Tsing'ano 11
11
1Tsiratili tsyobugadi tsi veye livihiriridzwa ku Yahova;
Navutswa kigero kyetsiratili tsi nungi ki mu yanzidza.
2Lwa uluyai lu duka, tsisoni kandi tsi dukanga.
Navutswa ubugeeri bu veye halala na vegehidzi.
3Ubudukiru bwa avobulungi bu la vimirira;
Navutswa ubukyamu bwa avetsimbemba bu la va dividza.
4Ubutugi si bu konya kindu mu lidiku lyobutima;
Navutswa ubulungi bu honnyanga ku likudza.
5Ubulungi bwomudukiru bu la mwimirira ku inzira yeye;
Navutswa mudamano a la gwa mu ubudamano bwibwe mwene.
6Ubulungi bwavobulungi bu la va honnya;
Navutswa avetsimbemba va la gumirwa mu bugadi bwavo avene.
7Lwa mudamano a kudza, lihenzerera lilye li la hera;
Na lisuuviridza lyobudamano li la diva.
8Wobulungi a honnyangwa mu kivi,
Na umudamano a duka mu ubugono bwibwe.
9Umundu u vula kutia Nyasaye, a dividza wakye nomunwa gwi gwe;
Navutswa mulungi a la hona kigira limanya.
10Lwa avalungi va nyola ubulahi lidala li sangala;
Na lwa avadamano va kudza, ha veye nesango.
11Lidala li kuminyangwa nobugasu bwavalungi;
Navutswa li kingulangwa nomu nwa gwavadamano.
12Uyu u leganga wakye, si a veye nobugeeri;
Navutswa mundu welimanya a kiring'ana.
13Uyu u tsitsanga yiyi na yiyi netsimbemba a vuulanga aga viswa;
Navutswa uyu u veye nomwoyo musuuvirifu a kunika inkuva.
14Ha ta li nelimirira lyobugeeri, avandu va gwidza,
Navutswa mu bunyingi bwavalungikidzi ha veye nelyelemeridza.
15Uyu u kolera mugeni kihambiriru a la salira kukyo;
Navutswa uyu u dunyira kihambiriru a veye nekilema mwoyo.
16Mukali mugoosi a nyola lidzominywa
Na avandu avalulu va nyola ubutugi.
17Wetsimbabasi yekolera mwene ubulahi;
Navutswa uyu wekirage yehilanga mu kivi mwene.
18Mudamano yenyolera madanyi gobugadi
Navutswa uyu u midzanga bulungi a veye namadanyi geligali.
19Uyu u dinyahga mbulungi a la duka ku livamwoyo;
Na uyu u londanga ubukyamu, yehila mu likudza mwene.
20Yavo avobukyamu bwomwoyo va veye livihiriridza ku Yahova;
Navutswa avobudukiru mu tsinzira tsyavo va mu yanzidza.
21Kali makono ni ga hambana, mudamano si a la vula kukalagirwa;
Navutswa kisukululwi kyomulu ngi ki la hona.
22Kuli imingiri yethahabu mu amolu gempidzi,
A veye ndiyo mukali weligondo lilahi u ta li nobugeeri.
23Lyenya lyomulungi li veye bulahi bwere;
Navutswa lihenzerera lyomudamano li veye ubutima.
24Ha veye nowelisalannya, navutswa vivye vi medeka;
Kandi ha veye na u kolanga ubwimani, navutswa bu leta ubudaka.
25Mwoyo gwobuhaani gu la komeridzwa;
Na uyu u samanga amadzi, naye a la nwehidzwa.
26Uyu wimananga ubuswage, avandu va la mu laama;
Navutswa uyu u gulidzanga ubuswage, ubugasu bu la va ku mutwe gwigwe.
27Uyu wenyanga ubulahi nobugulu yenyanga tsimbabasi;
Navutswa uyu wenyanga ubudamano, bu ladza kuye.
28Uyu u suuviranga ubutugi bwibwe a la gwa;
Navutswa avalungi va la mera kuli litu livisi.
29Uyu u dambidzanga inyumba yeye a la nyola miyandu gyembuudza;
Na musiru a la va mutugwa wa uyu u veye nomwoyo gwobugeeri.
30Amakuyu gavalungi ga veye musala gwelivamwoyo;
Uyu wobugeeri a nyolanga myoyo gyavandu.
31Henza, avalungi va la tungwa mu lirova:
Nasindi avadamano na avoni.
©Bible Society of Kenya, 1967