Kyavalevi 17
17
1Na Yahova ya volera Musa, na a vola, 2U volere Haruni, na avana veve, na avana vosi va Israeli, nokuvavolera: Yiki ni kindu kya Yahova u lagi, na a vola, 3Ku vosi mundu wenyumba ya Israeli, wiita ing'ombe, kinga kimeme kyeligondi kinga imbuli, mu hokusosa, kinga wiitira Isyova wa hokusosa, 4na a vuli kugileta ha kiliango kyelihema lyokuvuganira mu, kugihaana kuva kihaanwa ku Yahova imbiri welihema lya Yahova: a la validzwa kuva nekisalya kyamasahi; u sunduye masahi; na mundu uyu a la twulidzwa mu avandu veve: 5kuduka avana va Israeli va lete vihaanwa vyavo, vya viitira kyova mu mulimi, kali kuduka va vi haane ku Yahova, ha kiliango kyelihema lyokuvuganira mu, ku musalisi, nokuvita vi ve vihaanwa vyemirembe vi haanwa ku Yahova. 6Na musalisi a luuha masahi ku bwali bwa Yahova ha kiliango kyelihema lyokuvuganira mu, nokusamba tsitinya tsi ve mwayu ku Yahova. 7Va vule kwiitira amademone tsisadaka tsyavo, aga va kola ubuheyi nago ku ligota. Yili li la va lilaga lyemihiga nemihiga kuvo mu visukululwi vyavo vyosi.
8Na u la va volera, Ku vosi mundu wenyumba ya Israeli, kinga ku yavo ava menyi hagati havo, leta kihaanwa kyokusambwa, kinga kihaanwa kindi, 9na a vula kukileta ha kiliango kyelihema lyokuvuganira mu, kukihaana ku Yahova; mundu uyu a la twulidzwa mu avandu veve.
10Na ku vosi mundu wenyumba ya Israeli, kinga ku yavo ava menyi hagati havo, u lia masahi ku tsing'ano tsyosi, nda dinyiridza mumoni mwange ku mundu uyu u lia masahi nokumutwulidza hagati ha avandu veve. 11Kigira livamwoyo lyenyama li veye mu masahi; na nda ga haana ku mwinye ku bwali kulombera myoyo gyenyu kyokukunika ubwoni: kigira ga veye masahi aga lombanga kyokukunika ubwoni kigira livamwoyo. 12Kunangwa nda volera avana va Israeli, Ha ta va nomundu ku mwinye u litsanga masahi, kandi ha ta va na mugeni u menya hagati henyu u litsanga masahi. 13Na ku vosi umundu wa avana va Israeli, kinga ku vageni ava menya hagati havo, u nyola mu luhedzi lwilwe, inyama kinga linyonyi li libangwa; a la sundula masahi gavyo, nokugafwuma ku lugukyi.
14Kigira ku livamwoyo lyenyama yosi, amasahi gayo ga veye kindu kilala nelivamwoyo lyayo: kigira yaga nda volera avana va Israeli, Mu ta lia masahi genyama ku tsing'ano tsyosi; kigira livamwoyo lyetsinyama tsing'ano tsyosi li veye mu masahi gatsyo: ku vosi u ga lia a la twulidzwa. 15Na ku vosi mundu u lia inyama inkudzu, kinga yenyama yombulimu ya tandulannya, na a va mwene luhya kinga mugeni, a logidza tsingubo tsitsye, nokwisinga mu madzi, na a la va mudamano kuduka mgolova: kunangwa a la va mulahi. 16Navutswa na a vula kutsyogidza, nokwisinga mbiri, hene yaho a la ginga ubudamano bwibwe.
Currently Selected:
Kyavalevi 17: MBE
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 1967
