Matayo 12
12
1Inyinga yeyo Yesu ya vita ku lidiku lyelisabato mu milimi; navegidzwi veve va li nenzala, va tanga kuvuunga viangala ni va lia. 2Navutswa Vafarisayo lwa va lola ndiyo, va mbolera, Henza, avegidzwi vovo va kola agomugyiru mu lidiku lyelisabato. 3Navutswa ya va volera, Si mwa soma kuli aga Daudi ya kola, lwa ya li nenzala, navakye veve; 4kuli yingira mu inyumba ya Nyasaye na a lagira milango gyokumanyira, nagyo nu mugyiru naye navakye veve kugyilagira, navutswa avasalisi veng'ine? 5Kinga si mwa soma mu malago, ku lidiku lyelisabato avasalisi mu litempeli vononya lisabato, va ta li nekindu kuvo? 6Navutswa mmu volera, Munene kuvita litempeli a veye hano. 7Navutswa mu va mwa manya amakuva yaga, Nyenya tsimbabasi, si nyenya kisyuviriru, nkano si mwa nyala kukyaya ava ta li nekindu kuvo. 8Kigira Mwana wa Adamu a veye Mwami welisabato.
9Ya twula ho ni yingira mu lisomero lyavo. 10Kandi henza, ya li mu mundu ya linomkono gwa leema. Va mteva ni va vola, Nobulahi kuhonnya ku lidiku lyelisabato? Va duke kumuyala. 11Ya va volera, U li ha ku mwinye, u veye neligondi lilala, nalyo ni li gwa mbogo ku lidiku lyelisabato, a vule kuligumira nokuli twulidza mu? 12Nasindi mundu a veye bulahi kuvita ligondi Kigira yaga, nobulahi kukola bulahi ku lidiku lyelisabato. 13Hene yaho ya volera mundu, Nyira mkono gugwo. Naye ya nyira; nagwo gwa hona ni gu leng'ana nogundi. 14Navutswa Vafarisayo va twula ni va tsia kumkolera kyina va duke kumwiita. 15Yesu, lwa ya manya ndiyo, ya twula yo. Na vanyingi va mu londa; na a va honnya vosi, 16na a veganehidza va ta mbuula. 17Ga duke kukolwa agomprofeti Isaya ya vola, na a vola,
18Henza, Mtumwa wange wa nda tovola;
Muyanzi wange wa mwoyo gwange gu yanza.
Nda vika kuye Roho wange,
Naye a lilwadzira Tsihiri bulungi.
19Si a li hangala kinga si a li kupa lwanga;
Kandi mundu si a li hulira mwoyo gwigwe ku tsinzira.
20Kidundu kya minika si a li ki vunannya,
Kandi mwoki gu twula ku kitani, si a li gu siminya
A luhe a duke kuleta likalaga kuguuta.
21Ku lieta lilye Tsihiri tsi la suuvira.
