Livalidza 12
12
1Na Miriamu na Haruni va monya Musa kigira mukali Mukushi wa ya kwa; kigira ya hila mukali Mukushi. 2Na va vola, Ligali Yahova u volerani na Musa yeng'ine? Si a volerani nekwinye kandi? Na Yahova ya ga hulira. 3Mundu uyu Musa ya li muhokya ligali, kuvita avandu vosi ava li ku lirova.
4Nonoho Yahova ya volera Musa, na Haruni, na Miriamu, Mu twule mwinye vavaka, mu tsie mu lihema lyokuvuganira mu. Navo vavaka va tsia. 5Na Yahova yika munara gwelilesi, na a singira ha kiliango kya Lihema, na a langa Haruni na Miriamu; navo vombi va twula. 6Na ya va volera, Mu hulire kalunu makuva gange: na a va na a veye ho muprofeti hagati henyu, inze Yahova ndelolekidza kuye mu malola, na nda volerana naye mu maloto. 7Mutumekiri wange Musa si a veye ndiyo; a veye musuuvirifu mu inyumba yange yosi: 8na inze nda volerana naye munwa na munwa, kali havulavu, si ga veye ku livola lya hamwamu; naye a la lola lifwana lya Yahova: kunangwa kigira ki si mwa tia kuvola limonya ku mutumekiri wange, Musa?
9Na ubutima bwa Yahova bwaaka kuvo; naye ya tsia. 10Na lilesi lya twula ku Lihema; na henza, Miriamu ya li nobugere, kuli likonza: na Haruni ya henza Miriamu, na henza ya li nobugere. 11Na Haruni ya volera Musa, O, mwami wange, mwadza, u ta vika ubwoni yibu ku kwinye, kigira ku koli agobusiru, kigira ku koli ubwoni. 12Mwadza, u ta mu leka a ve kuli mukudzu wenyama yomhiri gwigwe i libwa kidonye inyinga ya twula mmunda mwa mama wewe. 13Na Musa ya lira ku Yahova, na a vola, O Nyasaye, u mu honye, mwadza. 14Na Yahova ya volera Musa, Dada uewe na a va na a tudza amate mumoni mwimwe, si a la va netsisoni madiku gatano na gaviri? Leka a bofwe kyova wa hokusosa madiku gatano na gaviri, na inyima wa yaga a la letwa mu kandi. 15Na Miriamu ya bofwa kyova wa hokusosa madiku gatano na gaviri: na avandu si va samula kuduka inyinga ya Miriamu ya letwa mu kandi.
16Na inyima avandu va samula kutwula Hezarothu, ni vombaka mahema gavo mu kyangalangwi kya Parani.
©Bible Society of Kenya, 1967