Tsing'ano 24
24
1U ta kendekera avadamano;
Kandi u ta kayirwa kugenda halala navo:
2Kigira mwoyo gwavo gu ganagana lidambidza
Na minwa gyavo gyi volanga mahyolo.
3Inyumba yombakwa hobugeeri;
Na i dinyeridzangwa nelimanya;
4Na vigo vyayo vizula limanya
Nobutugi bwosi na vyobuguli budinyu.
5Mundu wobugeeri a veye netsingulu;
Yee, mundu welimanya a medanga ubunyali.
6Kigira ku livolerana lyobugeeri u la kola ubulwani bubwo;
Kandi mu bunyingi bwa valungikidzi mu veye neliguta.
7Ubugeeri bu veye igulu ligali ku musiru:
Si a kunula munwa gwigwe mu kiribwa.
8Uyu u ganagananga kukola ubudamano,
Avandu va la mu langa wamahyolo.
9Liganagana lyobusiru li veye ubwoni;
Kandi wekihenyahenye, avandu va mu dunyira.
10Nu u va nu u kudza mwoyo mu lidiku lyekivi,
Tsingulu tsitsyo tsi gehi.
11U honnye yavo ava hilangwa mu likudza,
Na yavo avenyanga kwiitwa, u va gayire.
12Nu u va nu u vola, Henza, si kwa manya yaga;
Uyu u geranga myoyo ku iratili, si a lola likuva li veye yo yili?
Na uyu u lindanga mwoyo gugwo, si a li manya?
Naye si a la tunga mundu sa mulala kuli miyinzi gyigye?
13Mwana wange u lie bwuki, kigira bu veye buiahi;
Na masang'usa gobwuki, ga veye manolu kutsatsama:
14Na ndiyo u la manya ubugeeri bu veye ku mwoyo gugwo;
Nu u va nu u bu nyola, hene yaho madanyi ga la loleka, Na lisuuviridza lilyo si li la kalagwa.
15Ive mundu mudamano, u ta setera ubumenyo bwomulungi;
U tononya busosero bwibwe:
16Kigira mulungi a gwidzanga hali katano na kaviri, na a vuka kandi;
Navutswa lidiva li tung'aminya avadamano.
17U ta sangala lwa musigu wowo a gwa,
Na mwoyo gugwo gu ta kola isango, lwa a tung'aminywa
18Gase Yahova a la iola gene yago, na ga la mu vihiriridza,
Na a twulidza ubutima bwibwe kuye.
19Mwoyo gugwo gu ta ku samba kigira avadamano;
Kandi u ta kendekera avobwoni:
20Kigira avadamano si va li nyola kiheri kilahi mba;
Na itaya yomudamano i la siminywa.
21Mwana wange, u tie Yahova na umwami;
Na u ta hambana navo ava ho ngera kugirunkana:
22Kigira lidiva lyavo li la va nyola bwangu;
Kandi ni bwaha u manya ubwoneku bwa yavo vombi?
23Yaga kandi na makuva gavageeri.
Si bu li bulahi kuva nelyeridza ku avandu mu likalaga.
24Uyu u volera mudamano, Ive u veye mulungi;
Avandu va la mu laama, na avetsihiri va la mu dunyira:
25Navutswa ubusangali bu la va ku yavo ava mu gondokera,
Nobugasu bulahi bu la duka kuvo.
26A busanga minwa,
Uyu u twulidza mativuli malahi.
27U lombe miyinzi gyigyo kyova,
U gyi tegidze, gyi ku tegere mu mulimi;
Na lwenyima wombake inyumba yoyo.
28U ta va muloli ku mutende wowo bugira kivune;
Na u ta gada neminwa gyigyo.
29U ta vola, Na inze nda mu kolera kuli ya nkolera;
Nda mu tunga kuli miyinzi gyigye.
30Nda vita himbi nomulimi gwomugata,
Himbi nomulimi gwemizabibu gwomundu u ta li nelimanya;
31Na henza, gwa li gwa mera amafwa gwosi,
Gwosi gwa kunikwa nelitambadza
Na lugaga lwagwo lwa magina lwa tsomwa hasi.
32Hene yaho nda henza, ni nganagana ligali;
Nda lola ni nyola amegidzo:
33Ligona likekeke, na tsindolo tsinkekeke,
Kwikumberera mu tsindolo hakekeke;
34Na ndiyo ubudaka bubwo bu la duka kuli mwivi,
Nobudaka bubwo bu la ku nyola kuli mundu weviki vyuma.
©Bible Society of Kenya, 1967