Livalidza 31
31
1Na Yahova ya volera Musa, na a vola, 2U vanze kisalya kya avana va Israeli ku Vamidiani: ma lwenyima ive u la vungidzwa halala na avandu vovo. 3Na Musa ya volera avandu, na a vola, Mu vike vyuma ku avasatsa avalala ku mwinye, vetegekire lihe, va twulire Avamidiani, va vanze kisalya kya Yahova ku Avamidiani. 4Ku ihiri sa indala u la vugula mu elfu, mu tsihiri tsyosi tsya Israeli ava mu la hila mu bulwani. 5Kunangwa va vugulwa mu tsielfu tsya Israeli, elfu indala mu tsihiri sa indala, tsielfu likumi na tsiviri ava lomberwa ubulwani. 6Na Musa ya va tuma, elfu indala ku tsihiri sa indala, kutsia mu bulwani. Yavo na Finehasi mwana wa Eleazaru musalisi, va tsia mu bulwani, halala na viju vya hatakatifu, na visaliva vyokukupa litihidza vya li mu mukono gwigwe. 7Navo va lwana na Midiani, kuli Yahova ya laga Musa; navo viita avasatsa vosi. 8Na viita avami va Midiani halala na avandu vavo avandi aviitwa: navo ni yava, Evi, na Rekem, na Zuru, na Huru, na Reba, avami vatano va Midiani: na Balaam mwana wa Beoru va mwiita nekivavi. 9Na avana va Israeli va lanya avakali va Midiani, na avana vsvo, na tsing'ombe tsyavo tsyosi, na magondi gavo gosi, na vindu vyavo vyosi va vi lanya. 10Na madala gavo gosi, na hosi ha va menya, na busosero bwavo bwosi, va samba nomuliru. 11Na va vugula vilanya vyosi, na vyokwigulirwa v ya avandu kandi vyemitugu. 12Na va vi leta ku Musa noku Eleazaru musalisi, noku livugana lyosi lya avana va Israeli, avahambe vosi nevilanye vyosi na vyosi vya gumirwa, ku hokusoa mu kereremo kya Moabu, ki veye himbi Yordani engereka wa Yeriko.
13Na Musa, na Eleazaru musalisi, na avanene vosi velivugana, va twula hokusosa kutsia kuvaganira. 14Na Musa ya vihirirwa avanene velihe, avanene vetsielfu, na vanyampara vetsimia, ava twula ku butumiki bwelihe. 15Na Musa ya va volera, Mwa honnya avakali vosi va ve mwoyo? 16Henza, yava va gotidza avana va Israeli, ku makuva ga Balaam, kukola mahyolo ku Yahova mu inkuva ya Peoru, na ndivo liduywa lya duka mu livugana lya Yahova. 17Kunangwa mwiite avana vosi avayai, na mwiite avakali vosi ava manya musatsa neligona halala naye. 18Navutswa avana avakana vosi ava kikiri kumanya musatsa neligona halala naye, mu va leka va ve mwoyo ku mwinye avene. 19Na mwinye mu singeridze mahema genyu kyova wa hokusosa inyinga yamadiku gatano na gaviri: ku vosi wiita mundu, na ku vosi u dira wiitwa, mwetakase avene ku lidiku li kola gavaka, noku lidiku li kola gatano na gaviri, mwinye avane halala na avalanywi venyu. 20Na ku tsingubo tsyosi, na vyosi vi lombwa na masero, na vindu vyosi vi lombwa nobwoya bwetsimbuli, na viju vyosi vi lombwa nomusala, mu la vi takasa.
21Na Eleazaru musalisi ya volera avasatsa avelihe ava tsia mu bulwani, Yili ni lilaga lya Yahova ya laga Musa: 22navutswa ithahabu na ifetha, na mugasa, na kivya, na libang'a, na lisasi, 23vyosi vi nyala kumenya mu muliru, mu la vi vitidzira mu muliru, na vi la va vinifu; navutswa vi la takaswa mu amadzi gokwahulanya: na yyosi vi ta nyala kumenya mu muliru, mu la vi vitidzira mu amadzi. 24Na mwinye mu logidze tsingubo tsyenyu ku lidiku lya gatano na gaviri, na mu la va avanifu; na lwenyima mu lingira hokusosa.
