Livalidza 22
22
1Na avana va Israeli va samula, ni vombaka mahema gavo mu kivala kyekereremo kya Moabu engereka wa Yordani himbi Yeriko. 2Na Balaki mwana wa Ziporu ya lola gosi aga Israeli va kolera Avaamori. 3Na Moabu ya tia avan iu yava ligali, kigira va li avanyingi: na Moabu ya henda mwoyo ligali kigira avana va Israeli. 4Na Moabu ya volera avakulundu va Midiani, Kalunu lihe yili li la komba vindu vyosi, kuli ing'ombe yayanga ubunyasi bwomulimi. Na Balaki mwana wa Ziporu ya li mwami wa Moabu inyinga yeyo. 5Nayeya tuma avatumwa va tsie ku Balaam mwana wa Beoru, kuduka Pethoru, ii veye himbi nomugera, ku kivala kya avana va avandu veve, kumulanga, na a vola, Henza, va veye ho avandu va twula Egepeti: henza, va kuniki mumoni mwelirova, na va menya himbi ku inze. 6Kalunu hamba, mwadza, u naamire avandu yava; kigira va veye netsingulu kuvita inze; mbula nda va guuta, na ku va duye, na nduke kuvakunga kutwula mu kivala yiki; kigira mmanya uyu va u gasidzanga a gasidzangva, na uyu wa u laamanga a laamangwa.
7Na avakulundu va Moabu na avakulundu va Midiani va tsia ni va ginga madanyi gokulagulira mu makono gavo; na va duka ku Balaam, ni va mu volera makuva ga Balaki. 8Naye ya va volera, Mu gone hano ubudiku yibu, na nda mu letera litivula, kuli Yahova a la mbolera: ma avanene va Moabu va menya halala na Balaam. 9Na Nyasaye ya duka ku Balaam, na a mu teva, Ni avandu ki yava ava u veye navo? 10Na Balaam ya volera Nyasaye, Balaki mwana wa Ziporu, mwami wa, Moabu, u leti ku inze avandu, na a vola, 11Henza, avandu va twuli Egepeti, va kuniki mumoni mwelirova: kalunu hamba, u naamire avandu yava; mbula nda nyala kulwana navo, nokuvakunga. 12Na Nyasaye ya volera Balaam, U ta tsia halala navo, u ta laama avandu yava; kigira va gasidzeywi. 13Na Balaam ya vuka mugamba, na a volera avanene va Balaki, Mwirane mu kivala kyenyu; kigira Yahova u suye kumba munwa kutsia halala na mwinye. 14Na avanene va Moabu va twula, ni virana ku Balaki, ni va vola, Balaam u suye kuudza halala na kwinye.
15Kandi Balaki ya tuma avanene, avanyingi kuvita, na avobukumi kuvita avokutanga. 16Na va duka ku Balaam, ni va mu volera, Balaki mwana wa Ziporu, a vola, U ta bugirira ligaywa, mwadza, udze ku inze: 17kigira nda ku kuminya nelidzominywa linene, na likuva lyosi lya u mbolera nda kola: kunangwa, mwadza, hamba u naamire avandu yava. 18Na Balaam ya tivula na a volera avatumekiri va Balaki, Kali Balaki na a va ni ya mba ifetha na ithahabu yokwizula inyumba yeye, si nyala kuvita lwako lwelikuva lya Yahova Nyasaye wange, kuligehidza kinga kulimeda. 19Kunangwa kalunu mwadza, mu linde hano kandi ubudiku yibu, nduke kumanya ga Yahova a la mbolera kandi. 20Na Nyasaye yadza ku Balaam mu budiku, na a mbolera, Avandu yava ni va va ni vadzi kukulanga, u vuke u tsie halala navo; navutswa likuva lya nda ku laga, nilyo lya u la kola lyeng'ine. 21Na Balaam ya vuka mugamba, na a lomba isukiri yeye, na a tsia halala na avanene va Moabu. 