Mika 1
1
1Yili ni likuva lya Yahova lya duka ku Mika Mumorashiti mu madiku ga Jotham, na Ahazu na Hezekia, ava li avami va Yuda, lya ya lola ku Samaria na Yerusalemi.
2Mu hulire mwinye avandu vetsihiri tsyosi; u hulire, ive lirova, na vindu vyosi vi veye mu: Mwami Yahova a lolekidze ku mwinye, uyu Mwami mu litempeli lilye litakatifu. 3Kigira, henza, Yahova yadzanga kutwula hango hehe, na a lika hasi, nokuduvaga hadiguluku helirova. 4Kandi vigulu vi la yinguka isi wewe, na mavona ga latanywa, kuli masang'asa imbiri womuliru, kuli amadzi ga sundulwa ku yongovera ku kisulungutu. 5Kigira li hyolo lya Yakobo yaga gosi ga veye ho, na kigira ubwoni bwenyumba ya Israeli. Lihyolo lya Yakobo li veye ki? Si li veye Samaria? Kandi hadiguluku ha Yuda ni kindu ki? Si ha veye Yerusalemi? 6Kigira yaga nda kola Samaria kuva kuli kitumi mu mulimi, na hokusimika mizabibu; na nda syuva magina galyo mwivona, nda kunula mise gyalyo gyi ve ku bulavu. 7Vifwananyi vivye vya vadzwa vi la duvulwa vyosi, na madanyi galyo ga la sambwa nomuliru, na vifwananyi vyalyo vyosi nda vi kola hatswa; kigira ya vungidza madanyi ga malaya, na va lirana ku madanyi ga wamalaya.
8Kigira yaga nda lira nokukupa tsikwili; nda tsia yiyi neyiyi ni mbeye kyahonyo; nda sama kuli kibwe; nda syoma kuli liudo. 9Kigira tsing'oma tsitsye si tsi nyala kuhona; kigira ga duki kali Buyuda; ga duki ku kiribwa kyavandu vange, kali ku Yerusalemi. 10Mu ta vola yaga mu Gathu, ligali mu ta lira mba: ha Bethleafara ng'omagomi mu lugukyi? 11Mu vite, mu tsie kyahonyo netsisoni u menyanga ha Shafira: na uyu u menyanga Zaanan si a twula; lilira lya Bethezeli li la mu nyaga mudigiru gwalyo. 12Kigira u menyanga Marothu a lindiriranga kunyola bulahi; kigira ubudamano bwiki kutwula ku Yahova kuduka ku kiribwa kya Yerusalemi. 13Boha ligari ku tsiparasi tsyetsimbiru, O u menyanga ha Lakishi: uyu wa li litanga lyobwoni ku mukana mugima wa Zioni; kigira mahyolo ga Israeli ga loleka mu ive. 14Kigira yaga u la haana ku Moreshethugathu madanyi gokulekana naye: tsinyumba tsya Akiziba tsi la va kindu kyobu gadi ku avami va Israeli. 15Nda manya ndete ku ive, u menyanga Maresha, uyu a li ku vugula: ubukumi bwa Israeli bu la duka Adulam. 16Welombere kyavusu, u vege lisu lilyo kigira avana va yanzidzanga ive: u galaminye kyavusu kikyo kuli indidzu; kigira va tsia mu butugwa kutwula ku ive.
Currently Selected:
Mika 1: MBE
Highlight
Share
Compare
Copy
Want to have your highlights saved across all your devices? Sign up or sign in
©Bible Society of Kenya, 1967
