Matayo 11
11
1Na ga duka lwa Yesu ya mala kweganehidza avegidzwi veve likumi navaviri, ya twula ho na a tsia kwegidza nokwilwadza mu madala gavo.
2Yohana lwa ya hulira mu inyumba yavahambe miyinzi gya Kristo ya tuma avegidzwi veve 3na a mu volera, Ive nive udzanga naho ku linde wundi? 4Yesu ya tivula na a va volera, Mu tsie kuvolera Yohana aga mu huliranga naga mu lolanga: 5vaboku va hebwa kulola, navaleema va genda, navagere va honnywa, navahana amatu va hulira navakudzu va simugukidzwa, navadaka vilwadzirwa ivangeli. 6Kandi ku vosi u vula kulola ku inze kyokwikigitala, a veye nobugasu.
7Lwa va tsia ku inzira yavo, Yesu ya tanga kuvolera viduma amakuva ga Yohana, Mwa tsia kulola ki mwigendanyama? Kidundu kya sung'uswa nembuudza? 8Navutswa mwa tsia kulola ki? Mundu wevika tsingubo tsinzesereru? Henza, avivika tsingubo tsinzesereru va veye mu tsinyumba tsyavami. 9Navutswa mwa tsia kulola ki? Muprofeti? Yee, mmu volera, kandi a vita muprofeti. 10Kigira uyu niye wa ng'oderwa amakuva yaga,
Henza, ntuma mtumwa wange imbiri wowo,
U la lomba inzira yoyo imbiri wowo.
11Ligali, mmu volera, Kuvo avavakali vivula a kikiri kusingira u vita Yohana Mbatidzi: navutswa u veye mkekeke mu bwami bwomigulu a veye munene kuvita uyu. 12Kutwula ku madiku ga Yohana Mbatidzi kuduka lero ubwami bwomigulu bwingirangwa netsingulu, kandi avetsingulu va bu vugula netsingulu. 13Kigira avaprofeti vosi namalago va profeta va luha va duka ku Yohana. 14Kandi mwinye ni mwenya kubugirira, uyu niye Elija u lidza. 15U veye namatu gokuhulira, a hulire. 16Nda fwanannya naki likula yili? Li fwanana na vana vikala mvitu, ava langa avakye vavo 17ni va vola, Kwa li ku kumkupira lilere, si mwa li kukina; kwa li kwikuula, si mwa li kulira. 18Kigira Yohana yadza si ya lagira kandi si ya nwa, ni va vola, A veye nelidemone. 19Mwana wa Adamu yadza na a lagira na a nwa, ni va vola, Henza, muhuvali nohongera kunwa iwaini mulina wavasolola ubushutu navonil Kandi ubugeeri bu hebwa ubulungi nemiyinzi gyabwo.
20Hene yaho ya tanga kulemba madala aga gya kolwa mu miyinzi gyigye minene minyingi, kigira si geganira. 21O bayaye, ive Korazin O bayaye, ive Betsaida kigira miyinzi gyetsingulu gya kolwa mu mwinye, gyi va gya kolwa mu Turo nomu Sidone, nkano veganira kale ni vivika magunia ni vikala mu ligoke. 22Navutswa mmu volera, Bu la va bulahi ku Turo na Sidone mu lidiku lyelikalaga kuvita bwenyu. 23Nive, Kapernaume, u lidzominywa ku duka igulu? U la tsia kuduka mu Kihadisi: kigira miyinzi gyetsingulu gya kolwa mu ive, gyi va gya kolwa mu Sodoma, nkano li ve ho kuduka lero. 24Navutswa mmu volera bu la va bulahi ku kivala kya Sodoma mu lidiku lyelikalaga, kuvita bubwo.
25Inyinga yeyo Yesu ya tivula na a vola, Nku santidza, Dada, Mwami weligulu nowelirova, kigira wa visa ku vageeri navahuliri, vindu yivi, nu u vi vuulira avana: 26yee, Dada, kigira ndiyo ga yanzeka ku ive. 27Dada wange u mbeye vindu vyosi: kandi si ha veye wa manya Mwana, navutswa Dada; kandi si ha veye wa manya Dada, navutswa Mwana, naye wo Mwana a yanza kumuvuulira. 28Hambi ino mwinye mwosi ava nyankananga ku miyinzi midinyu nava minika, na inze nda mu sosidza. 29Mu ginge inira yange, mwegire ku inze; kigira inze mbeye mhooma nomuhokya: mu la nyola lisosa mu myoyo gyenyu. 30Kigira inira yange ni indahi, nomusigo gwange nu mwangu.
Currently Selected:
Matayo 11: MBE
Highlight
Share
Compare
Copy
Want to have your highlights saved across all your devices? Sign up or sign in
©Bible Society of Kenya, 1967
