Livalidza 23
23
1Na Balaam ya volera Balaki, U nyombakire ubwali butano na buviri, na u nombere hano tsigiriki tsitano na tsiviri, na magondi makole gatano na gaviri. 2Na Balaki ya kola kuli Balaam ya vola; na Balaki na Balaam va haana kihaanwa kyegiriki na kyeligondi likole ku bwali sa bulala. 3Na Balaam ya volera Balaki, U singire hano himbi nekihaanwa kikyo kyokusambwa, na inze nda tsia: namuiia Yahova a ladza ku inze ku lolane; na gosi aga a mannya inze nda ku volera. Naye yanegira ku kigulu. 4Na Nyasaye ya vugana na Balaam: naye ya mu volera, Nombi ubwali butano na buviri, na mbaani kihaanwa kyegiriki na kyeligondi likole ku bwali sa bulala. 5Na Yahova ya vika likuva mu munwa gwa Balaam, na vola, Wirane ku Balaki, na u vole makuva yaga na yaga. 6Naye yirana kuye, na, henza, u singiye himbi ku kihaanwa kikye kyokusambwa, uyu, na avanene vosi va Moabu. 7Naye ya kupa lugano lwilwe, na a vola,
Balaki ya ndeta kutwula Aram,
Mwami wa Moabu ya ndeta kutwula mu vigulu vya Ivugwe:
Hamba, u naamire Yakobo Na hamba u vihirirwe Israeli.
8Nyala ndi kulaama uyu wa Nyasaye u vuli kulaama?
Kandi nyala ndi kuvihirirwa uyu wa Yahova u vuli kuvihirirwa?
9Kigira mmu lolera ha mbeye hano ku intongi yolwanda
Na ha mbeye hano mu vigulu mmu lola:
Henza, va veye avandu ava menyanga veng'ine,
Na si va la validzirwa mu tsihiri.
10Ni bwaha u nyala kuvalidza ulugukyi lwa Yakobo?
Kinga ni bwaha u nyala kuvalidza kidieli kya kane kya Israeli?
Inze, mwoyo gwange nkudze likudza lyomulungi,
Na kiheri kyange ki ve kuli kiheri kikye.
11Na Balaki ya volera Balaam, nkoleye ki, ive? Inze nda ku leta u laame avasigu vange, na, henza, u va gasidzi ligali. 12Ya tivula, na a vola, Si ga ndukira kuhenza ligali kuvola lya Yahova a mbikira mu munwa gwange?
13Na Balaki ya mu volera Mwadza, hamba ku tsie ahandi, ha u nyala kulolera avandu yava; u la lola ku luvega lwekiheri kyavo kyeng'ine, na si u la lola vosi: na u naamire avandu yava ha zana. 14Na ya mu hila kuduka mu mulimi gwa Zofim, kuduka ku intongi ya Pisga, na yombaka bwali butano na buviri nokuhaana igiriki na ligondi likole ku bwali sa bulala. 15Na Balaam ya volera Balaki, U singire hano himbi ku kihaanwa kikyo kyokusambwa, na inze ntsie kulolana na Yahova hala. 16Na Yahova ya vugana na Balnam, na ya mu vikira likuva mu munwa gwigwe, na a vola, Wirane ku Balaki, na u la vola yaga na yaga. 17Naye ya duka kuye, na, henza, U singiye himbi ku kihaanwa kikye kyokusambwa, na avanene va Moabu halala naye. Na Balaki ya mu teva, Yahova u voli ki? 18Naye ya kupa lugano lwilwe, na a vola,
Vuka, Balaki, u hulire;
Ive mwana wa Ziporu, u hurile; inze:
19Nyasaye si a veye mundu, a vole ububehi,
Kandi si a veye mwana womundu, yeganire:
A vole, ma a vule kukola? Kinga u tivuye likuva, na a la vula kulidukidza?
20Henza, mbebeywi lilaga ngasidze:
Na uyu u gasidzi, na inze si nyala kwiranya.
21Si a loli ubudamano mu Yakobo;
Kandi si a loli ubukyamu mu Israeli:
Yahova Nyasaye wewe a veye halala naye,
Na lihanzuka lyomwami li veye hagati havo.
22Nyasaye a va letanga kutwula Egepeti;
A veye netsingulu tsyembongo.
23Ligali si ha li nekikyeno ku Yakobo;
Kinga ubusegetiri ku Israeli:
Kalunu ga la volwa ku Yakobo noku Israeli,
Ni kindu ki kya Nyasaye a koli
24Henza, avandu va vuka kuli king'ang'a kikali,
Na kuli king'ang'a yeginganga mwene:
Si a li gona hasi a luhe a duke kulia kilanye,
Nokunwa masahi ga yavo aviitwa.
25Na Balaki ya volera Balaam, U ta va laama, kandi u ta va gasidza mba. 26Navutswa Balaam ya tivula na a volera Balaki, Si nda ku volera, Gosi ga Yahova a vola, yaga ga ndukira kukola?
27Na Balaki ya volera Balaam, Hamba, kalunu nda ku hiia ahandi; namusia Nyasaye a la yanza u naamire avandu yava ha zana. 28Na Balaki ya hila Balaam na a tsia naye kuduka ku kigulu kya Peoru, ku luvega lu henza ku kyangalangwi. 29Na Balaam ya volera Balaki, U nyombakire hano bwali butano na buviri, na u nombere tsigiriki tsitano na tsiviri, na magondi makole gatano na gaviri. 30Na Balaki ya kola kuli Balaam ya vola, na a haana igiriki na ligondi likole ku bwali sa bulala.
©Bible Society of Kenya, 1967