Tsing'ano 12
12
1Ku vosi u yanzanga kweganehidzwa niye u yanzanga limanya;
Navutswa uyu u dunyiranga lihe bwa amageli a veye kuli inyama.
2Mundu mulahi a la nyola tsimbabasi ku Yahova;
Navutswa mundu wetsiganagani tsindamano a la kalagirwa.
3Mundu si a la singiridzwa nobudamano mba
Navutswa kitinya kyomulungi si ki la dengeyidzwa.
4Mukali mulahi a veye itaji yomusatsa wewe;
Navutswa uyu u mu letera tsisoni a veye kuli vigumba vya gunda vivye.
5Tsiganagani tsyomulungi tsi veye tsinungi;
Navutsu a makuva gomudamano ga veye ubugadi.
6Makuva gavadamano ga veye mu ligoneka masahi;
Navutswa munwa gwavalungi gu la va honnya.
7Avadamano va tung'aminyangwa, na si va veye ho;
Navutswa inyumba yomulungi i la singira.
8Mundu a lidzominywa kuli kigero kyobugeeri bwibwe;
Navutswa uyu womwoyo gwobukyamu a la legwa.
9Uyu u legangwa, naye na a veye nomutugwa wewe
A veye mulahi kuvita uyu wiidzominya mwene, na a ta veye nevyokulia.
10Mundu mulungi a lindanga ubulamu bwemitugu gyigye;
Navutswa tsimbabasi tsyomuda mano tsi veye ubululu.
11Uyu u limanga mulimi gwigwe a la va nevyokulia vi duka;
Navutswa uyu u londanga vandu va vutswa si a veye nelimanya.
12Avadamano va kayirangwa vilanye vya avandu avadamano.
Navutswa kitinya kyavalungi kyamanga makuyu.
13Ku lihyolo lyeminwa, mutego gu veye mu, ku mudamano;
Navutswa mulungi a la hona mu kivi.
14Ubulahi bu la duka ku mundu ku makuyu gomunwa gwigwe
Na mundu a la hebwa likola lyamakono gege.
15Inzira yomusiru i veye inungi mu tsimoni tsitsye;
Navutswa wobugeeri a huliridzanga makuva.
16Ubutima bwomusiru bwelang'aminya bwangu;
Navutswa mundu wobugeeri a kunikanga tsisoni.
17Uyu u volanga ageligali a vuulanga ubulungi;
Navutswa muloli wobubehi a volanga ubugadi.
18Ha veye welivola bugira liganagana, kuli litumita lyekivavi;
Navutswa ululirni lwomugeeri lu veye nobulamu.
19Munwa gweligali gu la dinyiridzwa mihiga nemihiga;
Navutswa ululimi lwobubehi lu veye lwedagika indala vutswa.
20Ubugadi bu veye mu mwoyo gwa yavo ava ganagananga uhudamano;
Navutswa ku yavo ava lungikidza mirembe, ubusangali bu veye kuvo.
21Avalungi si va la nyola kivi kali hakuzuzu:
Navutswa avadamano va lizula ubudamano.
22Minwa gyobubehi gyi veye livihiriridza ku Yahova;
Navutswa yavo ava kolanga bulungi, nivo ava a yanzidzanga.
23Mundu wobugeeri a visanga limanya;
Navutswa mwoyo gwavasiru gu lang'aminya ubusiru.
24Mukono gwa mugulu gu lameha;
Navutswa mugata a la gererwa miyinzi gyigye.
25Ubuliduhu mu mwoyo gwomundu bu gwinaminya;
Navutswa likuva lilahi li gu sangalidza.
26Mulungi a veye mwimiriri ku mutende wewe;
Navutswa inzira yomudamano i va hilanga mu mahyolo.
27Mugata si a samba kya a nyoye mu luhidzi lwilwe
Navutswa vindu vilahi vyavandu vi veye vyomugulu.
28Livamwoyo li veye ku inzira yobu lungi;
Kandi si ha veye likudza mu inzira yalyo.
©Bible Society of Kenya, 1967