Tsing'ano 17
17
1Kitonge kikaya halala nobwehodzeridzi ki veye kilahi
Kuvita inyumba yizuye lilia halala nelihing'ana.
2Mutumekiri u kolanga nobugeeri a lameha ku mwana wetsisoni,
Na a la va nekidieli mu miyandu hagati ha avamwavo.
3Ludavo lu veye lwefetha, na mahiga gethahabu;
Navutswa Yahova a geridzangamyoyo.
4U kola ubudamano a huliranga minwa gyobudamano;
Umbehi a tegidza matu kuhulira ululimi lwobutindi.
5Ku vosi u kolera mudaka kihenyahenye a leganga Mulombi wewe;
Na uyu u sangalira budivi si a la vula kukalagirwa.
6Avana va avana va veye itaji yavasakulu;
Na ubukumi bwavana bu veye avadada vavo.
7Makuva manene si ga dukana nomusiru;
Nasindi minwa gyobubehi si gyi dukana nomunene.
8Kihaanwa ki veye kuli ligina lyobuguli budinyu imbiri wetsimoni tsya uyu u veye nakyo;
Hosi ha ki girunkananga ki gasidzangwa.
9Uyu u kunikanga lihyolo yenyanga ubuyanzi;
Navutswa uyu u hongera kuvola inkuva, yavukannya avayanzani veligali.
10Ligondoka li ingiranga uyu u veye nelimanya
Kuvita maduya mia ku musiru.
11Mudamano yenyanga lihing'ana lyeng'ine:
Kigira yaga mutumwa mululu a la tumwa kuye.
12Iduba i nyagwa avana vayo ni i nyola mundu,
Bu veye bulahi kuvita a vugane nomusiru mu busiru bwibwe.
13Ku vosi uyu u tunga ubudamano mbugono bwobulahi,
Ubudamano si bu la twula mu inyumba yeye.
14Litanga lyelihing'ana li veye kuli mundu a hudulanga ha amadzi ga veye:
Kunangwa mu leke lihangalidzana lwa li kikiri kuva ubulwani.
15Uyu u hedzanga avadamano ubulungi, na uyu u vikanga lihyolo ku mulungi
Vombi halala va veye livihiriridza ku Yahova.
16Kigira ki musiru a veye nekyokugula ubugeeri mu mukono gwigwe
Kigira si a li nelimanya?
17Mulina a yanzanga madiku gosi;
Na amwavo wivuleywi kukonya mu kivi.
18Mundu u ta li nelimanya a ha mbannya makono
A duke kuva nekihambiriru mmoni mwo mutende wewe.
19U yanzanga lihyolo a yanza lihing'ana:
Na uyu u ginganga kiribwa kikye, yenyanga ubudivi.
20Uyu u veye nomwoyo gwobukyamu si a nyola ubulahi mba;
Na uyu u vedzanga nolulimi lwokugirunkana a gwidzanga mu lidiva.
21Uyu wivulanga musiru a veye ku buvereri bwibwe mwene;
Na dada womusiru si a veye nobusangali mba.
22Mwoyo gwobusangali gu veye lunyasi lulahi;
Navutswa mwoyo gwoneka gwuminyanga vigumba.
23Mundu mudamano a vugulanga kikuikula mu kiritu
A kyaminye tsinzira tsyelikalaga.
24Ubugeeri bu veye imbiri wommoni mwa u veye nelimanya;
Navutswa tsimoni tsyomusiru tsi veye ku kiheri kyelirova.
25Mwana musiru a veye liverera ku dada wewe
Nobululu ku uyu wa mwivula.
26Kandi kuha mulungi amageli si bu veye bulahi,
Kandi si bu veye bulahi kukuya avagoosi kigira ubulungi bwavo.
27Uyu u gehidza makuva gege a veye nelimanya;
Na uyu u veye nomwoyo gwa galaha a veye mundu welimanya.
28Kali musiru lwa a kiring'ana a validzwa kuva mugeeri;
Na lwa a kunika minwa gyigye a ralidzangwa kuva wetsiganagani tsindahi.
©Bible Society of Kenya, 1967