Kyavalevi 19
19
1Na Yahova ya volera Musa, na a vola, 2U volere livugana lyosi lya avana va Israeli, nokuvavolera, Mu ve avatakatifu; kigira inze Yahova Nyasaye wenyu mbeye mutakatifu. 3Ku vosi mundu a tie mama wewe, na dada wewe; na mu linde masabato gange: inze mbeye Yahova Nyasaye wenyu. 4Mu ta girukana kulonda misambwa, kandi mu telombera avanyasaye ava vadzwa: inze mbeye Yahova Nyasaye wenyu.
5Na lwa mu haana kihaanwa kyemirembe ku Yahova, mu la ki haana mu duke kubugirirwa. 6Ki la libwa ku lidiku lya ki haanwa ku noku mugamba gwalyo: na ku kyosi ni ki tigala ku kihaanwa zana kuduka lidiku lya kavaka, ki la sambwa nomuliru. 7Na ni ki va ni ki libwa kali kikekeke ku lidiku lya kavaka, ga veye livihiriridza; si ki la bugirirwa mba: 8navutswa ku vosi u lia ku a la ginga ubudamano bwibwe mwene, kigira wononyi kindu kitakatifu kya Yahova: mundu uyu a la twulidzwa mu avandu veve.
9Na lwa mu gesa ligesa lyekivala kyenyu, u ta gesera ligali kuduka ku tsinzako tsyomulimi gugwo, kandi u ta vungidza vya ng'alika vyeligesa lilyo. 10Na u ta vugula vya ng'alika kya kizabibu, kandi u ta dola makuyu gekizabibu kikyo aga gwa hasi; u ga lekere mudaka na mugeni: inze mbeye Yahova Nyasaye wenyu.
11Mu tiba mba; kandi mu ta kola ubugadi, na mu ta veherana mba. 12Mu tesuha lyobubehi ku lieta lyange, nokwononya lieta lya Nyasaye wowo: inze mbeye Yahova.
13U ta dambidza mutende wowo kinga kwiba kindu kikye: madanyi gomutumekiri wa lagwa ga la vula kumenya halala nive lidiku lyosi kuduka mugamba. 14U ta laama uyu wa hana amatu, kandi u ta vika kyokwikigitalidza imbiri womboku; navutswa u la tia Nyasaye wowo: inze mbeye Yahova.
15Mu ta kola aga ta li malungi mu likalaga: kandi u teridza liva lyomudaka, kinga kwidzominya liva lyowetsingulu; navutswa u la kalagira wakyo nobulungi. 16U ta tsia yiyi na yiyi kuli muhudziridzi hagati ha avandu vovo: kandi u ta singira ku masahi gowakyo: inze mbeye Yahova.
17U ta dunyira amwavo wowo mu mwoyo gugwo: ligali u la gaya mutende wowo, na u te nyolira ubwoni kuye mba. 18U ta vanza kisalya, kandi u ta va nobusigu ku avana va avandu vovo; navutswa u la yanza mutende wowo kuli weyanza: inze mbeye Yahova.
19Mu la gumira malago gange. U ta leka mitugu kwivulana netsinyama tsyolugano nolugano: U ta midza mu mulimi gugwo bugutsa ku tsing'ano tsiviri: kandi u tivika ingubo yetsing'ano tsiviri tsyatsukanywa halala. 20Kandi ku vosi mundu u I gona nomukana mutugwa womusatsa yakwa, wa vula kutungirwa, kinga kubohololwa; vombi va la saliridzwa; va la vula kwiitwa, kigira mukana si a li muboholole. 21Na musatsa uyu a la leta kihaanwa kikye kyelihyola ku Yahova ha kiliango kyelihema lyokuvuganira mu, ki la va ligondi likole kuva kihaanwa kyelihyola. 22Na musalisi a la lombera uyu kyokukunika ubwoni neligondi likole lyekihaanwa kyelihyola imbiri wa Yahova: na ubwoni bwa ya kola bu la samefwa.
23Na lwa mu duka mu kivala, ni mu mala kusimika misala tsing'ano tsyosi kuva vyokulia, hene yaho mu la vola makuyu gagyo kuva kuli livula kukebwa lyagyo: mihiga gyivaka misala yigyo gyi la va misindi ku m-vinye; ga la vula kulibwa. 24Navutswa mu muhiga gu kola gyine makuyu gagyo ga la va matakatifu, kwidzominya Yahova. 25Noku muhiga gwa Ryitano mu la lia makuyu gagyo, gyi duke kwamira mwinye makuyu gagyo: inze mbeye Yahova Nyasaye wenyu. 26Mu ta lia kindu halala na masahi: kandi mu ta kola busegetiri, kinga kutumekira ubung'oli. 27Mu ta leka visuli vyoku mitwe gyenyu, kandi mu tononya tsisonga tsyetsinderu tsitsyo. 28Mu ta salagira avakudzu mu inyama yombiri gwenyu, kandi mu ta sata tsisate ku mibiri gyenyu: inze mbeye Yahova.
29U tononya mukana wowo kumukola malaya; gase kivala ki la londa amalaya, na kivala ki lizula ubudamano bunene. 30Mu linde masabato gange, nokwidzominya hatakatifu hange: inze mbeye Yahova.
31Mu ta tsia ku yavo ava veye nemyoyo gyokulagula, kinga ku avavimbuli, mu ta venyira kwononywa navo: inze mbeye Yahova Nyasaye wenyu.
32U la singirira wetsimbudzi, nokwidzominya musakulu, na u la tia Nyasaye wowo: inze mbeye Yahova.
33Na mugeni na a va na a menya halala nive mu kivala kyenyu, mu ta mu kolera ubudamano. 34Umgeni u menyanga halala na mwinye a la va ku mwinye kuli wivulwa iwenyu, na u la mu yanza kuli weyanza; kigira mwa li avamenya mu kivala kya Egepeti: inze mbeye Yahova Nyasaye wenyu.
35Mu ta kola ubukyamu mu likalaga, kinga mu ligera lyobutambi, kinga mu ubuliduhu, kinga mu ligera lyokwizula. 36Mu ve netsiratili tsinungi, na vyokugera vilungi, na efa inungi, na ihin inungi: inze mbeye Yahova Nyasaye wenyu, wa mu leta kutwula mu kivala kya Egepeti. 37Na mwinye mu la gumira amalago gange gosi, na miima gyange gyosi, nokugyikola: inze mbeye Yahova.
©Bible Society of Kenya, 1967