Livalidza 21
21
1Na Mukanani, mwami wa Aradi, wa menya ku luvega lwa Kusini, ya hulira Israeli yadza ku inzira Atharim; naye ya lwana na Israeli, na a lanya avalala kuvo. 2Na Israeli ya lagana na Yahova, nokuvola, Nu u va nu u vika avandu yava mu makono gange, hene yaho ndononya madala gavo ligali. 3Na Yahova ya hulira mwoyo gwa Israeli, na ya vika Avakanani mu makono gavo; na va vononya halala na madala gavo ligali: na ha zana ha gulikwa Horma.
4Na va samula kutwula mu kigulu kya Horu ku inzira ya Inyanza Inza kanyu, kukumberidza kivala kya Edom: na avandu avene va kudza mwoyo ligali kigira inzira zana. 5Na avandu va hing'ana na Nyasaye, na Musa, nokuvola, Kigira ki mwa kwanegiridza kutwula mu Egepeti, ku kudzere mu kyangalangwi hano? Kigira si ha veye nobukima, na si ha veye namadzi; na myoyo gyetu gyi tamani nobukima yibu ubuhuhu. 6Na Yahova ya tuma tsinzoka tsyomuliru hagati ha avandu, na tsya luma avmdu; na avandu vanyingi va Israeli va kudza. 7Na avandu va tsia ku Musa, nokuvola, Ku koli ubwoni, kigira ku hing'ani na Yahova, na ive; u saale Yahova a twulidze tsinzoka ku kwinye. Na Musa ya saalira avandu. 8Na Yahova ya volera Musa, Welombere inzoka yomuliru, u gi vike ku musala: na ga la va, sa mulala wa lumwa, lwa a gi lola, a la va mwoyo. 9Na Musa ya lomba inzoka yomugasa, na a gi vika ku musala: na ga duka, inzoka ni i va ni i luma mundu ku vosi, lwa henza ku inzoka yomugasa zana, ma a va mwoyo.
10Na avana va Israeli va samula ni va singeridza mahema ha Obothu. 11Kandi va samula kutwula Obothu, ni va singeridza mahema gavo ha lye-abarim mu kyangalangwi kyoluvega lwa Moabu, ku luvega lwevugwe. 12Na kutwula yaho va samula, ni va singeridza mahema gavo mu livona lya Zeredi. 13Kutwula yaho va samula, na va singeridza mahema gavo ku luvega lundi lwa Arinon, gu veye mu kyangalangwi, ki twulanga mu lwako lwa Avaamori: kigira Arinon gu veye lwako lwa Moabu, hagati ha Moabu na Avaamori. 14Kigira yaga ga veye kuvolwa mu kitabu kya amahe ga Yahova,
Vahebu mu Suia,
Na mavona ga Arinon.
15Na kisulungutu kye vivanda
Vi henza ku bumenyi bwa Ari,
Nokuyeka ku lwako lwa Moabu.
16Na kutwula ha zana va samula kutsia ha Beer: ki veye kidaho kya Yahova ya volera Musa, U vungudze avandu halala, na nda va ha amadzi.
17Hene yaho Israeli vimba lwimbu yilu:
U senuke, O kidaho; mu kimbire:
18Kidaho kya vanene va yava,
Kya vakulundu va vandu va hudula,
Na impimbo yobwami, na tsimpimbo tsyavo.
Na kutwula mu kyangalangwi va tsia Matana; 19na kutwula Matana va tsia Nahalieli; na kutwula Nahalieli va tsia Bamothu; 20na kutwula Bamothu va tsia mu livona li veye mu mulimi gwa Moabu, kuduka ku intongi ya Pisga, ki henza ku luvega lwekyangalangwi.
21Na Israeli va tuma avatumwa kutsia ku Sihon mwami wa Avaamori, nokuvola, 22U mbe munwa mbite mu kivala kikyo: si ku la girunkana ha luvega kutsia mu mulimi, kinga mu kizabibu; si ku la nwa amadzi gevidaho: ku la tsia ku inzira yomwami, kuduka lwa ku vita lwako lulwo. 23Na Sihon si ya bugirira kuleka Israeli kuvita mu lwako lwilwe: navutswa Sihon ya vungidza avandu veve vosi halala, na a twulira Israeli mu kyangalangwi, na ya duka ha Jahazu; na ya lwana na Israeli. 24Na Israeli va mu temaga nobwogi bwekivavi, nokuvugula kivala kikye kutwula Arinon nokuduka Jaboku, kali kuduka ku avana va Amonkigira lwako lwa avana va Amon lwa li netsingulu. 25Na Israeli va vugula madala yaga gosi: na Israeli va menya mu madala gosi ga Avaamori, mu Heshibon, na mu tudala twalyo. 26Kigira Heshibon lya li lidala lya Sihon mwami wa Avaamori, wa lwana nomwami wa Moabu wa matsyambiri na ya twulidza kivala kikye kyosi mu makono gege, kali kuduka Arinon. 27Kigira yaga ava volanga mu tsing'ano va vola,
Hambi Heshibon;
Lidala lya Sihon lyombakwe nokudinyeridzwa:
28Kigira muliru gu twula Heshibon
Lumemo lwomuliru lu twula mu lidala lya Sihon:
Lu liye Ari lya Moabu,
Avanene avomu vitumi vya Arinon.
29Bayaye ku ive, Moabu
U divi, O avandu va Kemoshu:
U haani avana avayai veve kuli aviruki,
Na avana avakana veve kutsia mu butugwa,
Kutsia ku Sihon mwami wa Avaamori.
30Kwinye ku va lasi; Heshibon li divi kuduka Dibon,
Na kwinye kwononyi kuduka Nofa,
Li duka kali ku Medeba.
31Kunangwa Israeli va menya mu kivala kya Avaamori. 32Na Musa ya tuma avandu kuluta Jazeri; na va vugula madala galyo, na va kunga Avaamori ava menya yo.
33Na va girunkana ni vanegira ku inzira va Bashan: na Ogu mwami wa Bashan ya va twulira, uyu na avandu veve vosi, kulwana ha Edrei. 34Na Yahova ya volera Musa, U ta mu tia: kigira mmali kumuvika mu mukono gugwo, na avandu veve vosi na kivala kikye; na u la mu kolera kuli wa kolera Sihon mwami wa Avaamori, wa menya ha Heshibon. 35Kunangwa va mu duya, na avana veve avayai, na avandu veve vosi, kuduka si ya tigala mundu kali mulala: na va vugula kivala kikye.
©Bible Society of Kenya, 1967