Lisyoma lya Jeremia 3
3
1Mbeye umundu u loli lidambidza na impimbo yobutima bwibwe.
2Ya nzimirira nokung'endidza mu kisundi, si mwa li mu bulavu.
3Ligali ya girunkannya mukono gwigwe ku inze hali kanyingi mbasu bei.
4U koli inyama yange neligodo lyange kuva vikulu; u vunannyi vigumba vyange.
5Wombaki ku inze, nokunkumbiridza nendulwe neliluha.
6U nzikalidzi ha veye nekisundi, kuli avakudzu ku inyinga intambi.
7U viki ku inze lugaga hosi, mbule kutsia kyova; munyororo gwange u gu koli muliduhu.
8Yee, ni nkupa lwanga nokwenya mukonyi, a haniranga kyova lisaala lyange.
9U hani tsinzira tsyange na magina ga vadzwa; u kyaminyi tsinzira tsyange.
10A veye ku inze kuli iduba i gonekanga, kuli king'ang'a mu lyevisa.
11U girunkannyi tsinzira tsyange, nokuntandulannya; na u nkoli kuva hatswa.
12U nyiye buta bwibwe, nokuvika inze kuva kyokugera ku kyombano.
13U ndasi nemibano gye imodia yeye mu kikenge kyange.
14Ngwiye kihenyahenye ku avandu vange vosi, lwimbu lwavo mbasu bei.
15U nzizulitsi litsunwa, u nzigutidzi nekilulu kikye.
16Kandi u vunannyi amino gange netsinzalo: u nkuniki ligoke.
17U mali kuvika mwoyo gwange gu ve ihaie nemirembe; nziviriye ligasidzwa.
18Na nda vola, Tsingulu tsyange tsi goti, na lyenya lyange ku twula ku Yahova.
19Widzulitse lidambidzwa lyange na likenya lyange, kilulu nendu lwe.
20Mwoyo gwange gu kidzulitsanga yago, na gwinama mu inze.
21Nziyidzulitsa likuva yili; kigira yaga mbeye nelisuuvira.
22Ga veye ku tsimbabasi tsya Yahova tsi kiranga ni ku vula kuheridzwa, kigira tsimbabasi tsi tsye si tsi gehanga mba.
23Tsi veye tsimpya mugamba nomugamba; busuuvirifu bubwo bu veye bunene.
24Yahova a veye kidieli kyange mwoyo gwange gu vola, kigira yaga nda suuvira kuye.
25Yahova a veye mulahi kuvo va mu lindiranga, ku mwoyo gu mwenyanga.
26Nobulahi umundu a suuvire, nokulindirira ubuhonyi bwa Yahova nelyekudzira.
27Nobulahi umundu a ginge inira mu bwana buke bwibwe.
28Yikale yeng'ine nokukiring'ana kigira u viki kuye inkuva yiyi.
29A vike munwa gvwigwe mu lugukyi, ni i va lisuuviridza li veye ho.
30A haane ku uyu u mu kuyanga lusaya lwilwe; yizule amanyego.
31Kigira Yahova si a la ta mihiga nemihiga.
32Kigira kali na a vereridza, naye kandi a la vera kuli ubunene bwetsimbabasi tsitsye.
33Kigira si a va vikanga mu kivi, kinga kuvereridza avana va vandu nomwoyo gwobuyanzi.
34Ku va duvagira isi wevirenge vyavo ava bofwa vosi vomu lirova
35Ku kyaminya ubulungi bwomundu imbiri wommoni mwa Uyu Uveye Igulu Ligali,
36Kuhinula mundu mu livola lilye, yaga Yahova si a bugirira mba.
37Ni bwaha u volanga, ma li va, ni i va Yahova si ya li laga mba?
38Mu munwa gwa Uyu Uveye Igulu Ligali si ga twulanga amadamano nobulahi?
39Kigira ki mundu u veye mwoyo a monyanga, umundu ku lihebwa mageli ku ubwoni bwibwe?
40Gendi ku liguule nokugeridza tsinzira tsyetu, nokwirana ku Yahova kandi.
41Gendi ku gingire Nyasaye u veye igulu myoyo gyetu halala na makono getu.
42Ku siye lwako nokwebaala; ive si u sameha mba.
43U kuniki nobutima bubwo nokukulonderera; wiiti, si u veye netsimbabasi.
44Wekuniki nelilesi, lisaala lyetu li vule kuvita.
45U ku koli kuva kuli amandu na vindu vya tebwa hagati ha avandu.
46Avasigu vetu vosi valaminyi mi nwa gyavo ku kwinye.
47Ubutii na bogo vi duki ku kwinye, ubudivi na bwoneku.
48Imoni yange yidoolanga migera gya madzi, kigira ubwoneku bwomukana wa avandu vange.
49Imoni yange i sundukanga amadzi, si i lekeranga mba, si i kamulukanga,
50Kuduka Yahova yumike, nokulola kutwula migulu ha a veye
51Imoni yanga i hayahayidzanga mwoyo gwange, kigira avakana vosi velidala lyange.
52Va himanga inze kuli linyonyi li himangwa, ava veye avasigu vange bugira kivuni.
53Va twulidzi livamwoyo lyange mu inyumba ya hasi ligali, va teye ligina ku inze.
54Amadzi ga viti igulu womutwe gwange: nda vola, Mmali kuheridzwa.
55Ndanira lieta lilyo, O Yahova, kutwula ha inyumba ya hasi ligali.
56Wa hulira mwoyo gwange; u ta visa ugutu gugwo ku miyika gyange, ku lilira lyange.
57Wesunda ku inze ku lidiku lya nda kwanira; na wa mbolera, U ta tia mba.
58O Yahova, u veri amakuva gomwoyo gwange; u tungiye livamwoyo lyange.
59O Yahova, u loli likolerwa lidamano lyange; kalaga likuva lyange.
60Ive u loli kisalya kyavo kyosi, na lisaavira lyavo lyosi lya va saavira ku inze.
61Wa hulira amanyego gavo, O Yahova, na lisaavira lyavo lya va saavira ku inze,
62Minwa gya yavo ava singira ku kuya inze, na lisaavira lyavo ku inze mbasu bei.
63Henza likala lyavo, ne lisingira lyavo; mbeye lwimbu lwavo.
64U la va tunga litunga, O Yahova, kuli miyinzi gya makono gavo.
65U la va ha budinyu bwomwoyo, vilaamo vivyo kuvo.
66U la va londerera nobutima, nokuvadividza va twule va vuli kuva isi weligulu lya Yahova.
Currently Selected:
Lisyoma lya Jeremia 3: MBE
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 1967
