Livalidza 11
11
1Na avandu va li kuli avamonyi, ni va vola ubudamano mu amatu ga Yahova: na lwa Yahova ya bu hulira, ubutima bwibwe bwaaka na muliru gwa Yahova gwaaka hagati havo, na gwa samba mu tsinzako tsyetsindulu tsya hokusosa. 2Na avandu va lira ku Musa; na Musa ya saala ku Yahova, na muliru gwa sima. 3Na lieta lya ha zana lya langwa Tabera, kigira muliru gwa Yahova gwaaka hagati havo.
4Na yavo avasangi ava li hagati havo, va li nelikayirwa linene: na avana va Israeli, navo kandi va lira ni va vola, Ni bwaha u li ku ha inyama ku lie? 5Kwidzulitsanga tsisudzi, tsya kwa litsanga vutswa mu Egepeti; na vitango, na mahondo, na vitunguu vinyerere, na vitunguu vyene, na vitunguu sumu: 6navutswa kalunu myoyo gyetu gyi niyaye; si ha veye nekindu kali kilala, navutswa imana yiyi kyokuhenza ku. 7Na imana zana ya leng'ana nobugutsa bwovolo, na liloleka lyayo lya li kuli ihula. 8Na avandu va vodonkana ni va gi vungidza, ni va gi siyera ku tsing'ina, kinga va gi duyira mu vinu, na va gi dekera mu tsinyingu, ni va lomba ubukima: na ubunolu bwayo bwa li kuli maguta mahya. 9Na lwa lime lyama mu budiku ku hokusosa, imana ya gwa kulyo.
10Na Musa ya hulira avandu va liranga mu bwiko bwavo bwosi, sa mulala ha kiliango kyelihema lilye: na ubutima bwa Yahova bwaaka ligali; I na Musa kandi ya vihirirwa. 11Na Musa ya volera Yahova, Kigira ki u koleye mutumekiri wowo ubudamano? Na kigira ki nda vula kunyola tsimbabasi imbiri wetsimoni tsitsyo, kuduka kuvika ku inze musigo gwa avandu yava vosi? 12Ninze wa verekidza avandu yava vosi? Ninze wa vivula, ive u duke kumbolera, U va ginge mu kiritu kikyo, kuli dada u leranga mwana u nunanga, kuvadukidza mu kivala kya wisuhira avaguga vavo? 13Na nyola haliha inyama yokuha avandu yava vosi? Kigira va lira ku inze, ni va vola, U ku he inyama ku lie. 14Inze tsyeng'ine si nyala kuginga avandu yava vosi, kigira va veye musigo muliduhu kuvita gwa nyala. 15Nu u va nu u nkolera ndiyo, u nziite ligali, mwadza, ni mba ni nyoye tsimbabasi imbiri wetsirnoni tsitsyo; mbule kulola ubudamano bwange.
16Na Yahova ya volera Musa, U vugannye ku inze avandu makumi gatano na gaviri ku avakulundu va Israeli, ava u manya va veye avakulundu va avandu, avanyampara kuvo; na u va lete ku lihema lyokuvuganira mu, va singire yo halala na ive 17Na inze ndika nokuvolerana nive ha zana: na nda vugula ku Roho u veye ku ive, nokuvika kuvo, navo va Ia ginga musigo gwa avandu halala nive, ive u vule kuguginga weng'ine. 18Na u volere avandu, Mwetakase avene kwetegeka mugamba, na mu Ia lia inyama; kigira mwa lira mu amatu ga Yahova, nokuvola, Ni bwaha a la ku ha inyama ku lie? Kigira kwa li nobulahi mu Egepeti: kigira yaga Yahova a la mu ha inyama, na mu la lia. 19Si mu la lia lidiku lilala, kinga madiku gaviri, kinga madiku gatano, kinga madiku likumi, kinga madiku makumi gaviri, 20navutswa mu la lia mweli gwosi, kuduka inyama i twulira mu amolo genyu, na mu la gi lega; kigira mwambakani Yahova u veye hagati henyu, na mu liri imbiri wewe, ni mu vola, Kigira ki kwa twula Egepeti? 21Na Musa ya vola, avandu ava mbeye hagati havo, va veye tsielfu tsimia tsitano na indala, ava gendanga nevirenge; na ive u voye, Nda va ha inyama, va duke kulia mweli gwosi. 22Vyayo vyamagondi na vyetsing'ombe vi litiirwa yava vigutidzwe? 23Na Yahova ya volera Musa, Mukono gwa Yahova gwimbihidzwa? Kalunu ive u la lola likuva lyange ni li va ni li duka ku ive, naho li la vula kuduka.
24Na Musa ya twula, na a volera avandu makuva ga Yahova: na ya vugannya avandu makumi gatano na gaviri ku avakulundu va avandu, na ya va vika tsimbega tsyosi kukumbiridza Lihema. 25Na Yahova yika mu lilesi, na a mu volera, na a vugula ku Roho wa li ku Musa, na a mu vika ku avakulundu makumi gatano na gaviri: na ga duka, lwa Roho yika kuvo, va profeta, navutswa si va kola ndiyo kandi.
26Navutswa avandu vaviri va tigala mu hokusosa, lieta lya mulala lya li Elidadi, na lieta lya wundi lya li Medadi: na Roho yika kuvo; navo va li ku yavo ava ng'odwa, navutswa si va twula kutsia ku Lihema; navo va profeta mu hokusosa. 27Na musoleli ya nyagula kutsia kuvolera Musa, na a vola, Elidadi na Medadi va profeta mu hokusosa. 28Na Joshua mwana wa Nuni, mutumekiri wa Musa, mulala ku avandu veve avatovole, ya tivula na a vola, O mwami wange, Musa, u va gaye. 29Na Musa ya mu volera, U veye nelikendeka kigira inze? Nkano avandu vosi va Yahova va veye avaprofeti, nkano a vike Roho wewe kuvo 30Na Musa ya tsia kwingira mu hokusosa, mwene na avakulundu va Israeli.
31Na imbuudza ya twula ku Yahova, ni i leta tsisindu kutwula ku inyanza, na ya tsi leka kuyera himbi na a hokusosa, kuli lugendo lwelidiku lilala ku luvega vilu, na lugendo lwelidiku lilala ku iuvega lundi, ku tsimbega tsyosi tsya hokusosa, na tsya duka kuli kigero kya makono gaviri igulu wekivala. 32Na avandu va vuka, na mbasu yigwo gwosi, na ubudiku yibwo bwosi, na gundi mugamba gwosi, na va vungidza tsisindu: uyu wa nyola tsinkekeke kuvita avandi ya nyola ligera lyetsihomeri likumi: navo va tsi vagala tsimbega tsyosi tsya hokusosa tsi ve tsyavo avene. 33Lwa inyama ya tigala mu amino gavo, na va kikiri kulia, ubutima bwa Yahova bwaaka ku avandu, na Yahova ya kuya avandu nelikuya linene ligali. 34Na lieta lya ha zana lya gulikwa Kibirothu-hatava, kigira va ta ho avandu ava kayirwa. 35Kutwula Kibirothuhatava avandu va samula kutsia Hazerothu: na va menya Hazerothu.
©Bible Society of Kenya, 1967