Tsing'ano 15
15
1Litivula lyagalaha li kiring'annya ubutima;
Navutswa makuva malulu ga viridzanga ubutima.
2Ululimi lwomugeeri lu volanga limanya lilungi;
Navutswa munwa gwomusiru gu sundulanga ubusiru.
3Tsimoni tsya Yahova tsi veye hosi,
A lolanga madamano na malahi.
4Ululimi luhooma lu veye musala gwelivamwoyo;
Navutswa ubukyamu mulwo bu veye ubwoneku bwomwoyo.
5Musiru a leganga lihebwa amageli na dada wewe;
Navutswa u bugiriranga lyegidzwa a nyolanga ubugeeri.
6Mu inyumba yomulungi mu veye na akiba inyingi;
Navutswa mu limedeka lyavada mano mu veye nekivi.
7Minwa gyavalungi gyi gavulanga limanya;
Navutswa mwoyo gwomusiru si gu kolanga ndiyo mba.
8Kihaanwa kyomudamano ki veye ubuvihiriridzi ku Yahova;
Navutswa lisaala lyavalungi li veye ubuyanzi bwibwe.
9Inzira yavadamano i veye ubuvihiriridzi ku Yahova;
Navutswa a yanza uyu u londananga nobulungi.
10Li veye ho lihebwa amageli lida mbidzanga uyu u lekanga inzira;
Na uyu u dunyira ligondokirwa a la kudza.
11Kihadisi na ubwoneku vi veye imbiri wa Yahova:
Nasindi myoyo gyavana va avandu
12Wekihenyahenye si a yanza ligondokirwa;
Si a li tsia ku avageeri.
13Mwoyo gwokusangala gu kola mumoni ubusangali;
Navutswa liverera lyononnya mwoyo.
14Mwoyo gwa uyu u veye nobugeeri gwenyanga limanya;
Navutswa munwa gwavasiru gu litsanga ubusiru.
15Madiku gosi ga yavo ava dambidzangwa ga veye madamano;
Navutswa uyu u veye womwoyo gwelisangala a veye nelilia kazozo.
16Bukekeke halala nelitia Yahova, bu veye bulahi
Kuvita butugi bunyingi halala nekivi.
17Lilia lyetsingutsa halala naliyanzana li veye lilahi
Kuvita ing'ombe inkomeru halala nelidunyirana.
18Mundu mululu a viridzanga lihing'ana;
Navutswa uyu mwikudziri wobutima a gayidzanga lihing'ana.
19Inzira yomugata i veye kuli ulwebo lwamafwa
Navutswa inzira yomulungi i kolangwa lihasi.
20Mwana wobugeeri a kolanga dada wobusangali;
Navutswa mundu musiru a leganga mama wewe.
21Ubusiru bu veye ubusangali bwa uyu u ta li nobugeeri;
Navutswa mundu welimanya a lungikidzanga ligenda lilye.
22Ha lilungikidza li vula, lisaavirwa lyoneka;
Navutswa lyenya li dinyiridzangwa ku bunyingi bwavalungi kidzi.
23Mundu a vedzanga nobusangali mu litivula lyomunwa gwigwe;
Na likuva li volangwa ku inyinga i dukani, li veye lilahi ndi
24Ku avageeri inzira yelivamwoyo yanigiranga igulu,
A twule mu Kihadisi hasi.
25Yahova a liiha inyumba yowoluyai;
Navutswa a la dinnya ulwako lwamukunzakali.
26Tsiganagani tsindamano tsi veye livihiridza ku Yahova;
Navutswa makuva ga yanzidzanga ga veye manifu.
27Uyu u kayirwa vyambeti vi ta veye vilungi a dambidza inyumba yeye mwene;
Navutswa uyu u vihirirangwa nevikukula a la va mwoyo
28Mwoyo gwomulungi gu ganagananga agokutivula;
Navutswa mwoyo gwomudamano gu sundulanga vindu vidamano.
29Yahova a veye ihale ku mudamano;
Navutswa a hulira lisaala lyomulungi.
30Ubulavu bwetsimoni bu yanzidza mwoyo;
Kandi makuva malahi ga komeridza vigumba.
31Ugutu gu huliranga lihebwa amageli gelivamwoyo
Gu la menya hagati havageeri.
32Uyu u sula lyegidzwa a leganga mwoyo gwigwe mwene;
Navutswa uyu u hulira lihebwa amageli yenyolira limanya.
33Litia Yahova li veye lyegidzwa lyobugeeri;
Kandi lyegehidza limirira lidzo minywa.
©Bible Society of Kenya, 1967