Tsing'ano 10
10
1Tsing'ano tsya Solomoni.
Mwana wobugeeri a kolanga dada wewe kuva nobuyanzi;
Navutswa mwana wobusiru a veye ubuliduhu ku mama wewe.
2Tsikiba tsyobudamano tsi veye tsya vutswa;
Navutswa ubulungi bu honnyanga ku likudza.
3Yahova si a la leka mwoyo gwowobulungi kuva nenzala;
Navutswa a sulanga likayirwa lyomudamano.
4U tumekiranga mukono gwobugata a dukanga kuva mudaka;
Navutswa mukono gwomugulu gu letanga ubutugi.
5Uyu u vungidzanga inyinga yoluya a veye mwana wobugeeri;
Navutswa u gonanga tsindolo inyinga yeligesa a veye mwana wokuleta tsisoni.
6Ubugasu bu veye ku mutwe gwomulungi;
Navutswa kirage ki kunikanga munwa gwomudamano.
7Lidzulitsa yavo avalungi li veye nobugasu;
Navutswa lieta lyomudamano li la gunda.
8Avobugeeri mmwoyo gwavo va la vugula amalago;
Navutswa musiru wamakuva manyingi a la gwa hasi.
9Uyu u gendanga nobulungi a gendanga nobuluviriri
Navutswa uyu u kyaminyanga tsinzira tsitsye a la manyekana.
10Uyu u molidzanga imoni a letanga liverera;
Navutswa musiru wa makuva manyingi a la gwa hasi.
11Munwa gwomulungi gu veye kisenukiru kya amadzi gelivamwoyo
Navutswa kirage ki kunikanga munwa gwomudamano.
12Ubudunyirani bu vukidza amahing'ano;
Navutswa ubuyanzi bu kunikanga mahyolo gosi.
13Ubugeeri bu nyoleka mu minwa gya uyu u veye nelimanya;
Navutswa impimbo i dukira mu gongo gwa uyu u gehera limanya.
14Avageeri va vikanga akiba yelimanya;
Navutswa munwa gwomusiru gu veye ubudivi bwa kalunu.
15Ubutugi bwomutugi bu veye lidala lilye lyolugaga:
Na ubudivi bwa avadaka bu veye ubudaka bwavo.
16Miyinzi gyavalungi gyi vekanoa ku livamwoyo;
Limedeka lyavadamano li yekanga ku ubwoni.
17Uyu u bugiriranga lihebwa amageli a veye ku inzira yelivamwoyo;
Navutswa uyu u lekanga lyegi dzwa a gotanga.
18Uyu u visanga ubudunyi a veye neminwa gyobubehi
Na uyu u volanga ligemehidza a veye musiru.
19Mu bunyingi bwamakuva si ga vula kuva mu mahyolo
Navutswa uyu u gayanga minwa gyigye, a veye wobugeeri.
20Ululimi lwomulungi lu veye kuli ifetha indahi:
Mwoyo gwomudamano gu konyanga hakekeke vutswa.
21Minwa gyowobulungi gyi lageridza vanyingi;
Navutswa avasiru va kudzanga ku livula kuva nelimanya.
22Ubugasu bwa Yahova bu tugidzanga;
Na si a vika liverera halala nabwo.
23Likola ubudamano li veye kuli ubukino ku musiru;
Na ubugeeri bu veye ndiyo ku mundu welimanya.
24Ubutii bwomudamano bu la duka kuye
Na lyenya lyomulungi a lizulitsi rwa.
25Kihudzudzi ni ki mali kuvita mudamano si a veye ho kandi,
Navutswa wobulungi a veye muse gwa madiku gosi.
26Kuli isiki i veye mu amino, na kuli mwoki gu veye mu tsimoni,
Ni ndiyo mugata a veye ku yavo ava mu tumanga.
27Litia lya Yahova li meda madiku;
Navutswa mihiga gya avadamano gyi la gehidzwa.
28Lisuuvira lyavalungi li la va ubuyanzi;
Navutswa lihenzerera lyomudamano li la diva.
29Inzira ya Yahova i veye impinga ku avalungi;
Navutswa i veye ubwoneku ku ava kolanga ubudamano.
30Wobulungi si a la dengeyidzwa mihiga nemihiga;
Navutswa avadamano si va la menya mu kivala.
31Munwa gwomulungi gu sibukanga ubugeeri;
Navutswa ululimi lwobukyamu lu la kalagwa.
32Minwa gyavalungi gyi manyanga aga nyala kubugirirwa:
Navutswa munwa gwomudamano gu volanoa ubukyamu.
©Bible Society of Kenya, 1967