Livalidza 30
30
1Na Musa ya volera avanene vetsihiri tsya avana va Israeli, na a vola, Inkuva y iyi i veye ya Yahova ya laga. 2Inyinga mundu ku vosi yesuha lisuha ku Yahova kinga lwa yenya kwisuha a duke kweboha mwene, a la vula kwononya livola lilye; a la kola kuli gosi ga twula mu munwa gwigwe. 3Ka ndi mukali ni yesuha lisuha ku Yahova, nokweboha, naye a menyanga mu inyumba ya dada wewe, mu busoleli bwibwe, 4na dada wewe na a hulira lisuha lilye, na lyeboha lya yebohera mwoyo gwigwe, na dada wewe a kiring'ana kuye ndiyo, hene yaho lisuha lilye lyosi li la menya, na lyeboha lilye lya yeboha mwoyo gwigwe li la menya. 5Navutswa ni i va dada wewe a mu gaya mu lidiku lya a hulira, lyesuha lilye lyosi, kinga lyeboha lilye lya yeboha mwoyo gwigwe li la vula kumenya: na Yahova a la mu sameha, kigira dada wewe ya mu gaya.
6Kandi na a va na a veye nomusatsa, inyinga lyelisuha lilye li veye kuye, kinga livola lya ya vola nomunwa gwigwe bugira kuganagana lyagira, ni yeboha mwene mwoyo gwigwe, 7na musatsa wewe a hulira, na kiring'ana kuye ku lidiku lyelihulira, hene yaho lyesuha lilye li la menya, na lyeboha lya yeboha mwoyo gwigwe li la menya. 8Navutswa ni i va musatsa wewe a mu gaya ku lidiku lya ya hulira, hene yaho a lononya lyesuha lilye li veye kuye, nelivola lya ya vola nomunwa bugira kuganagana lyagira, ni yeboha mwoyo gwigwe: na Yahova a la mu sameha.
9Navutswa lyesuha lyomukunzakali, kinga lya uyu womusatsa ya leka, ku makuva gosi ga gira ni yeboha mwene, ga la menya kuye. 10Na a va ni yesuha na a veye mu inyumba yomusatsa, kinga na a va ni yeboha mwene nelyesuha, 11na musatsa wewe ya li hulira, ma na a kiring'ana, na a vula kumugaya; hene yaho lyesuha lilye lyosi li la menya, na lyeboha lyosi lya yeboha nalyo li la menya. 12Navutswa ni i va musatsa wewe yononya lyesuha lilye ligali ku lidiku lya ya li hulira, hene yaho makuva gosi aga twula mu munwa gwigwe mu lyesuha lilye, kinga mu lyeboha lilye lyomwoyo si li la menya mba: musatsa wewe u lyononyi; na Yahova a la mu sameha.
13Lilagana lyosi na lyesuha lyosi li bohanga mwoyo kuguvereridza, musatsa wewe a nyala kulisingeridza, kinga kulyononya. 14Navutswa musatsa wewe na a kiring'ana ku mukali wewe ligali madiku gosi bugira kumugaya, hene yaho a singeridza lyesuha lilye lyosi, kinga lyeboha lilye li veye kuye lyosi: uyu a li singeridza, kigira ya kiring'ana ku mukali wewe ku lidiku lya ya hulira. 15Navutswa na a lyononya ligali inyima wa ya li hulira, hene yaho uyu a la ginga ubudamano bwomukali wewe. 16Yaga ga veye amalago ga Yahova ya laga Musa, hagati homusatsa nomukali wewe, hagati ha dada nomukana wewe mu busoleli bwibwe mu inyumba ya dada wewe.
©Bible Society of Kenya, 1967