Kyavalevi 18
18
1Kandi Yahova ya volera Musa, na a vola, 2U volere avana va Israeli, nokuvavolera, Inze mbeye Yahova Nyasaye wenyu. 3Mwinye mu ta kola kuli likola lyekivala kya Egepeti, kya mwa menya mukyo: kandi mu ta kola kuli likola lyekivala kya Kanani, ha nda mwingeridza; kandi mu ta londa malago gavo. 4Miima gyange mu la kola, na mu la gumira malago gange kugenda mugo: inze mbeye Yahova Nyasaye wenyu. 5Kunangwa mu la gumira malago gange, na miima gyange; agomundu u tumekira, a la va mwoyo kugo: inze mbeye Yahova.
6Ku vosi mundu ku mwhye a tisunda ku mulala u veye mwiko wewe, kumuvimbula kyahonyo: inze mbeye Yahova. 7Kyahonyo kya dada wowo, kinga kyahonyo kya mama wowo, u ta vimbula: a veye mama wowo, u ta vimbula kyahonyo kikye mba. 8Kyahonyo kyomukali wa dada wowo u ta vimbula: kigira ki veye kyahonyo kya dada wowo. 9Kyahonyo kya mbotso wowo, mukana wa dada wowo, kinga mukana wa mama wowo, na a va ni yivulwa mu inyumba yenyu, kinga ni yivulwa ahandi, u ta vimbula kyahonyo kyavo. 10Na kyahonyo kya navizala wowo womwana muyai wowo, kinga womwana mukana wowo, kyahonyo kyavo u ta vimbula: kigira kyahonyo kyavo ki veye kyahonyo kikyo. 11Kyahonyo kyambotso wowo wenyumba yindi, wa dada wowo yivula, uyu a veye mbotso wowo, u ta vimbula kyahonyo kikye. 12U ta vimbula kyahonyo kya senge wowo: a veye mwiko wa dada wowo wa himbi. 13U ta vimbula kyahonyo kya amawavo wa mama wowo: a veye mwiko wa mama wowo wa himbi. 14U ta vimbula kyahonyo kya amwavo wa dada wowo, u tisunda ku mukali wewe: a veye mama wowo. 15U ta vimbula kyahonyo kya navizala wowo: a veye mukali womwana wowo, u ta vimbula kyahonyo kikye. 16U ta vimbula kyahonyo kya mukali wamwavo wowo: ki veye kyahonyo kya amwavo wowo. 17U ta vimbula kyahonyo kyomukali na kyomukana wewe; u ta vugula mukana womuyai wewe, kinga mukana womukana wewe; ku vimbula kyahonyo kyavo, va veye aviko vovo va himbi: bu veye ubudamano bunene. 18Na u ta vugula mukali halala na amwavo wewe kuva mudambidzi kuye; u ta vimbula kyahonyo kikye, halala na wundi lwa a veye mwoyo.
19Kandi u tisunda himbi ku mukali kuvimbula kyahonyo kikye inyinga a vikwa ha luvega kigira a tsiye mweli. 20U ta va halala nomukali womutende wowo kweyononya naye. 21Kandi u ta haana kali mulala ku lwivulo lulwo kuvakola kuvita muliru kigira Moleku; kandi u ta lega lieta lya Nyasaye wowo: inze mbeye Yahova. 22Kandi u ta gona nomusatsa kuli u gonanga nomukali: li veye livihiriridza. 23Kandi u ta gona nenyama ku tsyosi kweyononnya nayo; na mukali ku vosi a ta singira imbiri wenyama, kugona halala nayo: ki veye kivihiri.
24Mu teyononya mwinye avene mu vindu yivyo: kigira mu yivi vyosi tsihiri tsya ntwulidza imbiri wenyu va veye avadamano; 25na kivala ki veye kidamano: kunangwa mbikanga ubudamano bwavo kukyo, na kivala ki lukanga avandu vakyo nokuvatwulidza. 26Kunangwa mwinye mu la gumira malago gange na miima gyange, na mu ta kola livihiriridza kali lilala; kinga uyu woluhya ku Vaisraeli, kinga mmenya hagati henyu: 27(kigira avandu vekivala ava li imbiri wenyu, va koli livihiriridza vili lyosi, na kivala ki veye kidamano); 28kivala ki vule kuluka mwinye kandi, lwa mu kvononya, kuli kya hlka ihiri ya li imbiri wenyu. 29Kigira ku vosi mundu u kola lilala lyelivihiriridza yili avandu yavo ava li kola va la twulidzwa mu avandu vavo. 30Kunangwa mu gumire lilaga lyange, mu vule kukola kali lilala ku livihiriridza lidamano, lya tanga kukolwa imbiri wenyu, na mu teyononya avene muvyo: inze mbeye Yahova Nyasaye wenyu.
©Bible Society of Kenya, 1967