Tsing'ano 18
18
1Uyu weyahulanga ku wakye yenyanga lyenya lilye mwene,
Naye a hing'ananga nobugeeri bwosi bweligali.
2Musiru si a lolanga ubuyanzi mu limanya,
Navutswa mwoyo gwig ve gu duke kwelang'aminya.
3Lwa mudamano yadzanga, kandi lilega lidza
Na halala netsisoni lilegwa lidza.
4Makuva gomunwa gwomundu ga veye kuli amadzi goluliva;
Kisenukiru kyobugeeri ki veye kuli mugera gu gendanga.
5Ukweridza mumoni mwomudamano si bu veye bulahi mba,
Kinga kukyaminya mulungi mu likalaga.
6Minwa gyomusiru gyingiranga mu lihing'ana,
Na munwa gwigwe gu langanga maduya.
7Munwa gwomusiru gu veye lidiva lilye,
Na minwa gyigye gyi veye mitego gyomwoyo gwigwe.
8Makuva ga uyu u monyanga ga veye kuli ubukima ubunolu,
Nago gikanga kuduka munda mwimwe.
9Uyu u veye mugata mu miyinzi gyigye
A veye amwavo wa uyu mwononnyi.
10Lieta lya Yahova li veye impinga yetsingulu;
Mulungi yirukira muyo ma a hona.
11Ubutugi bwomutugi bu veye lidala lilye lyolugaga
Kandi li veye kuli lidigi litambi mu liganagana lilye munene.
12Mwoyo gwomundu gu veye nobwigingiri imbiri wobwoneku;
Na lyegehidza limiriranga lidzommywa.
13Uyu u tivulira lwa a kikiri kuhulira,
Ga veye ubusiru na tsisoni kuye.
14Mwoyo gwomundu gu la ginga ubudedekere bwibwe
Navutswa mwoyo gwoneka, ibwaha u nyala kwikudzira kugwo?
15Mwoyo gwowobugeeri gu nyolanga limanya;
Na ugutu gwa uyu mugeeri gwenyanga limanya.
16Kihaanwa kyomundu ki mu lombera ubwiyangu,
Na ki mu letanga imbiri wa avandu avanene.
17Uyu a tanga kuvola makuva gege a loleka kuva mulungi;
Navutswa mutende wewe yadza nokumwidera.
18Ikura i heridzanga lihing'ana,
Nayo yavukannyanga avanene yava na yava.
19Amwavo u dunyiridzangwa, ubudinyu bwokumunyola kuvita kuvugula livugula lidala lyetsingulu;
Na lihing'ana kuli yili li veye kuli miluguyu gyolugaga.
20Inda yomundu i lizula makuyu gomunwa gwigwe;
A liguta limedeka lyeminwa gyigye.
21Likudza na livamwoyo vi veye mu tsingulu tsyolulimi;
Navo ava lu yanza va la lia makuyu galwo.
22Ku vosi uyu u nyola mukali a nyola kindu kilahi, Naye a nyola ubulahi ku Yahova.
23Umudaka a tumikiranga ligoonya,
Navutswa umutugi a tivilira makuva malulu.
24Uyu welomberanga avalina vanyingi a kola ku budivi bwibwe mwene;
Navutswa a veye ho mulina u hambana kuvita amwavo.
©Bible Society of Kenya, 1967