Tsing'ano 1
1
1Tsing'ano tsya Solomoni mwana wa Daudi, mwami wa Israeli
2Kumanya ubugeeri nelyegidzwa;
Na kulola makuva gelimanyeridza;
3Kuvugula lyegidzwa mu likola lyobugeeri,
Mu ubulungi na mu likalaga na ubulahi;
4Kuha avasiru ubugeeri,
Nokuha musoleli limanya nelimanyeridza:
5Mundu wobugeeri a hulire, nokumeda limanya;
Na mundu welimanya a duke kumanyeridza makuva madukanu:
6Kumanya lugano na ligirunkanywa lyalwo;
Amakuva ga avobugeeri, na livola lyavo lyaviswa.
7Litia Yahova li veye litanga lyelimanya;
Navutswa avasiru va lega ubugeeri na lyegidzwa.
8Mwana wange, u tegidze ugutu ku lyegidza lya dada wowo
Na u ta leka lilaga lya mama wowo:
9Kigira ameyidzo yaga ga la va igudwa yobulahi ku mutwe gugwo,
Na minyoro mwigoti mumwo.
10Mwana wange, avobwoni ni va ku sona,
U ta bugirira mba.
11Ni va vola, Hamba, u tsie na kwinye
Ku goneka kunyola masahi;
Ku kolere u ta veye nelihyolo, iluku;
12Ku va mire ni va veye mwoyo kuli Kihadisi,
Nokuvamira ni va veye avagima, kuli yavo avikanga mbogo;
13Ku la nyola miyandu gyosi gyobuguli budinyu;
Ku lizulitsa tsinyumba tsyetu na vilanye;
14U vike lira lilyo halala nekwinye;
Na ku la va nemuya indala:
15Mwana wange, u ta genda ku inzira halala navo;
U gaye kirenge kikyo ki vule kugenda ku inzira yavo:
16Kigira virenge vyavo vi nyaguliranga ubudamano,
Navo va kola bwangu kusundula masahi.
17Kigira ga veye vutswa kutega busagala
Havulavu mu tsimoni tsyelinyonyi:
18Na yavo va setera masahi gavo avene;
Va gonekira livamwoyo lyavo avene.
19Ni ndiyo tsinzira tsyomundu sa mulala u kayirangwa ubutugi;
Bu hilanga livamwoyo lya va veye nalyo.
20Ubugeeri bu kupanga lwanga mu lihasi;
Bu kupanga mwoyo gwabwo mu halang'amu;
21Bu kupanga lwanga halang'amu hokuvugana;
Hokwingira mu viribwa,
Mu lidala bu volanga makuva gabwo:
22Mwinye avasiru, mu la yanza busiru kuduka inyinga ki?
Avekihenyahenye va sangalira kihenyahenye kyavo,
Na avasiru va dunyira limanya kuduka inyinga ki?
23Mwegirunkannye kigira ligondoka lyange:
Henza, nda mu tsukira roho wange
Nda mu mannya makuva gange.
24Kigira nangi, na mwinye mu suye,
Nyiye mukono gwange, na si ha veye nomundu wa vika mu mwoyo gwigwe;
25Navutswa mu legi makuva gange gosi,
Na si mu bugiriye ligondoka lyange:
26Inze kandi nda seka mu lidiku lyekivi kyenyu;
Nda kola kihenyahenye lwa ubutii bwenyu bu duka;
27Lwa ubutii bwenyu bu duka kuli kihi,
Na kivi kyenyu kidzanga kuli kihudzudzi,
Na lidambidzwa lyenyu na ubusaliri bwenyu vi duka ku mwinye.
28Hene yaho va lanira inze, navutswa si nda va tivulira;
Va la nyenya ligali, navutswa si va la nyola:
29Kigira va dunyira limanya,
Na si va tovola ubutii bwa Yahova:
30Si va bugirira makuva gange;
Na va lega ligondoka lyange lyosi.
31Kunangwa va la lia makuyu genzira yavo avene,
Na va lizula makuva gavo avene.
32Kigira lirana inyima lyavasiru li la viita,
Na ligadahala lyavasiru li la va dividza.
33Navutswa ku vosi uyu u huliranga inze a la menya bulahi,
Naye a la va nemirembe bugira ubutii bwobudamano.
©Bible Society of Kenya, 1967