Livalidza 24
24
1Na lwa Balaam ya lola ga yanzidza Yahova kugasidza Israeli, si ya tsia kuli tsinyinga tsindi, kwenya likvena, navutswa ya henzidza mumoni mwimwe ku luvega lwekyangalangwi. 2Na Balaam ya ginga tsimoni tsyitsye, na a lola Israeli va menyanga kuli tsihiri tsyavo; na Roho wa Nyasaye ya duka kuye. 3Na a kupa lugano lwilwe, na a vola,
Balaam mwana wa Beoru a vola,
Na mundu wemoni yeye ya kunikwa;
4Uyu, a vola, uyu u hulirangamakuva ga Nyasaye,
Uyu u lolanga lilola lya Wanyalavyosi,
Na a gwa hasi, na tsimoni tsitsye tsya kunulwa:
5Amahema gogo ga veye malahi ndi, O
Yakobo, Ubumenyo bubwo, O Israeli
6Kuli mavona va vagalirwa,
Kuli milimi himbi ku mugera,
Kuli makonge ga Yahova ya simika Kuli mitaragwa himbi na amadzi.
7Amadzi ga la senuka mu tsisiongo tsitsye,
Na bugutsa bwibwe bu la va mu amadzi manyingi,
Na mwami wewe a la nenehidzwa kuvita Agagi,
Na ubwami bwibwe bu la kuminywa.
8Nyasaye a mu letanga kutwula Egepeti;
A veye netsingulu tsyembongo:
A la lia tsihiri tsi veye avasigu veve,
Nokuvunanya vigumba vyavo ve vidonye,
Na a la va tumita nemibano gyigye.
9Ya goneka, nokugona hasi kuli king'ang'a
Kandi kuli king'ang'a kikali; ubwaha a la mu vukidza?
A gasidzwe ku vosi u ku gasidzanga, Na uyu u ku laamanga a laamwe.
10Na ubutima bwa Balaki bwaaka ku Balaam, na ya kupanya makono gege; na Balaki ya volera Balaam, Nda ku langa kulaama avasigu vange, na, henza, u va gasidzi ligali hali kavaka. 11Kunangwa, kalunu wiruke u tsie hoho: nda ganagana kukukuminya nelidzominya linene ligali; navutswa, henza, Yahova u ku gayi u vule kwidzominywa. 12Na Balaam ya volera Balaki, Si nda volera avatumwa vovo, ava wa tuma ku inze, ni mbola, 13Kali Balaki na a va ni ya mpa ifetha na ithahabu kuduka kwizula inyumba yeye, si nyala kuvita lwako lwa likuva lya Yahova, kukola bulahi kinga buda mano ku mwoyo gwange inze mwene; ga Yahova a vola, nigo aga nda vola? 14Na kalunu, henza, ntsitsa ku avandu vange: hamba, nku mannye aga avandu yava va la kolera avandu vovo ku madiku gekiheri. 15Na a kupa lugano lwilwe, na vola,
Balaam mwana wa Beoru a vola,
Na livola lya mundu wemoni yeye ya kunikwa;
16A vola, uyu u huliranga makuva ga Nyasaye,
Na u manyanga ubugeeri bwa U Veye Igulu Ligali,
U lolanga lilola lya Wanyala Vyosi,
Na a gwa hasi na tsimoni tsitsye tsi kunulwa:
17Inze mmu lolanga, navutswa si i veye kalunu;
Mmu henzanga, navutswa si ha veye himbi:
Ing'ereng'ani i la twula ku Yakobo,
Na impimbo yobwami i la vuka mu Israeli,
Na i la vukanya hagati ha Moabu,
Nokutsoma hasi avana vosi ve tsimbemba.
18Edom a la va miyandu,
Kandi Seiru a la va miyandu, ava li avasigu veve;
Lwa Israeli va kola nobuluviriri.
19Mulala womu Yakobo a lameha,
Nokwononya yava ava tigala ku madala.
20Na ya henza Avamaleki, na a kupa lugano lwilwe, na a vola,
Amaleki ya li wokutanga wetsihiri;
Navutswa kiheri kikye ki la duka mu bwoneku.
21Na ya henza ku Vakeni, na a kupa lugano lwilwe, na a vola,
Bumenyi bwubwo bu veye netsingulu,
Na kiduku kikyo ki vikeywi mu lwanda.
22Navutswa Keni a la dividzwa, Kuduka Asuria a la ku lanya.
23Na ya kupa lugano lwilwe, na a vola,
Magu wange, ni bwaha a la hona inyinga Nyasaye a la kola yaga?
24Navutswa bwatu bu la twula ku luginga lwa Kitim
Na bu la dambidza Asuria, na bu la dambidza Eberi;
Naye kandi a la duka mu bwoneku.
25Kunangwa Balaam ya vuka, na a twula, ni yirana hango hehe; na Balaki kandi ya tsia.
©Bible Society of Kenya, 1967