Tsing'ano 23
23
1Lwa wikala kulia halala nowameha
U henze ligali uyu a veye imbiriwowo;
2Na u vike mbano ku lidundu lilyo,
Nu u va nu u veye mundu u yanza kulia.
3U ta kayirwa vindu vivye vinolu;
Kigira vi veye vyokulia vyobugadi.
4U teluhidza mu lyenya ubutugi;
U leke ubugeeri bubwo mwene.
5U tumika tsimoni tsitsyo ku yiki ki ta li kindu,
Kigira ligali ubutugi bwekolera tsimbaha,
Kuli indidzu i bulukanga kutsia migulu.
6U ta lia ubukima bwa uyu wemoni imbi,
Kinga kukayirwa vindu vinolu vivye:
7Kigira kuli yeganagananga mwene a veye ndiyo: A ku volera,
U lie na u nwe; Navutswa mwoyo gwigwe si gu veye mulungi ku ive.
8Kitonge kya u liye u la ki luka kandi,
Na makuva gogo manolu ga la gota.
9U ta vola mu lihulira lyomusiru;
Kigira a la lega ubugeeri bwamakuva gogo.
10U ta twulidza kiloleru kyolwako lwa kale;
Kandi u tiingira mu milimi gya avabisandu:
11Kigira Umutungi wavo a veye wetsingulu;
A la vanza likuva lyavo ku ive.
12U vike mwoyo gugwo kuhulira lyegidzwa,
Na amatu gogo kuhulira makuva gelimanya.
13U ta gaya lyegidzwa ku mwana;
Nu u va nu u mu kuya nolusah, si a la kudza mba.
14U la mu kuya nolusala,
Nokuhonnya mwoyo gwigwe ku Kihadisi.
15Mwana wange, mwoyo gugwo ni gu veye nobugeeri,
Mwoyo gwange gu la sangala, yee, kali gwange.
16Yee, mwoyo gwange gu la sangala,
Lwa minwa gyigyo gyi voh makuva malahi.
17Mwoyo gugwo gu ta kendeka ku avetsimbi;
Navutswa u ve mu litia Yahova mbasu bei:
18Kigira ligali ga veye ho madanyi;
Na lisuuvira lilyo li la vula kukalagwa.
19Mwana wange, u hulire, na u ve wobugeeri,
Wimirire mwoyo gugwo ku inzira.
20U ta va mu yavo ava nwedzanga amalwa;
Kinga mu yavo ava huvala ku tsimyama:
21Kigira umuhambiki na muhuvali vombi va la duka mu bu daka;
Na tsindolo tsinyingi tsi la boha mundu amadali.
22U hulire dada wowo wa kwivula,
Na u ta lega mama wowo lwa a veye mukeere.
23U gule ageligali, u ta ga gulidza mba;
Yee, kali ubugeeri, na lyegidzwa, na limanya.
24Dada womulungi a la sangala ligali;
Na uyu wivula mwana wobugeeri a la sangala kuye.
25U sangalidze dada wowo na mama wowo,
Na uyu wa kwivula a sangale ligali.
26Mwana wange, mpe mwoyo gugwo;
Na tsimoni tsitsye tsi sangale mu tsinzira tsyange.
27Kigira wamalaya a veye mugerera munene;
Na mukali mugeni a veye ubogo bunyerere.
28Yee, uyu a setanga kuli munuuli,
Naye a medanga avobugadi hagati ha avandu.
29Ni bwaha u kupanga luvi? Ni bwaha u volanga bayaye? Ni bwaha u veye nelihing'ana?
Ni bwaha u veye nelikenya? Ni bwaha u veye netsingoma bugira kivune?
Ni bwaha wakanya tsimoni?
30Ni yavo ava hongera kunwa amalwa;
Ni yavo ava tsitsanga kwenya vyokunwa vya yengwa.
31Ive u ta henza iwaini ni i veye inzakanyu,
Lwa li lolekanga mu kikombe, Lwa li tulukanga inzaku:
32Ku kiheri i lumanga kuli inzoka,
Nokusaleridza kuli kihirigoma.
33Tsimoni tsitsyo tsi la lola vindu vigeni,
Na mwoyo gugwo gu la vola vindu vikyamu
34Yee, u la va kuli uyu u gonanga hagati henyanza,
Kinga kuli uyu u tengedzanga ku isonga yomulage gweliato.
35U la vola, Va nkuyi na si nsaliye mba;
Va nkuyi, na si mbuliye likuywa:
Nda vuka inyinga ki? Nda genya kandi.
©Bible Society of Kenya, 1967