Livalidza 19
19
1Na Yahova ya volera Musa na Haruni, nokuvola, 2Yaga namakuva gelilaga lya Yahova ya laga, nokuvola, U volere avana va Israeli, va ku letere ing'ombe iroli inzakanyu, i ta li nembala, i veye indukanu, na i vula kubofwa inira. 3Na mu la gi leta ku Eleazaru musalisi, naye a la gi hila kyova wa hokusosa, na mulala a la giitira imbiri wa musalisi: 4na Eleazaru musalisi a la vugula ku masahi gayo nekidete kikye, nokwuha masahi gayo hali gatano na gaviri ku luvega lwembiri lwelihema lyokuvuganira mu. 5Na mulala a la samba iroli imbiri wewe; lisero lyayo, na inyama yayo, na masahi gayo, na ubose bwayo, a la vi samba: 6na musalisi a vugula musala gwa mutaragwa, na husupo, na inzakanyu, na a la vi ta mu lisambwa lya iroli. 7Hene yaho musalisi a logidza tsingubo tsitsye, nokwisinga mubiri gwigwe mu amadzi, na inyima a lingira mu hokusosa, na musalisi a la va mudamano kuduka mgolova. 8Na uyu u samba iroli a logidza tsingubo tsitsye mu amadzi, nokwisinga mubiri gwigwe mu amadzi, na a la va mudamano kuduka mgolova. 9Na umundu u veye museredze a la ng'uula ligoke lyeroli, nokulivika halahi kyova wa hokusosa; na li la lindirwa livugana lya avana va Israeli kuva amadzi gokwahulanya: li veye kihaanwa kyobwoni. 10Na uyu u ng'uula ligoke lyeroli a logodza tsingubo tsitsye, na a la va mudamano kuduka mgolova: na inkuva yiyi i la va lilaga lyemihiga nemihiga ku avana va Israeli, noku mugeni u menyanga hagati havo.
11Uyu u dira mukudzu gwomundu ku vosi a la va mudamano madiku gatano na gaviri: 12wa zana a letakasa nago ku lidiku lya gavaka, na ku lidiku lya gatano na gaviri a la va museredze: navutswa na a vula kwetakasa ku lidiku lya gavaka, ma ku lidiku lya gatano na gaviri si a la va museredze. 13Ku vosi u dira mukudzu gwomundu u kudzi, na a vula kwetakasa mwene, u vika ubudamano ku lihema lya Yahova; na mundu uyu a lahulwa ku Israeli: kigira amadzi gelyahulanya si ga Iyufwa kuye, a la va mudamano; ubudamano bwibwe bu kiri kuye.
14Yili ni lilaga mundu na a va na a kudzera mu lihema: kuvo vosi sa mulala wingira mu lihema, na kuvo vosi sa mulala u veye mu lihema, a la va mudamano madiku gatano na gaviri. 15Na viju sa kilala ki vula kukunikwa, ki ta li nekikuniku kukyo, ki la va kidamano. 16Ku vosi uyu u veye mu mulimi u dira mundu wiitwa nekivavi, kinga mukudzu, kinga kigumba kyomundu, kinga kilindwa, a la va mudamano madiku gatano na gaviri. 17Na va la vugulira uyu mudamano ku ligoke lyelisambwa lyekihaanwa kyobwoni; na amadzi gomugera ga la tsukanywa nalyo mu kiju: 18na mundu museredze a la vugula ihusupo, nokugivika mu amadzi zana, na a luuha ku lihema, noku viju vyosi, noku avandu ava veye ho, noku uyu wa dira kigumba, kinga uyu wiitwa, kinga mukudzu, kinga kilindwa: 19na museredze a luuha ku mudamano ku lidiku lya gavaka, noku lidiku lya gatano na gaviri: na ku lidiku lya gatano na gaviri a la mu takasa; naye a logidza tsingubo tsitsye, nokwisinga mu amadzi, na a la va museredze inyinga ya mgolova.
20Navutswa mundu a la va mudamano, na a vula kwetakasa, mundu uyu a lahulwa ku livugana, kigira u leti ubudamano mu hatakatifu ha Yahova: amadzi ge lyahulanya si ga lyufwa kuye; uyu a veye mudamano. 21Yili li la va lilaga lya kazozo kuvo: na uyu wuhanga amadzi gelyahulannya a logidza tsingubo tsitsye; na uyu u dira amadzi gelyahulannya, a la va mudamano kuduka mgolova. 22Na ku vyosi kya uyu mudamano a dira ku ki la va kidamano; na mundu u dira kukyo a la va mudamano kuduka mgolova.
©Bible Society of Kenya, 1967