Tsing'ano 20
20
1Lwaini i veye yekihenyahenye, kyokunwa kilulu ki kola liyoga;
Na uyu u gadwa mu vindu yivi si a veye nobugeeri.
2Litibwa lyomwami li veye kuli lifwuma lyeking'ang'a:
Uyu u vukidza ubutima bwibwe a kolera livamwoyo lilye ubwoni.
3Li veye lidzominywa lyomundu kuleka lihing'ana
Navutswa musiru sa mulala ayanza litinda.
4Mugata a sula kulima kigira ubu kindu;
Kunangwa a la sava inyinga yeligesa, na a la va vutswa.
5Makuva mu mwoyo gwomundu ga veye kuli amadzi goluliva;
Navutswa mundu welimanya a la ga daha.
6Ku avandu avanyingi va lilwadza sa mulala ubulahi bwibwe mwene;
Navutswa mundu musuuvirifu, ni bwaha u nyala kumulola?
7Mundu wobulungi u gendanga mu bulungi bwibwe,
Avana veve va gasidzeywi inyima wewe.
8Mwami wikalanga ku intebe yelikalaga
A salannyanga ubudamano bwosi netsimoni tsitsye.
9Ni bwaha u nyala kuvola, Mmali kulavidzwa mwoyo gwange,
Mbeye munifu ku ubwoni bwange?
10Vigero vyetsiratili lugano lugano, na vigero vindi lugano lugano,
Yivi vyombi vi veye livihiriridza ku Ylhova.
11Kali mwana yelolekidzanga mu likola lilye,
Miyinzi gyigye ni gyi veye milahi, kinga ni gyi veye milungi.
12Gutu gu huliranga, na imoni i lolanga
Yahova ya vi lomba vyombi.
13U ta yanza tsindolo, gase u la duka mu ubudaka;
U kunule tsimoni tsitsyo, na u liguta ubukima.
14Muguli a vola, ni kidamano, ni kidamano;
Navutswa lwa a mali kutsia, a tanga kwiidzominya.
15Ithahabu i veye ho, na amagina makanyu manyingi gobugulu budinyu;
Navutswa minwa gyelimanya gyi veye kindu kyobuguli budinyu.
16Vugula ingubo ya uyu u veye wekihambiriru ku mugeni;
U vugule kihambiriru ku uyu u kolera mugeni kihambiriru.
17Ubukima bwobugadi bu vedzanga ubunolu ku mundu;
Navutswa inyima wabwo munwa gwigwe gu lizula umuyeke.
18Vyasaavirwa vyosi vi dinyiridzwa na makuva;
Nokulumiridzwa lyobugeeri u kole ubulwani.
19Uyu u tsitsanga yiyi na yiyi kuva muhudziridzi a vuulanga agaviswa;
Kunangwa u ta hambana na uyu u kunulanga ligali munwa gwigwe.
20Ku vosi uyu u nyega dada wewe kinga mama wewe,
Itaya yeye i la siminyirwa mu kisundi kinene.
21Namusia miyandu gyi la nyoleka bwangu mu litanga;
Navutswa kiheri kyagyo si ki la gasidzwa mba.
22U ta vola, Inze nda tunga ubu damano:
U lindirire Yahova, naye a la ku honnya.
23Vigero lugano lugano vyokugera vi veye livihiriridza ku Yahova;
Na iratili yobugadi si i veye indahi.
24Ligenda lyomundu li veye lya Yahova;
Kunangwa mundu a nyala ndi kumanyeridza inzira yeye?
25Gu veye mutego ku mundu kuvola bwangu bwangu,
Ni kitakatifu, Nokuteveridza inyima wokulomba lilagana.
26Mwami wobugeeri a sesanga avekirage,
Nokuvitidza kuvo kyokuhuula.
27Roho gwomundu gu veye itaya ya Yahova,
Yokuluuta hosi muye.
28Tsimbabasi na ageligali vi honnya mwami;
Na intebe yeye yobwami i dinyeridzwa netsimbabasi.
29Ubukumi bwa vasoleli bu veye tsingulu tsyavo;
Na ubulahi bwa vasakulu bu veye mutwe gwetsimbudze.
30Ubukinduki bu saliridzanga bu takasa ubudamano;
Na makuya ga dukanga hosi muvo.
©Bible Society of Kenya, 1967