Tsing'ano 16
16
1Lilohidza lyomwoyo li vedzanga lyomundu;
Navutswa litivula lyolulimi li twulanga ku Yahova.
2Tsinzira tsyosi tsyomundu tsi veye tsindahi imbiri wetsimoni tsitsye mwene;
Navutswa Yahova a geranga myoyo ku tsiratili.
3U vike ku Yahova miyinzi gyigyo,
Na tsiganagani tsitsyo tsi la dinyiridzwa.
4Yahova u koli vindu vyosi ku bulaliri bwibwe
Yee, kali avadamano ku lidiku lyobudamano.
5Ku vosi u veye nomwoyo gwoluyai a veye livihiridza ku Yahova:
Kali makono ni ga hambana si a la vula kukalagirwa.
6Ubudamano bwogidzangwa netsi mbabasi na ageligali;
Avandu va twula ku ubudamano kigira litia Yahova.
7Tsinzira tsyomundu ni tsi yanzidza Yahova
A kolanga kali avasigu veve kuva nemirembe kuye.
8Bukekeke halala nobulungi bu veye bulahi,
Kuvita linyola linyingi halala nobukyamu.
9Mwoyo gwomundu gu ganagana inzira yeye;
Navutswa Yahova yimiriranga ligenda lilye.
10Likalaga lilahi li vedzanga mu minwa gyomwami;
Munwa gwigwe si gu la hyola mu likalaga.
11Tsiratili na vigero vyobulungi ni vya Yahova;
Na vyokugera vyosi vyomu imuya vi veye miyinzi gyigye.
12Likola ubudamano li veye livihiriridza ku avami;
Kigira intebe yobwami i dinyiri dzangwa nobulungi.
13Minwa gyobulungi gyi veye ubuyanzi bwa avami;
Navo va yanza uyu u volanga bulungi.
14Ubutima bwomwami bu veye kuli avatumwa velikudza:
Navutswa mundu wobugeeri a la bu hodzeridza.
15Mu ubulavu bwommoni mwomwami mu veye nelivamwoyo;
Na tsimbabasi tsitsye tsi veye kuli lilesi lyembula yenyima.
16Bu duka kuli ndi ubulahi bwokunyola ubugeeri kuvita kunyola ithahabu
Yee, kunyola limanya li veye litovolwa kuvita linyola ifetha.
17Lihasi lyavalungi li veye kwavukana nobudamano:
Uyu u lindanga inzira yeye yelindanga mwene.
18Uluyai lwimiriranga lidiva,
Na mwoyo gwokwigingira gwimiriranga ligwa.
19Nobulahi kuva nomwoyo gwokwegehidza halala navadaka,
Kuvita ligavula vilanye halala na avoluyai.
20Uyu u huliranga likuva a la nyola ubulahi
Na ku vosi u suuvira Yahova, a veye nobusangali.
21Avageeri mu mwoyo va la langwa avelimanya;
Na ubunolu bweminwa bu medanga lyegidzwa.
22Limanya li veye kidaho kyelivamwoyo ku uyu u veye nalyo;
Navutswa lihebwa amageli ku avasiru li veye ubusiru bwavo.
23Mwoyo gwomugeeri gwegidzanga munwa gwigwe,
Nokumeda amegidzo mu minwa gyigye.
24Makuva gokuyanzidza ga veye kuli lisang'asa lyobwuki,
Ga veye amanolu ku mwoyo, na ubulamu ku vigumba.
25I veye ho inzira i lolekanga ku mundu kuva inungi,
Navutswa kiheri kyayo ki veye tsinzira tsyelikudza.
26Inzala yomuyinziri i mu kolera miyinzi;
Kigira munwa gwigwe gu mu niganga kugyo.
27Mundu wa vutswa a senulanga ubudamano;
Na mu minwa gyigye mu veye kuli muliru gu sambanga.
28Mundu mukyamu a landidzanga lihing'ana;
Kandi welimonya yavukannyanga avalina veligali.
29Mundu mululu a goonyanga mu tende wewe,
Nokumwimirira ku inzira i ta li indahi.
30Uyu u mwolidzanga tsimoni tsitsye a kolanga kuganagana vikyamu:
Uyu u sunnyanga minwa gyigye a kolanga vidamano.
31Mutwe gwetsimbudzi gu veye ne gudwa yobukumi;
Ni gu va ni gu loleka ku inzira yobulungi.
32Uyu mwikudziri ku butima a veye mulahi kuvita avaluviriri;
Na uyu wamehanga mwoyo gwigwe a veye mulahi kuvita u vugulanga lidala.
33Ikura i sikisangwa mu ingubo;
Navutswa likalaga lyayo lyosi li veye ku Yahova.
©Bible Society of Kenya, 1967