Livalidza 13
13
1Na Yahova ya volera Musa, na a vola, 2U tume avandu, va tsie kuluta kivala kya Kanani kya mbaana ku avana va Israeli ku ihiri sa indala tsya avaguga vavo mu la tuma mundu mulala, sa mulala a veye munene hagati havo. 3Na Musa ya va tuma kutwula mu kyagalangwi kya Parani kuli lilaga lya Yahova: vosi kuvo va li mitwe gya avana va Israeli. 4Na yaga na ameta gavo: ku ihiri ya Rubeni, Shamua, mwana wa Zakuru. 5Ku ihiri ya Simeoni, Shafatu, mwana wa Hori. 6Ku ihiri ya Yuda, Kalebu, mwana wa Jefune. 7Ku ihiri ya Isakari, Igali, mwana wa Yosefa. 8Ku ihiri ya Efiraim, Hoshea, mwana wa Nuni. 9Ku ihiri ya Benjamini Paliti, mwana wa Rafu. 10Ku ihiri ya Zebuloni, Galieli, mwana wa Sodi. 11Ku ihiri ya Yosefa, ga veye kuvola ihiri ya Manase, Gadi, mwana wa Susi. 12Ku ihiri ya Dan, Amieli, mwana wa Gemali. 13Ku ihiri ya Asheri, Sethuri, mwana wa Mikaeli. 14Ku ihiri ya Nafitali, Nahabi, mwana wa Vofisi. 15Ku ihiri ya Gadi, Geueli, mwana wa Maki. 16Yaga nameta ga avandu va Musa ya tuma va tsie kuluta kivala. Na Hoshea, mwana wa Nuni, Musa ya mu gulika Joshua.
17Na Musa ya va tuma va tsie kuluta kivala kya Kanani, na a va volera, Mwanegire ku inzira yiyi ku luvega lwa Kusini, na mwanegire mu tsie mu kivala kyevigulu: 18na mu henze kivala kuli ki veye; na avandu va veye mu, ni va va ni va veye netsingulu, ni va va ni va veye avadedekere, ni va va ni va veye avakekeke, ni va va ni va veye avanyingi; 19kandi kivala kya va menya mu kuli ki veye, ni ki va ni ki veye kilahi kinga kidamano; na madala gavo ga va menya mu, ga veye ndi, ni va va ni va menyi mu mmasa kinga mu tsingaga; 20na kivala kyene kuli ki veye, ni ki va ni ki veye kinolu kinga ki veye kidamano, ni ki va ni ki veye nemisala naho mba. Na mwinye mu ve nobuluviriri, nokuleta ku makuyu gekivala. Na inyinga yiyo ya li inyinga yelitanga kwenga lyamazabibu.
21Kunangwa vanegira, ni va luta kivala kutwula mu kangalangwi kya Zin kuduka Rehobu, kuduka hokwingira Hamathu. 22Na vanegira ku luvega lwa Kusini, nokuduka Hebironi; na Ahiman, na Sheshai, na Talmai, avana va Anaki va li yo. (Hebironi lyombakwa mihiga gyitano na gyiviri imbiri wa Zoan mu Egepeti.) 23Navo va duka mivona lya Esikoli, na va kalaga yo ulusia lwa muzabibu, lwa li nekisakanyi kilala kya mazabibu, ni va ki gingira ku musala hagati ha vaviri; na va leta kandi ku makomamanga noku makuyu. 24Ha zana ha langwa livona lya Esikoli, kigira kisakanyi kyamazabibu kya avana va Israeli vaagula ho.
25Na inyima wa madiku makumi gane, virana kutwula mu liluta kivala. 26Na va tsia kuduka ku Musa na Haruni, noku livugana lyosi lya avana va Israeli, kuduka mu kyangalangwi kya Parani, ha Kadesh; na va va letera makuva, noku livugana lyosi, na va va mannya makuyu gekivala. 27Kandi va mu volera, nokuvola, Kwa duka mu kivala kya wa ku tuma mu; na ligali ki veye kivala ki gangulukanga maveere nobwuki; na yaga ga veye makuyu gakyo. 28Navutswa avandu ava menya mu kivala va veye netsingulu, na madala ga veye netsingaga, na ga veye manene ligali: na kandi kwa lola yo avana va Anaki. 29Amaleki va a menya mu kivala kya Kusini; na Avahiti, na Vajebusi, na Vaamori, va menyanga mu kivala kyevigulu; na Avakanani va menya ku luginga lwenyanza, noku luginga lwa Yordani.
30Na Kalebu ya kiring'annya avandu imbiri wa Musa, na a vola, Gendi, kwanegire kalunu ndi, nokugumira kivala; kigira kwinye ligali ku nyala kukiguuta. 31Navutswa avandu avanegira halala naye va vola, Kwinye si ku nyala kwanegira kutsia kulwana na avandu yavo mba; kigira va veye netsingulu kuvita kwinye. 32Na va letera avana va Israeli makuva madamano gekivala kya va luta, ni va vola, Kivala kya kwa vita hagati hakyo kukiluta, ki veye kivala ki miranga avandu ava menyanga mukyo; na avandu vosi va kwa lola mu va veye avandu avatambi ligali. 33Na ha zana kwa lola ho imindu avana va Anaki, ava twula ku imindu: na kwinye avene kwelola kuva kuli madede, na kwinye kwa li ndiyo imbiri wavo.
©Bible Society of Kenya, 1967