Tsing'ano 14
14
1Ku vosi mukali wobugeeri yombakanga inyumba yeye:
Navutswa musiru a gi sambula namakono gege mwene.
2Uyu u gendanga mu bulungi bwibwe a tidzanga Yahova;
Navutswa u veye mukyamu mu tsinzira tsitsye a mu leganga.
3Mu munwa gwomusiru mu veye nempimbo yoluyai lwilwe;
Navutswa minwa gyavageeri gyi la va linda.
4Bugira tsing'ombe likego li veye kinifu;
Navutswa limedeka linyingi li veye ku tsingulu tsyeng'ombe.
5Muloli musuuvirifu si a la vola ububehi mba;
Navutswa muloli mbehi a volanga makuva gobubehi.
6Muhenyahenye yenyanga ubugeeri na si a bu Nyola;
Navutswa limanya li veye lyangu ku uyu wobugeeri.
7U twule imbiri womusiru
Kigira u la vula kulola kuye minwa gyelimanya.
8Ubugeeri bwomugeeri bu veye ku mannya inzira yeye;
Navutswa ubusiru bwavasiru bu veye ubugadi.
9Avasiru va kolanga kihenyahenye ku ubwoni;
Navutswa hagati ha avalungi li veye ho likolerana bulahi.
10Mwoyo gu manyanga ubululu bwagwo gwene;
Na mugeni si yivika mu ubuyanzi bwagwo.
11Inyumba yomudamano i la tung'aminywa;
Navutswa lihema lyomulungi li la gasidzwa.
12Inzira i veye ho i loleka ku mundu kuva inungi;
Navutswa kiheri kyayo ki veye tsinzira tsyelikudza.
13Kali mu liseka mwoyo gu veye nelivererera;
Na kiheri ku busangali ki veye ubuliduhu.
14Uyu wirananga inyima mu mwoyo gwigwe, a lizula tsinzira tsitsye;
Na mundu mulahi a liguta ubulahi bwomwoyo gwigwe mwene.
15U ta manya a suuvira makuva gosi;
Navutswa wobugeeri a henzanga ligali ligenda lilye.
16Wobugeeri a tidzanga, na a leka ubudamano;
Navutswa musiru a kolanga kirage na yesuuviridzanga.
17Uyu u vihirirangwa bwangu a la kola agobusiru;
Na mundu wetsiganagani tsindamano a dunyirangwa.
18Yavo ava ta manya va nyolanga miyandu gyobusiru;
Navutswa avobugeeri va vikangwa igudwa yelimanya.
19Avadamano vinamanga hasi imbiri wavalahi;
Na avekirage vinamanga ha viribwa vyavalungi.
20Mudaka a dunyirangwa kali nomutende wewe mwene;
Navutswa mutugi a veye navalina avanyingi.
21Uyu u leganga mutende wewe a kolanga ubwoni;
Navutswa uyu u verereranga avadaka, a veye nobuyanzi.
22Ava lombanga ubudamano va la vula kugota naho?
Navutswa tsimbabasi na ageligali vi la va ku yavo ava lombanga ubulahi.
23Mu miyinzi gyosi mu veye na madanyi;
Navutswa makuva geminwa ga yekanga ku budaka bwere.
24Igudwa yavageeri i veye ubutugi bwavo;
Navutswa ubusiru bwavasiru bu veye ubusiru vutswa.
25Mulolekidzi wageligali a honnya nga myoyo gvavandu;
Navutswa uyu u volanga ububehi a kolanga ubugadi.
26Mu litia Yahova mu veye neliluviridzwa
Na avana veve va la va nahokwivisa.
27Litia Yahova li veye kisenukiru kyamadzi gelivamwoyo,
Mundu a nyale kutwula mu mitego gyelikudza.
28Ubukumi bwomwami bu veye mu bunyingi bwavandu veve;
Navutswa lidiva lyomunene li veye mu ligeha lyavandu.
29Uyu mwikudziri wobutima a veye nelimanya linene;
Navutswa uyu womwoyo gwa bwangubwangu a kuminyanga ubusiru.
30Mwoyo gwobulamu gu veye livamwoyo lyomubiri;
Navutswa likendeka li veye ligu nda lyevigumba.
31Uyu u dambidzanga avadaka a leganga Mulombi wewe;
Navutswa uyu u verereranga ava dambi yidzominyanga Mulombi wewe.
32Mudamano u minirangwa hasi mu likola ubudamano bwibwe;
Navutswa mulungi a veye nelisuu viridzwa mu likudza lilye.
33Ubugeeri bu menyanga mu mwoyo gwa uyu u veye nelimanya;
Navutswa aga veve mu vasiru ga lang'aminyangwa havulavu.
34Ubulungi bu nenehidzanga ihiri;
Navutswa ubwoni bu veye tsisoni ku avetsihiri.
35Ubulahi bwomwami bu yeka ku mutumekiri u kolanga nobugeeri;
Navutswa ubutima bwibwe bu la va ku uyu u letanga tsisoni.
©Bible Society of Kenya, 1967