Livalidza 25
25
1Na Israeli va menya mu Shitim; Na avandu va tanga kutsia mu malaya na avakana va Moabu: 2kigira va langa avandu kutsia mu vihaanwa vya viitira avanyasaye vavo; na avandu va lia vyokulia, na va sigamira avanyasaye vavo. 3Na Israeli vehambanya na Baal-peoru: na ubutima bwa Yahova bwaaka ku Israeli. 4Na Yahova ya volera Musa, U vugule avanene vosi va avandu, na u va sunge imbiri wa Yahova, imbiri weliuva, ubutima bululu bwa Yahova bwiranywe kutwulidzwa ku Israeli. 5Na Musa ya volera avakalagi va Israeli, Mwiite sa mulala avasatsa veve avehambanyi na Baalpeoru.
6Na, henza, mulala ku avana va Israeli yadza na a letera avamwavo veve mukali Mumidiani imbiri wetsimoni tsya Musa, na imbiri wetsimoni tsyelivugana lya avana va Israeli, lwa va li ni va liriranga ha kiliango kyelihema lyokuvuganira mu. 7Na lwa Finehasi, mwana wa Eleazaru, mwana wa Haruni musalisi, ya gi lola, ya twula hagati helivugana, na a gumira litimu mu mukono gwigwe; 8na ya londa mundu wa Israeli ni yingira mu lihema inyima wewe, na a va tumita vombi, mundu uyu wa Israeli, nomukali hagati heinda yeye. Na ndiyo iplegi ya gaywa mu avana va Israeli. 9Na yavo ava kudza neplegi va li tsielfu makumi gaviri na tsine.
10Na Yahova ya volera Musa, na a vola, 11Finehasi, mwana wa Eleazaru, mwana wa Haruni musalisi, u girunkanyi ubutima bwange bu twulidzwe ku avana va Israeli, kigira ya kendekidzwa nelikendeka lyange hagati havo, kuduka inze mbule kudividza avana va Israeli mu likendeka lyange. 12Kigira yaga u vole, Henza, mmu ha uyu lilagana lyange lyemirembe: 13kandi li la va kuye, noku visukululwi vivye inyima wewe, lilagana lyobusalisi bwemihiga nemihiga; kigira ya li nelikendeka kigira Nyasaye wewe, na ya lombera avana va Israeli kyokukunika ubwoni.
14Na lieta lyomusatsa wa Israeli wiitwa halala na mukali Mumidiani, lya li Zimri, mwana wa Salu, munene wenyumba ya vaguga weihiri ya Simeoni. 15Na lieta lya mukali Mumidiani wiitwa lya li Kozibi, mwana wa Zuru; ya li mutwe gwa avandu venyumba ya vaguga mu Midiani.
16Na Yahova ya volera Musa, na a vola, 17U dambidze Avamidiani, nokuvakuya; 18kigira va dambidza mwinye nobugadi bwavo, bwa va mu gadanga mu inkuva ya Peoru, nomu inkuva ya Kozibi, mwana womunene wa Midiani, amwavo wavo uyu wiitwa ku lidiku lyeplegi mu inkuva ya Peoru.
©Bible Society of Kenya, 1967