Matayo 13
13
1Ku lidiku yilyo, Yesu ya twula mu inyumba ni yikala ku luginga lwenyanza. 2Vya vungidzwa kuye viduma vinene ndi, ya manya na a nina mu liato ni yikala; na kiduma kyosi kya singira ku luginga. 3Na a va volera amakuva manyingi mu tsing'ano, na a vola, Henza, mumidzi ya twula na a tsia kumidza. 4Lwa ya midza, bulala bwa gwa ku inzira ha luvega, na manyonyi gadza ni ga bu vodza. 5Na bundi bwa gwa ku marova goku magina, ha bwa nyola marova makekeke: nonoho bwa mera kigira si bwa li namarova manene: 6liuva lwa lya twula bwa niala; kigira si bwa li nemiri, ni bwuma. 7Na bundi bwa gwa mma fwa; na mafwa ga viruka ni ga bu kunika. 8Na bundi bwa gwa mmarova malahi, ni bwama, bulala bwama mia na bundi makumi gatanu neliiala, na bundi makumi gavaka. 9U veye namatu gokuhulira, a hulire.
10Avegidzwi vadza ni va mbolera, Kigira ki u va kupa tsing'ano? 11Naye ya tivula na a va volera, Mwinye mu hebeywi kumanya ama kuva ga viswa gobwami bwomigulu, navutswa yava si va hebeywi ndiyo. 12Kigira ku vosi u veye navyo a la hebwa, a la medwa: navutswa ku vosi u ta li navyo, a la nyagwa kali vya a veye navyo. 13Yiki ni ki gira mba kupa tsing'ano; kigira lilola va vula kulola, lihulira va vula kuhulira, kandi si va manya. 14Kandi kuvo ga kolwa liprofeta lya Isaya li vola
Lihulira mu la hulira, si mu limanya ligali;
Kandi lihenza mu la henza, si muli lola ligali:
15Kigira mwoyo gwavandu yava gu gwiye mudamano,
Kandi amatu gavo si ga hulira bulahi
Va hannyi tsimoni tsyavo;
Gase va la lola netsimoni tsyavo,
Nokuhulira namatu gavo
Nokumanya mmwoyo gwavo,
Nokweganira,
Na inze mba honnye.
16Navutswa tsimoni tsyenyu tsi veye nobugasu, kigira tsi lola; namatu genyu, kigira ga hulira. 17Kigira ligali mmu volera, avaprofeti vanyingi navandu valungi venya kulola vindu vya mu lolanga, ni va vula kuv lola nokuhulira vindu vya mu hulira, ni va vula kuvihulira. 18Mu hulire lugano lwomumidzi. 19Mulala lwa a hulira likuvalyobwami, na a vula kulimanya, mudamano yadza na a mu nyaga yili lya a ve kumidzwa mmwoyo gwigwe. Uyu niye wa midzwa ku inzira ha luvega. 20Na uyu wa midzwa mmarova goku magina, uyu niye u hulira likuva, kandi nonoho a li vugula nobuyanzi; 21navutswa si a li nemiri muye, ma a dinya hakekeke; navutswa kivi kinga lidambidzwa lwa li duka kigira likuva, nonoho yikigitala. 22Na uyu wa midzwa mmafwa, uyu niye u hulira likuva, navutswa madidikano gekivala, nobugadi bwobutugi, bu kunika likuva, naye a vula kwama. 23Na uyu wa midzwa mmarova malahi, uyu niye u hulira likuva na a li manya; ni yama ligali, avalala va kola mia, navandi makumi gatanu nelilala, navandi amakumi gavaka.
24Kandi ya kupa lugano lundi, na a va volera, Ubwami bwomigulu bu fwanana nomundu u midza bugutsa bugasu mmulimi gwigwe: 25navutswa inyinga avandu va gona tsindolo, musigu wewe ya duka na a midza amavanze hagati hengano, na a tsia. 26Navutswa amatu lwa ga viruka ni gama, maku mavanze kandi ga loleka. 27Avatugwa vomwene inyumba vadza ni va mbolera, Mwami, si wa midza bugutsa bulahi mmulimi gugwo? Gwa nyola ha li ha ma vanze? 28Na a va volera, Mundu musigu wa kola yaga. Avatugwa va mbolera, U yanza ku tsie kugavungi dza? 29Navutswa ya va volera, Auwa, gase mu liha ingano inyinga mu vungidza mavanze. 30Mu leke vyombi vi viruke halala vi duke mu ligesa: ku ligesa nda volera avagesi, Mu tange kuvugula amavanze, mu ga bohe tsinkanya kugasamba; navutswa mu tera ingano mu kideera.
