veye kuli imbula yolugega i vula kuleka vyokulia.
4Ava lekanga lilaga vidzominya avadamano:
Navutswa yavo ava gumiranga lilaga va hing'ana navo.
5Avandu avadamano si va manya likalaga;
Navutswa yavo avenyenga Yahova, va manya vyosi.
6Mudaka u gendanga mu bulungi bwibwe, a veye mulahi
Kuvita uyu wetsinzira tsitsye tsi veye tsinkyamu, kali na a veye mutugi.
7Ku vosi uyu u gumiranga lilaga a veye mwana wobugeeri;
Navutswa uyu u veye wakye ku avahuvali a legannya dada wewe.
8Uyu u medznga ubutugi bwibwe ku vyambeti na limedeka li ta li lilungi,
A bu vungidzanga bu ve bwa uyu u verereranga avadaka.
9Uyu u girunkannya ugutu gwigwe a vula kuhulira lilaga,
Kali lisala lilye li veye livihiriridza.
10Ku vosi uyu u kyaminganga valungi va londe inzira indamano,
Uyu mwene a la gwa mu bogo bwibwe;
Navutswa avadukiru va la lia miyandu gyobulahi.
11Mutugi welola mwene a veye wobugeeri;
Navutswa mudaka a veye welimanya a mu henzeridza.
12Lwa avalungi va guuta bu veye ubukumi bunene;
Navutswa lwa avadamano venenehidza, avandu vivisa.
13Uyu u kunikanga mahyolo gege si a la gasidzwa;
Navutswa ku vosi uyu weyamanga nokugaleka a la verererwa.
14Mundu u tidzanga madiku gosi a veye nobusangali;
Navutswa uyu wedinyeridza mwoyo gwigwe a la gwa mu kivi.
15Kuli liva lyeking'ang'a ki fwuma nga, na iduba i gendagenda;
Ni ndiyo mudamano wamehanga ku avandu avadaka.
16Munene u geha limanya a veye mudambidzi ligali;
Narutswa uyu u dunyiranga likayirwa a la kola madiku gege kuva manyingi.
17Mundu wa masahi gomundu ga mminanga
A lirukira mu bogo; mundu kali mulala a ta mwigalira.
18Ku vosi uyu u genda nobulungi a la honywa;
Navutswa uyu u kyaminya tsi nzira tsitsye a la gwa nonoho.
19Uyu u limanga mulimi gwigwe a la va nevyokulia vi dukanga;
Navutswa uyu u londanga avandu va vutswa a la va nobudaka bu dukanga.
20Musuuvirifu a la va nobugasu bunyingi;
Navutswa uyu u kola bwangu kunyola ubutugi si a la vula kukalagirwa.
21Si bu li bulahi kwelidza avandu;
Kinga mundu kukola mahyolo kunyola lidonye lyobukima.
22Uyu u veye ne imoni indamano a kolanga bwangu kulonda ubutugi,
Naye si a manya ubudaka bu la mu gwira.
23Uyu u gondokera mundu lwenyima a la nyola ubulahi kuvita
Uyu wiidzominyanga na makuva gege madoto.
24Ku vosi uyu u nuula dada wewe kinga mama wewe, na a vola, Yaga si ga veye lihyolo,
Wa zana a veye wakye womwononnyi.
25Uyu womwoyo gwelikayirwa, a vukidzanga lihing'ana; Navutswa uyu u suuviranga Yahova a la komeridzwa.
26Uyu u suuviranga mwoyo gwigwe mwene a veye musiru;
Navutswa ku vosi u gendanga nobugeeri, a la honywa.
27Uyu u haananga ku avadaka si a la gehera kindu;
Navutswa u visanga tsimoni tsitsye a la va nevilaamo vinyingi.
28Lwa avadamano va singira, ava ndu va livisa;
Navutswa lwa va diva avobulungiva medeka.
©Bible Society of Kenya, 1967