Tsing'ano 21
21
1Mwoyo gwomwami gu veye mmukono gwa Yahova kuli migera:
A gu girunkannyanga hosi ha yenya.
2Tsinzira tsyosi tsyomundu tsi veye tsindahi mu tsimoni tsitsye mwene;
Navutswa Yahova a geranga myoyo ku iratili.
3Kukola agobulungi na agelikalaga
Ga yanzidza Yahova kuvita kihaanwa.
4Tsimoni tsyokwegingira, na mwoyo gwoluyai
Kali itaya yavekirage, vi veye ubwoni.
5Tsiganagani tsya avagulu tsi henzanga ku bunyingi bweng'ine;
Navutswa sa mulala u hyuhyukananga a duka mu budaka bwere.
6Linyola lyobutugi bwolulimi lwobubehi
Li veye lilumbe li hungudzangwa yiyi na yiyi na yavo avenyanga likudza.
7Kirage kyavadamano ki la va hila mu budivi,
Kigira va sula kukola likalaga lilungi.
8Inzira ya uyu wamahyolo ga mminanga i veye inkyamu ligali;
Navutswa ku uyu wobunifu, miyinzi gyigye gyi veye milungi.
9Nobulahi kumenya ku kisegese,
Kuvita kumenya mu inyumba ingalamu halala nomukali welihing'ana.
10Mwoyo gwomudamano gwenya nga ubudamano:
Mutende wewe si a veye mulahi mu tsimoni tsitsye.
11Lwa wekihenyahenye a kalagirwa, musiru a nyolanga ubugeeri;
Na lwa mugeeri yegidzwa a nyola limanya.
12Mundu mulungi u ganagananga inyumba yomudamano,
Kuli avadamano va tung'aminyangwa kuduka mu budivi.
13Uyu u hananga amatu gege ku lilira lyomudaka,
Naye a la lira, na a la vula kuhulirwa.
14Kihaanwa kya makiriri ki hodzeridza ubutima;
Na madanyi mu kiritu ga hodzeridza ubutima bululu.
15Bu veye ubuyanzi bwavalungi kukola likalaga lilungi;
Navutswa bu veye ubudivi ku ava kolanga ubudamano.
16Mundu u voyavoyanga kutwula ku inzira yelimanya
A la menya mu livugana lyavakudzu.
17Uyu u yanzanga uluyai a la va mudaka:
Uyu u yanzanga iwaini na maguta si a la va mutugi mba.
18Mudamano a veye mutungu gwomulungi;
Na uyu muzami a ladza mu bugono bwomulungi.
19Kumenya mu kyangalangwi bu veye bulahi, Kuvita kumenya nomukali welihing'ana na kivihiri.
20Akiba yobuguli budinyu na yamaguta vi veye mu bumenyo bwavageeri;
Navutswa wobusiru a vi miranga.
21Uyu u londanga ubulungi na tsi mbabasi
A nyola livamwoyo, na ubulungi, na lidzominywa.
22Mundu wobugeeri a ninanga mu lidala lyavetsingulu,
Nokwikidza hasi tsingulu tsyobuluviriri bwalyo.
23Ku vosi uyu u gayanga munwa gwigwe na ululimi lwilwe
Yelinda mwoyo gwigwe ku lidambidzwa.
24Woluyai, na welyegingira, lieta lilye li veye kihenyahenye;
A kolanga mu butima bwoluyai lwilwe.
25Lyenya lyomugata li mwiitanga;
Kigira makono gege ga sula ku kola miyinzi.
26A veye ho mwimani u kayirangwa mbasu bei;
Navutswa mulungi a haananga na a vula kwimana.
27Kihaanwa kyomudamano ki veye livihiriridza:
Nasindi, lwa a ki letanga nomwoyo mudamano
28Muloli wobubehi a la diva;
Navutswa mundu u huliranga a la dinyeridza livola lilye.
29Mundu mudamano a dinyiridza mmoni mwimwe;
Navutswa ku makuva gomulungi a dinyiridza tsinzira tsitsye.
30Si ha veye nobugeeri, kinga limanya,
Kinga makuva ga nyala kusingira ku Yahova.
31Iparasi i lombangwa kwetegeka ku lidiku lyobulwani;
Navutswa liguuta li veye lya Yahova.
©Bible Society of Kenya, 1967