Livalidza 20
20
1Na avana va Israeli, kali livugana lyosi, lya duka mu kyangalangwi kya Zin mu mweli gwokutanga: na avandu va menya mu Kadesh; na Miriamu ya kudzera yo, na a tebwa yo.
2Na si ha li ho na amadzi gelivugana: navo vevugannya halala kuhing'ana na Musa na Haruni. 3Na avandu va lemba Musa, nokuvola, ni va vola, Nkano kwa kudza lwa avamwavo vetu va kudza imbiri wa Yahova 4Na kigira ki mu leti livugana lya Yahova, nokulivika mu kyangalangwi yiki ku duke kukudza yo, kwinye na mitugu gyetu? 5Na kigira ki mwa kwanegiridza kutwula mu Egepeti, nokukuvika hadamano hano? Si ha veye hobugutsa, kinga makuyu, kinga mizabibu, kinga makomamanga; kandi si ha veye na amadzi gokunwa. 6Na Musa na Haruni va tsia kutwula ha imbiri helivugana, ni va duka ha kiliango kyelihema lyokuvuganira mu, na va gwa mammama: na ubukumi bwa Yahova bwa loleka kuvo. 7Na Yahova ya volera Musa, nokuvola, 8U vugule impimbo, na u vungidze livugana, ive, na Haruni amwavo wowo, na mu volere lwanda imbiri wetsimoni tsyavo, lu duke kuleta amadzi galwo; na u la va letera amadzi kutwula mu lwanda; na ndiyo u la ha livugana amadzi li nwe na mitugu gyavo. 9Na Musa ya vugula impimbo kutwula imbiri wa Yahova, kuli ya mu laga.
10Na Musa na Haruni va vungidza livugana imbiri wo lwanda, naye ya va volera, Kalunu mu hulire, mwinye avahing'ani; ku mu letere amadzi kutwula ku lwanda yilu? 11Na Musa ya ginga mukono gwigwe, nokukuya lwanda nempimbo hali kaviri: na amadzi ga twula manyingi, na livugana lva nwa, nemitugu gyavo. 12Na Yahova ya volera Musa na Haruni, Kigira si mwa suuvira ku inze, kuntakass imbiri wetsimoni tsya avana va Israeli, kigira yaga si mu la leta livugana yili nokulivika mu kivala kya nda va ha. 13Na amadzi yaga, ga veye amadzi ga Meriba; kigira avana va Israeli va hing'ana na Yahova, naye ya va mannya a veye mutakatifu hagati havo.
14Na Musa ya tuma avatumwa kutwula Kadesh kutsia ku mwami wa Edom, Amwavo wowo Israeli a vola ndi, Ive u manya lididikana lyosi lya kwa nyola: 15kuli avaguga vetu va sulunguta Egepeti, na kwa menya mu Egepeti inyinga inene; na Vaegepeti va ku kolera ubudamano, na avaguga vetu: 16na lwa kwanira Yahova, ya hulira mwoyo gwetu, nokutuma ingelosi, na a ku leta kutwula mu Egepeti: na henza, ku veye hano mu Kadesh, lidala lyekiheri kyolwako lulwo. 17Mwadza, u ku he munwa kuvita mu kivala kikyo: si ku la vita mu mulimi, kinga mu kizabibu, kandi si ku la nwa amadzi gevidaho vivyo: ku la londa inzira inene ya mwami; si ku la girunkana kutsia ku luvega lwomukono mulungi, kinga ku luvega lwomukono mmosi, kuduka lwa ku viti lwako lulwo. 18Na Edom ya mu volera, Si u la vita hagati hange, gase nda ku twulira nekivavi. 19Na avana va Israeli va mu volera, Ku lanegira ku inzira inene, kandi ni ku va ni ku nwa amadzi gogo, inze nemitugu gyange, ma nda ku tunga mitungu gyago: u mpe munwa mbite nevirenge vyange, bugira kukola kindi kindu. 20Naye ya vola, Si u la vita mba. Na Edom ya mu twulira na avandu vanyingi, nomukono gwetsingulu. 21Na ndiyo Edom ya sula kuha Israeli munwa kuvita mu tsinzako tsitsye: kunangwa Israeli ya girunkana na mu leka.
22Navo va samula kutwula Kadesh: na avana va Israeli, kali livugana lyosi, va duka mu kigulu kya Horu. 23Na Yahova ya volera Musa na Haruni mu kigulu kya Horu, himbi nolwako lwekivala kya Edom, nokuvola, 24Haruni a la vungidzwa kuva halala na avandu veve; kigira si a lingira mu kivala kya nda ha avana va Israeli, kigira mwa hing'ana na likuva lyange ha amadzi ga Meriba. 25U vugule Haruni na Eleazaru mwana wewe, u va lete mu kigulu kya Horu; 26na u navule Haruni tsingubo tsitsye, na u vike Eleazaru mwana wewe: na Haruni a la vungidzwa kuva halala na avandu veve, na a la kudzera yo. 27Na Musa ya kola kuli Yahova ya mu laga: navo vanegira mu kigulu kya Horu imbiri wetsimoni tsya livugana lyosi. 28Na Musa ya navula Haruni tsingubo tsitsye, na a vika Eleazaru mwana wewe; na Haruni ya kudzera yo ku kigulu: na Musa na Eleazaru va sulunguta kutwula mu kigulu. 29Na livugana lyosi lwa va lola Haruni u kudzi, va syomera Haruni madiku makumi gavaka, kali inyumba yosi ya Israeli.
©Bible Society of Kenya, 1967