Matayo 14
14
1Inyinga yeyo Herodi mtetrarka ya hulira amakuva ga Yesu, 2na a volera avatumwa veve, Uyu niye Yohana Mbatidzi: u simuguki kutwula mbakudzi; yiki ni kigira tsingulu yitsi tsi veye muye. 3Kigira Herodi ya gumira Yohana, na a mboha, na a mbika munyumba yavahambe, ya mboha kigira Herodiya mka Filipu amwavo wewe. 4Kigira Yohana ya mbolera, Ni mugyiru ive kuva naye. 5Lwa yenya kumwiita, ya tia kiduma, kigira va li va vola a veye mprofeti. 6Navutswa lwa lya duka lidiku lya Herodi yivulwa, mkana wa Herodiya ya vinira mugati, na a yanzidza Herodi. 7Yisuha na a mlaga kumuha ku vyosi kya a teva. 8Mama wewe ya mgerehidza, na a voia, Mbeera mutwe gwa Yohana Mbatidzi ku ludigi. 9Mwami ya verera; navutswa kigira ku lisuha lilye, kandi kigira avikaye ku vyokulia halala naye ya vola, a hebwe; 10ya tuma mundu na a kalaga mutwe gwa Yohana munyumba yavahambe. 11Mutwe gwigwe gwa leterwa ku ludigi, mkana ya hebwa na a hilira mama wewe. 12Avegidzwi veve vadza ni va vugula mubiri gwigwe, ni va gu ta; ni va tsia ni va volera Yesu.
13Yesu lwa ya hulira ya twula ho na a nina mbwato na a tsia ha vandu va ta li. Viduma lwa vya hulira vya mu londa ne virenge kutwula mu madala. 14Ya twula mbwato na a lola kiduma kinene, na a va vera tsimbabasi, na a va honnyira avalwaye vavo. 15Lwa gwa duka mgolova, avegidzwi veve vadza kuye vavola, Hano si ha li navandu, kandi inyinga i viti; u volere viduma vi tsie mu tudala vyegulire vyokulia. 16Navutsva Yesu ya va volera, Si va li namakuva gokutsia; mwinye mba he vyokulia. 17Navo va mu volera Ku veye nemilango gyitano gyeng ine hano, netsisudzi tsiviri. 18Na a vola, Ndetere yivyo hano. 19Ya haana munwa viduma vikale hasi mu kiguti; na a vugula milango gyitano netsisudzi tsiviri na a henza migulu, ya vi gasidza, na a megannya na a ha avegidzwi, navegidzwi va ha viduma. 20Va lagira vosi ni viguta: ni va vungidza ama donye aga tigala, vihinda likumi na viviri vi zuye. 21Navo va lagira va li tsielfu tsitano vasatsa vong'ine, bugira livalidza avakali navana.
22Nonoho ya viiriridza avegidzwi va nine mbwato, nokwimira imbiri wewe kutsia engereka, a luha a duke kuvolera viduma vi tsie. 23Lwa ya mala kuvolera viduma vi tsie, yanegira mu kigulu yeng'ine kusaala: lwa bwa duka mgolova ya li ho yeng'ine. 24Bwato bwa li hagati henyanza, bwa kupidzwa kivi ni viguvuli; kigira imbuudza ya yingoyidza bwato. 25M u bulindi bwa kane bwobudiku Yesu yadza kuvo, na a genda ku inyanza. 26Avegidzwi lwa va mu lola na a genda ku inyanza, va henda myoyo, ni va vola, Ni kigingi; ni va kupa tsikwili kigira ubutii. 27Nonoho Yesu ya va volera, na a vola, Mweleminye mu myoyo; ninze; mu ta tia mba. 28Petro ya mu tivulira na a vola, Mwami, na a va na a veye ive, u mbe munwa, ntsitse ku ive ku madzi. 29Na a vola, Hamba. Petro ya twula mbwato, na a genda ku madzi kutsia ku Yesu. 30Navutswa lwa ya lola imbuudza ya tia; na a tanga kwiina ni yanira na a vola, Mwami, u mbonnye. 31Nonoho Yesu ya nyira mkono, na a mgumira, na a mu volera, Ive welisuuvira likekeke, kigira ki u hayahaya? 32Lwa va nina mbwato, imbuudza ya kiri ng'ana. 33Navo ava li mbwato, va mu sigamira, ni va vola, Ligali ive u veye Mwana wa Nyasaye.
34Lwa va mala kwambuka va duka ku kivala, mu Genesareta. 35Avandu va ha zana yaho, lwa va mmanya, va tuma avandu mtsimbega tsyosi tsya himbi, ni va mu letera avalwaye vosi; 36ni va mu saala va dire vutswa lukigiti lwengubo yeye: navo vosi va dira ku va honnywa.
Currently Selected:
Matayo 14: MBE
Highlight
Share
Compare
Copy
Want to have your highlights saved across all your devices? Sign up or sign in
©Bible Society of Kenya, 1967