31Ya va kupa lugano lundi, na a vola, Ubwami bwomigulu bu fwanana nolugutsa lwelisatsi, lwomundu ya vugula na a taga mu mulimi gwigwe: 32nalwo nu lukekeke ku bugutsa bwosi; navutswa lwa lu mera li viruka li vita tsingutsa tsyosi, li gwa musala, kuduka manyonyi ge igulu gadza kugunza mu tsisya.
33Ya va kupa lugano lundi; Ubwami bwomigulu bu fwanana namamera gomkali ya vugula na a ga visa mu migero gyivaka gyobusie bwa luha ni bu gwa mamera bwosi.
34Vindu yivi vyosi Yesu ya volera viduma mutsing'ano; kandi bugira lugano si ya va volera kindu. 35Ga duke aga volwa nomunwa gwomuprofeti, na a vola,
Nda kunula munwa gwange kukupa tsing'ano;
Nda vola vindu vya yiswa kutwula inyinga yelirova lya lombwa.
36Hene yaho ya leka viduma na a tsia mu inyumba. Na vegidzwi veve vadza kuye, ni va vola, U ku vuulire lugano lwamavanze gomulimi. 37Ya tivula na a vola, Wa midza bugutsa bulahi nu Mwana wa Adamu; 38mulimi na vomulirova, na bugutsa bulahi, yava na vana vobwami; na mavanze na vana vomu damano; 39na musigu wa ga midza ni Setani: na ligesa ni kiheri kyenyinga; na vagesi ni tsingelosi. 40Kuli mavanze ga vungidzwa halala ni ga sambwa mu muliru, ga la va ndiyo mu kiheri kyenyinga yiyi. 41Mwana wa Adamu a la tuma tsingelosi veve, navo va la vungidza mu bwami bwibwe vindu vyosi vikigitalidza, navo ava kola ubwoni, 42va va te mu kisambiru: li la va ho lilira nokudyedyeidza amino. 43Hene yaho avalungi va la ng'ereng'ana kuli liuva mu bwami bwa Dada wavo. U veye namatu gokuhulira, a hulire.
44Ubwami bwomigulu bu fwanana na kiba ya viswa mu mulimi; yomundu lwa a nyola ma a visa; mu buyanzi bwibwe a tsia na a gulidza vyosi vya a veye navyo na a gula mulimi yigwo.
45Kandi, ubwami bwomigulu bu fwanana nomuguli wenya tsilulu tsindahi: 46naye lwa a mali kunyola lulu lulala lwe tsishilling tsinyingi, ya tsia kugulidza vyosi vya a veye navyo na a lu gula.
47Kandi, ubwami bwomigulu bu fwanana nomuluvo gwinikwa mu inyanza, ni gu vugula tsisudzi ku tsing'ano tsyosi: 48lwa gwizula va gu leta ku luginga, vikala, ni va vika tsindahi mu vihinda, navutswa tsindamano va ta. 49Gu la va ndiyo mu kiheri kyenyinga yiyi. Tsingelosi va la twula va tsie kutwulidza vadamano mu valungi, 50va va te mu kisambiru: li la va ho lilira nokudyedyeidza amino.
51Mu huliye vindu yivi vyosi? Va mu volera Yee, Mwami. 52Naye ya va voiera, Yiki ni kigira ku mung'odi samulala u koleywi mwegidzwi mu bwami bwomigulu, a veye kuli mundu mwene inyumba, a twulidza mu kiba yeye vindu vihya na vindu vikulu.
53Yesu lwa ya mala kukupa tsing'ano yitsi tsyosi ya twula ho. 54Na lwa a duka mu kivala kikye ya vegidza mu lisomero lyavo va duka va genya ni va vola, Mundu uyu ya twulidza ha li ha ubugeeri yibu nemiyinzi gyetsingulu yigyi? 55Si a li mwana wombadzi? Mama wewe si a langwa Maria? Nuvamwavo veve si va li Yakobo na Yosefa na Simoni na Yuda? 56Navabotso veve, si va li halala nekwinye? Kunangwa mundu uyu a nyoye ha li ha vindu yivi vyosi? 57Ku, va mu vihirirwa. Navutswa Yesu ya va volera, Muprofeti si a vula kwidzominywa navutswa mu kivala kikye, nomunyumba yeye heng'ine. 58Naye si ya kola yo miyinzi minene minyingi, kigira litasuuvira lyavo.
Currently Selected:
Matayo 13: MBE
Highlight
Share
Compare
Copy
Want to have your highlights saved across all your devices? Sign up or sign in
©Bible Society of Kenya, 1967
