Lisyoma lya Jeremia 1
1
1Lya duka ndi lidala kumenya lyeng'ine, lya li lizulira avandu
Lya duka ndi kuva kuli mukunzakali, yili lya li linene ligali mu tsihiri
Mukana womwami hagati hevivala yivyo ya duka ndi kunigwa ku lisolola
2A liranga ligali inyinga yobudiku, amaliga gege gi doolanga ku tsindama tsitsye;
Mu vosi avayanze veve si va veye nomulala u mu leminya mwoyo:
Avalina veve vosi va mu koleye agobugadi; va gwiye avasigu veve.
3Yuda u tsiye mu lyadikidzwa ki gira lidambidzwa, kandi kigira ubutugwa bunene;
A menyanga hagati he tsihiri, si a veye nobwelemeridzi kali hakuzu:
Ava mu dambidza vosi va mu nyolera ha lumbatania.
4Tsinzira tsya Zioni tsi syomanga, kigira si ha veye nomundu udza mu lisavo lyelidiku linene;
Viribwa vivye vyosi vi gwiye hatswa, avasalisi veve va kenyanga
Avakana vagima veve va verereridzeywi, na mwene a veye mu litsunwa.
5Ava mu dambidzanga va gwiye mutwe, avasigu veve va gasidzeywi;
Kigira Yahova u mu vereridzi kigira ubunyingi bwa mahyolo gege:
Avana vadoto veve va hileywi mu lyadikidzwa imbiri womudambidzi.
6Na mukana wa Zioni, ubukumi bwibwe bwosi bu twuli kuye:
Avanene veve va gwiye kuli tsimboongo tsi ta li nekyayiru,
Na viruki, si va veye netsingulu imbiri wa uyu u va londereranga.
7Yerusalemi yidzulitsanga mu madiku gelidambidzwa lilye na ga likenye lilye, yidzulitsanga vindu vivye vyosi vyokuyanzidza vya li ho kutwula ku madiku ga kale:
Lwa avandu veve va gwa mu makono gomusigu, na si ha veye nomulala wokumukonya mba,
Avasigu va mu lola, va seka kigira liheridzwa lilye.
8Yerusalemi ya kola ubwoni ligali; kigira yaga u gwiye kuli kindu kidamano;
Yavo ava li ni va mwidzominya va mu lega, kigira va loli kyahonyo kikye:
Yee, a kenyanga, nokwegirunkannya a tsie inyima.
9Ububi bwibwe bwa li mu kitweya kikye, si yidzulitsanga kiheri kikye mba;
Kigira yaga lika lilye lya li neligenya; si a veye nowokulemi nya mwoyo:
Henza, O Yahova, lidambidzwa lyange; kigira musigu yekuminyi.
10Mudambidzi u nyiye mukono gwigwe ku vindu vivye vyosi vyokuyanzidza:
Kigira u loli ava ta suuvira vingiranga ha butakatifu bwibwe,
Ava wa laga kuvo va ta bugirirwa kali kwingira mu livugana lilyo.
11Avandu veve vosi va kenyanga, kwenya vyokulia;
Va twulidza vindu vyavo vyokuvanzidza kuva vyokulia vyokwirannya myoyo gyavo ubuhya:
Lola, O Yahova, u henze; kigira inze ngwiye kindu ki legwa.
12Si ki veye kindu kya mwinye, mwinye vosi ava vitanga?
Henze, mu lole, ni ha va ni ha veye nelivererera lindi kuli livererera lya mbeye nalyo, lya nkolerwa
Lya Yahova u vereridzeye inze ku lidiku lyobutima bwibwe bululu.
13Ya vika muliru mu vigumba vyange ku twula migulu, nagwo vi guuta;
A vambuye muluvo kuduka kugumira virenge vyange, u nzirannya inyima;
U nkoli kuva tsyeng'ine, kandi mulwaye mbasu bei.
14Inira ya mahyolo gange, mukono gwigwe gu gi bohi;
Ga hambannyeywi halala, ga nini kwigoti lyange; u heridzi tsingulu tsyange:
Yahova u mbiki mu makono gavo, ava nta nyala ku singira kuvo mba.
15Yahova u tung'aminyi avaluviriri vange vosi hagati hange;
U langi livugana ku inze kushonolonnya vasoleli vange:
Yahova u duvagi mukana mugima wa Yuda kuli va duvaganga mu kyokumina iwaini.
16Inze ndiranga kigira vindu yivi; imoni yange, imoni yange, yidoolanga amadzi;
Kigira wokuneminya mwoyo wa ga dukiranga kwirannya mwoyo gwange a veye ihale ku inze:
Avana vange va lekeywi veng'ine, kigira musigu u nguuti.
17Zioni a nyiranga makono gege; si ha veye kali mulala u mu leminya mwoyo;
Yahova u haane lilaga ku makuva ga Yakobo, ava mu kumbiridzanga va veye avadambidzi veve:
Yerusalemi hagati havo u gwiye kuli kindu ki veye nobudamano.
18Yahova nowobulungi; kigira inze nzebaaye ku lilaga lilye:
Mwadza, mu huliye mwinye ava ndu vosi, mu lole livererera lyange:
Avakana vagima vange, na vayai vange va tsiye mu lyadikidzwa.
19Nda langa avayanze vange, navutswa ngada:
Vasalisi vange na vakulundu vange va kudzera mu lidala,
Lwa va li ni venyanga vyokulia va duke kwirannya myoyo gyavo ubuhya.
20Henza, O Yahova; kigira mbeye mu lidambidzwa, mwoyo gwange gu kaliki;
Mwoyo gwange gu gwirani mu inze; kigira nzebaaye nobululu:
Kyova kivavi kiitanga avana, mu nyumba mu veye kuli likudza.
21Va huliye nkenyanga; si ha veye nomundu kali mulala wokuneminya mwoyo;
Avasigu vange vosi va hulira kivi kya ngwira; va sangalanga kigira nive wa kola yaga:
Ive u la leta lidiku lya wa landidza makuva galyo, navo va la leng'ana ninze.
22Ubudamano bwavo bwosi budze imbiri wowo;
U va kole, kuli wa kola inze kigira mahyolo gange gosi:
Kigira likenya lyange li gwiye linene, na mwoyo gwange gu duki mbulwaye.
Currently Selected:
Lisyoma lya Jeremia 1: MBE
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 1967
