Lisyoma lya Jeremia 2
2
1Ga duka ndi Yahova ya kunika mukana wa Zioni nelilesi mu butima bwibwe
Bulahi bwa Israeli ya bwagulula hasi kutwula migulu,
Na si yidzulitsa intebe yevirenge vivye mu lidiku lyobutima bwibwe.
2Yahova u miri ubumenyo bwosi bwa Yakobo, na si ya li netsimbabasi mba:
Tsimpinga tsyomukana wa Yuda ya tsi sambula mu butima bwibwe;
U tsi tsomi kuduka hasi; u viki ubudamano ku bwami noku vanene vabwo.
3Lwiga lwosi lwa Israeli u lu kalagi mu butima bwibwe bululu;
Wirannyi mukono gwigwe mulungi inyima gu vuli kuva imbiri wa avasigu:
U sambi Yakobo kuli muliru gu dedimanga, u gu sambanga tsimbega tsyosi.
4U nyiye ubuta bwibwe kuli musigu, u singiye nomukono gwigwe mulungi kuli mudambidzi,
Na wiiti vosi ava loleka kuva avokuyanzidza imoni:
Mu lihema lyomukana wa Zioni u tsuki ubutima bwibwe kuli muliru.
5Yahova u gwiye kuli musigu, u miri Israeli;
U miri tsinyumba tsitsye tsyosi tsyobwami, nokudividza tsimpinga tsitsve
Kandi mu mukana wa Yuda u medi lisyoma nokwiduya viritu.
6U twulidzi netsingulu hokumenya hehe, kuli ha zana ha li milimi vutswa; wononnyi hokuvugana hehe:
Yahova u koli livirirwa mu Zioni amasavo ga madiku manene nelisabato,
Na mwami nomusalisi ya va lega mu livihirirwa lyobutima bwibwe.
7Yahova ya ta ubwali bwibwe, kandi ya ta hatakatifu hehe,
Ya vika mmukono gwa avasigu madigi getsinyumba tsitsye tsyobwami:
Va koli liyoga mu inyumba ya Yahova, kuli lya li ku lidiku lyelivugana.
8Yahova u saaviye kwononnya lidigi lyomukana wa Zioni;
U nyiye mugoye,, na si yegaliye mukono gwigwe gu vule kudividza mba:
Kigira yaga ya kola impinga na lidigi kusyoma; vyombi halala vi dengeya.
9Viribwa vivye vya sikira hasi; ya dividza nokuvunannya miluguyu gyavyo;
Mwami wewe na vanene veve va veye mu tsihiri tsyelilaga li ta veye mutsyo;
Yee, avaprofeti veve si va lolanga malola ga twulanga ku Yahova.
10Avakulundu vomukana wa Zioni vikaye hasi, va kiring'ani makiriri;
Va viki lugukyi ku mitwe gyavo; viviki tsingubo tsya mugunia mu vikenge vyavo:
Avakana vagima va Yerusalemi vinaminya mitwe gyavo kuhenzidza hasi.
11Tsimoni tsyange tsi luhi kigira maliga, mwoyo gwange gu kaliki;
Likudumani lyange li tsukeywi ku kivala, kigira ubwoneku bwomukana wavandu vange;
Kigira avana vadoto na va nunanga va kudziye ku tsinzira tsyelidala.
12Va tevanga avamama vavo, Ubune iwaini vi veye haliha?
Lwa va kudzanga kuli avaateywi tsing'oma ku mahasi ga ma dala,
Lwe myoyo gyavo gyi tsukeywi mu viritu vya vamama vavo.
13Nku lolekidzira kindu ki, nda fwanannya na kindu ki ive, O mukana wa Yerusalemi?
Nda leng'annya na kindu ki ive nduke kukuleminya mwoyo O mukana mugima wa Zioni?
Kigira ubusasuguku bubwo bu veye bunene kuli inyanza; ni bwaha u nyala kukuhonnya?
14Avaprofeti vovo va ku loleye amalola, amalola ga vutswa na gobusiru;
Navo va vula kuvimbula ubwoni bubwo, kuduka ku girunkannya lyadikidzwa lilyo,
Navutswa va ku loleye busigu bwobugadi, na vivuni vye lyadikidzwa.
15Vosi ava vitanga va ku kong'ondera makono;
Va kunukanga, va sung'usanga mitwe gyavo ku mukana wa Yerusalemi, ni va vola,
Lidala yili nilyo lya langwa, Umudukiru wobulahi, busangali bwelirova lyosi?
16Avasigu vovo vosi va kunuye minwa gyavo ligali ku ive;
Va kunukanga nokudyedyeidza amino gavo; va vola, Ku mali kumumira; Ligali yili ni lidiku lya kwa henzereranga; ku li nyoye, ku li loli.
17Yahova u koli aga ya saavira; u dukidzi likuva lilye lya ya laga mmadiku ga kale;
U tsomi hasi, si ya vera tsimbabasi mba:
Ya ha musigu lisangala ku ive; ya kuminya lwiga lwa yavo ava dambidzanga ive.
18Myoyo gyavo gyanira Yahova:
Ive lidigi lyomukana wa Zioni, amaliga gi doole kuli mugera mbasu nobudiku;
U tesosidza, u ta leka indolero yemoni yoyo i ta here mba.
19Vuka, u kupe lwanga mbudiku mu litanga lyobulindi;
U tsuke mwoyo gugwo kuli amadzi imbiri womumoni mwa Yahova:
Ginga makono gogo kuhenzidza kuye kigira livamwoyo lyavana vovo vadoto, yavo ava kudza myoyo kigira inzala ku kiheri kyelihasi sa lilala.
20Lola, O Yahova, henza, ni bwaha wa u koleye ndiyo
Avakali va lie lwivulo lwavo, avana va va lera mu makono gavo?
Musalisi nomuprofeti va liitirwa mu hatakatifu ha Yahova?
21Muyai nomusakulu va gona hasi mu mahasi;
Avakana vagima vange navasoleli vange va gwiye ku kivavi:
U viiti ku lidiku lyobutima bu bwo; u viiti, na si u va vereye tsimbabasi mba.
22U langi, kuli mu lidiku lyelivugana, vyokutihidza vyange vi veye tsimbega tsyosi;
Si ha veye kali mulala wa hona, kinga wa tigala mu lidiku lyobutima bwa Yahova:
Yavo ava nda lera nokuvirukidza, musigu wange u mali ku va heridza.
Currently Selected:
Lisyoma lya Jeremia 2: MBE
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 1967