25Na Yahova ya volera Musa, na a vola, 26U vugule livalidzwa lyevilanywa lya vugulwa, lya avandu na lyemitugu, ive, na Eleazaru musalisi, na avemitwe gyetsinyumba tsya avaguga velivugana; 27na mu gavule vilanyi vidieli viviri: hagati ha avandu va veye avasidza mu bulwani, ava li kutsia mu lihe, na livugana lyosi. 28Na u haane ku Yahova kidieli ki twule ku avandu avelihe ava li kutsia mu bulwani: mwoyo mulala ku tsimia tsitano, ku avandu, noku tsigiriki, noku tsisukiri, noku magondi 29u ki vugule ku inusu yavo, u he Eleazaru musalisi, kuva kihaanwa kyokudigululwa kya Yahova. 30Noku inusu ya avana a va Israeli, u la vugula mulala ku il livalidzwa lyamakumi gatano selilala, lya avandu, na lyetsigiriki, na lyetsisukiri, na iyamagondi, kali ku mitugu gyosi u vi haane ku Avalevi, ava t linda miyinzi gyelihema lya Yahova. 31Na Musa na Eleazaru musalisi va kola kuli Yahova ya laga Musa.
32Kunangwa vilanyi, vya tigala ku vya avandu velihe va lanya, vya li amagondi tsielfu tsimia tsitano na indala na tsielfu tsitano na tsiviri na tsitano, 33na tsigiriki tsielfu makumi gatano na gaviri, na tsiviri, 34na tsisukiri tsielfu makumi gatano na indala, na elfu indala, 35na avandu tsielfu makumi gavaka na tsiviri, ku vosi avekikali ava vula kumanya musatsa neligona halala naye. 36Na inusu, ya li kidieli kya yavo ava tsia mu bulwani, ya li magondi tsielfu tsimia tsivaka, na makumi gavaka, na tsitano na tsiviri, na tsimia tsitano: 37na kidieli kya Yahova kya magondi kya li tsimia tsitano na indala, na makumi gatano na gaviri na magondi gatano. 38Na tsigiriki tsya li tsielfu makumi gavaka na tsitano na indala; mutsyo kidieli kya Yahova kya li tsigiriki makumi gatano na gaviri na tsiviri. 39Na tsisukiri tsya li tsielfu makumi gavaka, na tsimia tsitano; mutsyo kidieli kya Yahova kya li tsisukiri makumi gatani na lilala, na isukiri indala. 40Na avandu va li tsielfu likumi na tsitano na indala; mu yavo kidieli kya Yahova kya li makumi gavaka na vaviri. 41Na Musa ya ha Eleazaru musalisi kidieli, kya li kihaanwa kyokudigululwa kya Yahova, kuli Yahova ya laga Musa.
42Na ku inusu yevilanyi, ya li ya avana va Israeli, ya Musa ya vugula ku avasatsa ava tsia mu bulwani, 43(ga veye inusu yivilanyi ya li yelivugana, ya li magondi tsielfu tsimia tsivaka, na makumi gavaka na tsielfu tsitano na tsiviri, na tsimia tsitano, 44na tsigiriki tsielfu makumi gavaka na tsitano na indala, 45na tsisukiri tsielfu makumi gavaka, na tsimia tsitano, 46na avandu tsielfu likumi na tsitano, na indala,) 47na ku inusu yevilanyi ya li ya avana va Israeli, Musa ya vugula mulala-mulala ku makumi gatano-gatano, ku avandu noku mitugu, na ya ha Avalevi, ava lindanga ubulindi bwelihema lya Yahova; kuli Yahova ya laga Musa.
48Na avanene ava li ku tsielfu tsyelihe, avanyampara vetsielfu, na avanyampara vetsimia visunda ku Musa; 49na va volera Musa, Kwinye avatumekiri vovo ku validzi avasatsa velihe ava veye mu makono getu, na si ha veye nomulala wa daka ku kwinye. 50Na ku leti kihaanwa kya Yahova yiki kyomundu sa mulala a nyoye, kya viju vyethahabu, na minyolo gyevirenge, na visambo, na imingiri yomuhuri, na tsinono, na tsinalo tsyomukono, kwelombera kyokukunika ubwoni bwetu imbiri wa Yahova. 51Na Musa na Eleazaru musalisi va vugula ithahabu kuvo, kali viju vyosi vya kolwa nobusidza. 52Na ithahabu yosi yekihaanwa kyokudigululwa kya va letera Yahova yavanyampara vetsielfu, na yavanyampara va tsimia, ya li tsishekeli tsielfu likumi na tsitano na indala, na tsimia tsitano na tsiviri, na tsishekeli makumi gatano. 53(Kigira avasatsa velihe va li ni va vuguye vilanyi, sa mulala vivye mwene.) 54Na Musa na Eleazaru musalisi va vugula ithahabu yavanyampara va tsielfu na va tsimia, nokugileta mu lihema lyokuvuganira mu, kuva lidzulitsa ku avana va Israeli imbiri wa Yahova.
©Bible Society of Kenya, 1967