Yakobo 4
4
1Ubulwani bu twula ha li ha, kandi lihangalidzana li twula ha li ha mu mwinye? Si mu li mu likayirwa lyenyu li kolanga ubulwani mu vivero vyenyu? 2Mu kayirangwa, si mu veye nakyo: mwiitanga kandi mu kolanga imbodoka, kandi si mu nyala kunyola; mu hangalidzana nokulwana; si mu veye nekindu, kigira si mu saalanga. 3Mu saalanga, si mu nyola, kigira mu saala nobudamano, mu duke kuvitumekira mu likayirwa lyenyu. 4Avobuheyi, si mu manya ubulina bwevyelirova bu veye ubusigu ku Nyasaye? Uyu wenya kuva mulina wevyelirova yekolanga musigu wa Nyasaye. 5Kinga mu ganagana mang'oda ga vola ga vutswa? Roho gwa ya leta kumenya mu kwinye, gu kayirangwa kuduka ku likendeka? 6Navutswa a ku ha tsimbabasi kuvita. Kigira yaga mang'oda ga vola, Nyasaye a hingira avigingiri, navutswa a hedzanga avegehidzi tsimbabasi. 7Kunangwa mwegehidzire Nyasaye; navutswa mu hingire Setani, naye a la mwiruka. 8Mwisunde himbi ku Nyasaye, naye a lisunda himbi ku mwinye. Mu lavidze makono genyu, mwinye avoni; mu takase myoyo gyenyu, mwinye avemyoyo gyiviri. 9Mu kupe kivi, mu verere, mu lire: liseka lyenyu li Kirunkanywe kuva liverera, lisangala lyenyu li ve liverera. 10Mwegehidze mwinye avene imbiri wo Mwami, naye a la mu nenehidza.
11Mu ta monyana avene navene, avamitu, Uyu u monya amwavo wewe, kinga kumukalagira, a monya malago, kandi a kalagira malago: navutswa ive nu u kalagira malago, si u veye mukoli wamalago, navutswa u veye mukalagi. 12Mulala weng'ine a veye mulombi wamalago nomukalagi, niye u nyalanga kuhonnya nokudividza: navutswa ive u veye ibwaha u kalagiranga mutende wowo?
13Henzi mwinye, ava volanga, Lero kinga mugamba ku lingira mu lidala yili nokumenya mu muhiga mulala, nokukirannya, nokunyola vyambeti: 14navutswa mwinye si mu manya aga na ga ve ho mugamba. Livamwoyo lyenyu li veye ki? Kigira mwinye mu veye mwika ogu loleka inyinga inkekeke, ma gu gota. 15Nkano mu vola, Mwami na a yanza ku la va mwoyo, nokukola yaga kinga yaga. 16Navutswa kalunu mwiidzominya mu bwigingiri bwenyu: liidzominya lyosi kuli yili li veye lidamano. 17Kunangwa u manya kukola bulahi navutswa si ya kola, kuye bu veye ubwoni.
©Bible Society of Kenya, 1967