Matayo 6
6
1Henze bulahi, mu ta kola bulungi bwenyu imbiri wa vandu, va mu lole: kigira ni mu kola ndiyo, si mu nyala kunyola madanyi ku Dada wenyu u veye migulu.
2Lwa u twulidza tsisadaka, u ta kupa kisiliva imbiri wowo, kuli avagadi va kola mmasomero na ku tsinzira, avandu va vidzominye. Ligali mmu volera, Va mali kunyola madanyi gavo. 3Navutswa lwa u twulidza tsisadaka, u ta leka mkono mmosi gugwo gu manya vyomkono mulungi gu kola: 4tsisadaka tsitsyo tsi ve mbuvisi: kandi Dada wowo u lola mbuvisi a la ku ha madanyi.
5Kandi lwa mu saala, mu ta va kuli avagadi: kigira va yanza kusingira nokusaala mmasomero na mbwavakaniru bwetsinzira, avandu va va lole. Ligali mmu volera, Va mali kunyola madanyi gavo. 6Navutswa ive, nu wenya kusaala, wingire munyumba yoyo, nu u mali kuhana kiliango, u saale Dada wowo u vula kulolwa, na Dada wowo a lola mbuvisi a la ku ha madanyi. 7Nive mu lisaala, u ta vola amakuva manyingi vutswa kuli Tsihiri: kigira va ganagana va la hulirwa kigira amakuva gavo manyingi. 8Mu ta fwa nana navo mba: kigira Dada wenyu a manya vindu vya mu daka, mu kikiri kumusaala. 9Mwinye mu saale ndi; Dada wetu u veye migulu lietalilyolidzominywe. 10Ubwami bubwo budze. Ubulaliri bubwo bu kolwe mu lirova muno kuli bu kolwa migulu. 11Lero u ku he vyokulia vyetu vya kase. 12U ku samehe magovi getu, kuli kwinye ku sameha avamagovi getu. 13U ta ku hila mu ligeridzwa, navutswa u ku twulidze ku mudamano. Kigira ubwami, netsingulu, nobukumi ni vivyo mihiga nemihiga. Ameni. 14Kigira mwinye ni mu sameha vandu mahyolo gavo, Dada wenyu womigulu a la mu sameha. 15Navutswa mwinye ni mu ta sameha avandu mahyolo gavo, Dada wenyu si a nyala kumusameha ubwoni bwenyu.
16Kandi lwa mu honga lilia, mu ta va kuli avagadi, va veye netsimoni tsyokuverera: kigira va kunnya mtsimoni tsyavo, va loleka ku vandu va honga lilia. Ligali mmu volera, Va mali kunyola madanyi gavo. 17Navutswa ive, nu u honga lilia, wivake maguta mmutwe, wisave mmoni; 18u ta loleka ku vandu u hongi lilia, navutswa u loleke ku Dada wowo u veye mbuvisi: na Dada wowo u lola mbuvisi, a la ku ha madanyi.
19Mu tivikira tsikiba mu lirova, he tsisere netsisisinia tsyononnya kandi ha avivi vigulira ni viba: 20navutswa mwivikire tsikiba migulu, he tsisere netsisinia tsi tononnya, kandi ha avivi va tigulira ni viba: 21kigira ha tsikiba tsitsyo tsi ve yo, kandi mwoyo gugwo gu la va ho. 22Itaya yomubiri ni imoni: imoni yoyo ni i veye ing'ima, mubiri gugwo gwosi gu lizula bulavu. 23Navu tswa imoni yoyo ni i veye indamano, mubiri gugwo gwosi gu lizula kisundi. Ubulavu bu veye mu ive ni bu veye kisundi, kisundi ki veye kinene ndi 24Si ha li nomundu a nyala kutumekira avami vaviri: kigira a la dunyira mulala, na a yanza wundi; kinga a la yanza mulala nowundi a mlega. Si mu nyala kutumekira Nyasaye nobutugi. 25Yiki ni kigira mmu volera, Mu ta henda mwoyo ku liva mwoyo lyenyu, vya mu li lia kinga vya mu li nwa; kinga ku mubiri, vya mu li vika. Liva mwoyo si li vita vyokulia, nomubiri si gu vita tsingubo? 26Mu henze amanyonyi ge igulu, si ga taga, kandi si ga gesa, kandi si ga tera mkidera; na Dada wenyu womigulu a ga lihidzanga. Mwinye si mu veye avalahi ligali kuvita yaga? 27U li ha ku mwinye u nyala nokuhenda mwoyo kwesonga ku butambi bwibwe mkono mulala? 28Kigira ki mu henda mwoyo ku tsingubo? Mu ganagane amadanya gemilimi, kuli ga viruka; si ga kola miyinzi, kandi si ga sita: 29navutswa mmu volera, Solomoni, lwa ya li mu bukumi bwibwe bwosi, si yavalwa ingubo kuli lilala ku yaga. 30Nyasaye na a va ni yavala ndiyo ubulimu bwemilimi, bu veye ho lero, na mugamba bu tebwa mkisambiru, nasindi a lavala mwinye, Mwinye avelisuuvira likekeke? 31Kunangwa mu ta henda mwoyo, ni mu vola, Ku la lia ki? Kinga, Ku la nwa ki? Kinga, Ku li yavala ki? 32Kigira vindu yivi vyosi Tsihiri tsyenyanga; kigira Dada wenyu womigulu a manya mu daka vindu yivi vyosi. 33Navutswa mu tange kwenya ubwami bwibwe, nobu lungi bwibwe; na yivi vyosi mu la dasirwa. 34Kunangwa mu ta henda mwoyo ku mugamba gundi: kigira mugamba gu la henda mwoyo namakuva gagwo. Ubudamano bwelidiku bu dukana nelidiku lyene.
Currently Selected:
Matayo 6: MBE
Highlight
Share
Compare
Copy
Want to have your highlights saved across all your devices? Sign up or sign in
©Bible Society of Kenya, 1967