22Na ubutima bwa Nyasaye bwaaka ku litsia lilye; na ingelosi wa Yahova yevika ku inzira ku ra muhing'ani kuye. Ya li na a nina ku isukiri yeye, na avatumekiri veve vaviri va li halala naye. 23Na isukiri ya iola ingelosi wa Yahova na a singiye ku inzira, na kivavi kikye kisomole mu mukono gwigwe; na isukiri yeveta ni i leka inzira, ni yingira mu mulimi: na Balaam ya kuya isukiri kugiranya ku inzira. 24Kunangwa ingelosi wa Yahova ya singira ku inzira inyerere hagati hemilimi gyemizabibu, ha lwebo lu veye ku tsimbega tsyombi. 25Na isukiri ya lola ingelosi wa Yahova, na yeduya ku lwebo, na ya minira kirenge kya Balaam ku lwebo: naye ya gi kuya kandi. 26Na ingelosi wa Yahova yisunda hambiri, na a singira ha nyerere ligali, ha ta li nobwiyangu kweveta ku luvega lwomukono mulungi, kinga ku mkono mmosi. 27Na isukiri ya lola ingelosi wa Yahova, na ya gona hasi isi wa Balaam: na ubutima bwa Balaam bwaaka na ya kuya isukiri nempimbo yeye. 28Na Yahova ya kunula munwa gwesukiri, nayo ya volera Balaam, Nku koleye ki, kuduka ive nu u kuya inze hali kavaka? 29Na Balaam ya volera isukiri, Kigira u nkoleye kihenyehenye: kivavi ki va mu mukono gwange nkano nkwiiti kalunu. 30Na isukiri ya volera Balaam, Inze si mbeye isukiri yoyo, ya u ninanga ku inze mu limenya lilyo lyosi kuduka lero? Nda nala kukukolera yaga tsinyinga tsyosi? Naye ya vola, Auwa. 31Hene yaho Yahova ya kunula tsimoni tsya Balaam, naye ya lola ingelosi wa Yahova u singiye ku inzira, naye na a veye na kivavi kisomole mu mukono gwigwe; naye yinaminya mutwe gwigwe na a gwa mammama. 32Naingelosi wa Yahova ya mu volera, Kigira ki u kuyi isukiri yoyo hali kavaka ndi? Henza, ndadza kuva muhing'ani, kigira inzira yoyo i veye inkyamu imbiri wange: 33na isukiri ya ndola, i yeveta ha luvega imbiri wange hali kavaka: nayo i vula kweveta ha luvega nokweleha ku inze, ligali nkano nkwiiti inyinga yiyi, nayo ngi leki mwoyo. 34Na Balaam ya volera ingelosi wa Yahova, Inze nkoli ubwoni; kigira si mmanyi ive u singiye ku inzira kuhing'ana ninze: kunangwa kalunu, nu u va nu u ta yanza inze kutsia, ndirana inyima. 35Na ingelosi wa Yahova ya volera Balaam, U tsie na avandu yava; navutswa aga nda ku volera, nigo aga u la vola geng'ine. Kunangwa Balaam ya tsia halala na avanene va Balaki.
36Na lwa Balaki ya hulira Balaam udzi, ya tsia kumwaganira kuduka ku Lidala lya Moabu, li veye ku luvega lwolwako lwa Arinon, li veye ku kiheri kyolwako. 37Na Balaki ya volera Balaam, Inze si nda tuma avandu nobugulu kukulanga udze? Kigira ki si wadza ku inze? Inze si nyala kukukuminya nelidzominya ligali? 38Na Balaam ya volera Balaki, Henza, mmali kuudza: kalunu mbeye netsingulu kuvola kindu ku vyosi? Likuva lya Yahova a vika mu munwa gwange, nilyo lya nda vola. 39Na Balaam ya tsia halala na Balaki, na va duka ha Kiriathuhuzothu. 40Balaki yiita tsing'ombe na magondi, na ya gi hila ku Balaam, noku avanene ava li halala naye. 41Na ga duka mugamba, Balaki ya vugula Balaam na a tsia naye kwanegira mu kigulu kya Baal; na ha zana ya lola ho avandu yava ku luvega lwavo lwekiheri.
©Bible Society of Kenya, 1967