Tsing'ano 27
27
1U te yiidzominya ku mugamba;
Kigira si u manya inkuva yelidiku li nyala kuleta.
2Mundu wundi a kwidzominya, gu ta li munwa gugwo mwene;
Kinga mugeni, na gyi ta li minwa gyigyo mwene.
3Ligina li veye liliduhu, na muyeke gu minanga;
Navutswa ubutima bwomusiru bu veye buliduhu kuvita yivi vyombi.
4Ubutima bu veye bwobululu, na ubudunyi bu veye nelikaminya
Navutswa ni bwaha u nyala kusi ngira imbiri wembodoka?
5Ligondokerwa lya habulavu li veye lilahi
Kuvita ubuyanzi bu viseywi.
6Bukindukidzi bwomulina bu veye bwobusuuvirifu;
Navutswa libusa lyomusigu li veye nobugadi.
7Mwoyo gwiguti gu vihirirangwa kali ubwuki
Navutswa ku mwoyo gwenzala vindu vyosi vilulu vi veye vinolu.
8Kuli linyonyi li gendagendanga ihale ku inyumba yalyo
Ni ndiyo a veye uyu u gendagendanga ihale ku bugono bwibwe.
9Amaguta na vyokufunya mwayu, vi yanzidzanga mwoyo;
Ni ndiyo ubunolu bwomulina womundu, bu twula ku makuva gomwoyo
10Mulina wowo mwene, na mulina wa dada wowo, u ta va leka mba;
Na u ta tsia ku inyumba yamwavo wowo ku lidiku lyekivi kikyo:
Mutende u veye ahimbi a veye mulahi kuvita amwavo u veye ihale.
11Mwana wange, u ve nobugeeri, u yanzidze mwoyo gwange,
Nduke kutivulira uyu u nyeganga.
12Umundu weliganagana lilahi a lolanga ubudamano, na yivisa;
Navutswa avasiru va vitanga na va nyola ubusaliri.
13Vugula ingubo ya uyu u veye wekihambiriru kyomugeni;
U vugule kihambiriru ku uyu u kolera mukali mugeni kihambiriru.
14Uyu u gasidza mulina wewe nomwoyo munene, na a vuka mabwebwe,
Ga la volwa kuye kuva lilaama.
15Litonyatonya mu lidiku lyembula inyingi
Na mukali welihing'ana, yivi vi leng'ana.
16Uyu u gayanga mukali uyu a gayanga imbuudza;
Na maguta gomukono mulungi gwigwe ga mu gadanga.
17Kivya ki hyagalanga kivya;
Na ndiyo mundu yeganehidza mumoni mwomulina wewe.
18Ku vosi uyu u lindanga mukuyu a la lia makuyu gagwo;
Na uyu u lindanga munene wewe a lidzominywa.
19Kuli mu amadzi mumoni mu lokkidzanga mumoni,
Ni ndiyo mwoyo gwomundu gu lolekidzanga mwoyo gwomundu.
20Kihadisi na Mung'ani si vi nyala kwiguta;
Na ndiyo tsimoni tsyomundu si tsi nyala kwiguta mba.
21Ludavo lu veye lwefetha, na mahiga gethahabu;
Na mundu a geridzwa nelidzominywa lilye.
22Kali nu u swagira musiru mu kinu nomusala halala nobuswage bu swagangwa
Halala na yaga ubusiru bwibwe si bu la twula kuye mba.
23Weguluhidze kumanya liva lyevyayo vivyo,
U henze ligali tsing'ombe tsitsyo:
24Kigira ubutugi si bu veye bwemihiga nemihiga;
Kandi itaji i nyala kuhindira ku makula gosi?
25Ubulimu bwumu bu hilangwa, na ubulimu buvisi bwelolekidza,
Na tsingutsa tsyomu vigulu tsi vungidzwa mu inyumba.
26Avana vamagondi va veye voku kola tsingubo tsitsyo,
Na tsimbuli tsi veye ubuguli bwomulimi;
27Na ga la va ho maveere getsimbuli kuduka ive vyokulia, na vyokulia vya venyumba yoyo,
Na vyokugavulira avakana vovo.
©Bible Society of Kenya, 1967