22Hene yaho va mu letera welidemone lya gumira, mboku nedimbidi: na a mu honnya, nedimbidi ya luha na a vola na a lola. 23Viduma vya genya vyosi, ni va vola, Uyu a nyala kuva mwana wa Daudi? 24Navutswa Vafarisayo lwa va hulira, va vola, Mundu uyu si a kunga mademone navutswa netsingulu tsya Beelzebuli, munene wamademone. 25Ya manya tsiganagani tsyavo na a va volera, Ubwami bwosi bwavukana ubwene, bwoneka; amadala gosi netsinyumba tsyosi tsyavukana tsyene si tsi la singira mba: 26kandi Setani na a twulidza Setani, yavukana mwene; kunangwa ubwami bwibwe bu la singira ndi? 27Inze ni mba ntwulidza amademone netsingulu tsya Beelzebuli, avana venyu va ga twulidza na bwaha? Kigira yaga va la va avakalagi venyu. 28Navutswa inze ni ntwulidza amademone na Roho wa Nyasaye, kunangwa ubwami bwa Nyasaye bu duki ku mwinye. 29Mundu a nyala ndi kwingira mu inyumba yowetsingulu kumunyaga vindu vivye, na a ta tangi kuboha wetsingulu? Kunangwa a la mu nyaga inyumba yeye. 30Uyu u ta li halala ninze a hing'ana ninze; kandi u ta sannya ninze a salannya. 31Kigira yaga mmu volera, Avandu va la samefwa ubwoni bwosi namanyego, navutswa amanyego ga va nyega Roho si va li samefwa mba. 32Ku vosi u la vola likuva ku Mwana wa Adamu, a la samefwa; navutswa ku vosi u li nyega Roho Mtakatifu, si a li samefwa mba, mu lirova lya kalunu, kinga mu lirova lidzanga. 33Mu kole musala mulahi, namakuyu malahi; kinga mu kole musala mudamano namakuyu madamano: kigira musala gu manyekana namakuyu gagwo. 34Mwinye lwivulo lwetsinzoka avadamano mu nyala ndi kuvola bulahi? Kigira aga veye mmwoyo munwa gu la vola. 35Mundu mulahi ku vindu vilahi vyomwoyo a twulidza vindu vilahi: kandi mundu mudamano ku vindu vidamano a twulidza vindu vidamano. 36Mmu volera, ama kuva gosi ga vutswa gavandu va vola, ga la validzwa mu lidiku lyokukalagira. 37Kigira namakuva gogo u la nyola ubulungi, kandi namakuva gogo u la dividzwa.
38Hene vaho avalala ku Vang'odi na Vafarisayo va mtivulira, ni va vola, Mwegidzi, kwinye kwenya kulola kilolekidzu ku ive. 39Navutswa ya tivula na a va volera Likula lidamano nelyobuheyi lyenya kilolekidzu; navutswa si li hebwa kilolekidzu, navutswa kilolekidzu kyomprofeti Jona. 40Kigira kuli Jona ya li mmunda mwesudzi inene amadiku gavaka; kandi Mwana wa Adamu a la va ndiyo amadiku gavaka mmwoyo gwelirova. 41Avandu va Nineve va la singira mkyina halala nelikula yili navo va la li kalagira: kigira veganira ku lilwadza lya Jona; navutswa henza, munene kuvita Jona a veye hano. 42Mwami weki kali wekusini a la singira mkyina halala nelikula yili, naye a la li kalagira: kigira ya twula kunyasi kwelirova kuhulira ubugeeri bwa Solomoni; navutswa henza, munene kuvita Solomoni a veye hano. 43Navutswa roho mudamano, lwa gu mali kutwula ku mundu, gu genda ha ga ta li ho amadzi, gwenya ho kusosera, gu vula kunyola. 44Ma gu vola, Nzirane mu inyumba yange ya nda twula mu; lwa gu duka gu gi nyola ni i veye inzere ni yeyeywi ni i homeywi. 45Kunangwa gu tsia kuleta roho gyitanu na gyiviri midamano kusira gwene, ni gyingira ni gyi menya mu: vya inyima vyomundu uyu ni vidamano kusira vye imbiri. Kandi vi la va ndiyo ku likula yili lidamano.
46Lwa ya li na a volera ndi viduma, henza, mama wewe navamwavo veve va singira kyova, ni venya kuvolerana naye. 47Mulala ya mbolera, Henza, mama nava mwavo vovo va singiye kyova venya kuvolerana nive. 48Navutswa ya tivula na a volera uyu wa mbolera Mama wange ni bwaha? Navamitu vange ni bwaha? 49Ya nyira mkono gwigwe ku vegidzwi veve na a vola, Henza, mama wange navamitu vange. 50Kigira ku vosi u li kola ubulaliri bwa Dada wange u veye migulu niye amitu wange, nambotso wange, na mama wange.
Currently Selected:
Matayo 12: MBE
Highlight
Share
Compare
Copy
Want to have your highlights saved across all your devices? Sign up or sign in
©Bible Society of Kenya, 1967
