Yakobo 3
3
1Mu ta va avegidzi vanyingi, avamitu, mu manya ku la nyola likalagirwa linene kuvita. 2Kigira kwosi kwikigitala ku vindu vinyingi. Mundu u tikigitala ku livola a veye mudukiru, u nyalanga kwigalira nelijamu, mubiri gwosi. 3Kunangwa ni ku viha majamu getsiparasi mu minwa gyatsyo tsi duke kukuhulira, ku tsi girunkananga kandi mubiri gwatsyo gwosi. 4Henza bwato kandi, kali bu veye bunene ndi nokuhilwa nembuudza inene, navutswa bu girunkannyangwa nesukani inkekeke, kutsia hosi hobulaliri bwomuhili bwenya. 5Kandi ndiyo ululimi lu veye kivero kikekeke, nalwo lwiidzominya ku vindu vinene. Muhenze kuli tsinku tsi veye tsinyingi tsyaakidzangwa nomuliru mukekeke 6Kandi ululimi lu veye muliru: Iirova lyobudamano ku vivero vyetu li veye lulimi, nilwo lu vikanga kivihiri ku mubiri gwosi, nokwaakidza ligenda lyosi lyelilombwa, nalwo lwaakidzangwa negehena. 7Kigira tsing'ano tsyosi tsyenyama netsyamanyonyi, netsyetsinyama tsi molanga, netsyevindu vyomu inyanza, va tsi tuga kandi avandu va tsi tuga: 8navutswa lulimi si ha li nomundu kali mulala u nyala kulutuga; lu veye ubudamano bu ta lekera, lwizuye ubusungu obwiitanga. 9Ku gasidzanga Mwami nalwo naye ni Dada; kandi ku laamanga avandu nalwo ava lombwa ku lifwana lya Nyasaye: 10ligasidza nelilaama li twula ku munwa mulala. Avamitu, si bu li bulahi vindu yivi vi ve ndiyo. 11Kidaho kilala ki senula amadzi makindu namalulu? 12Avamitu, mukuyu gu nyala kwama mizeituni, kinga muzabibu gwama makuyu? Kandi amadzi gomunyu si ga nyala kusenula makindu.
13Ibwaha u veye mugeeri nowelimanya ku mwinye? A lang'aminye ku liva lilahi lilye mu miyinzi gyigye mu buhooma bwobugeeri. 14Navutswa ni mu va ni mu veye nembodoka indulu nelihangalidzana mu myoyo gyenyu, mu tiidzominya kandi mu ta vola ububehi ku geligali. 15Ubugeeri yibu si bu veye bu twulanga igulu, navutswa nobwa hasi, nobwomwoyo gwomundu, nobwa mademone. 16Kigira hembodoka i veye nelihangalidzana, ha zana kivihiri ki veye ho nemiyinzi gyosigyetsisoni. 17Navutswa ubugeeri bu twulanga igulu, mu litanga bu veye buniiu, nobwemirembe, nobwobuhokya, nobwobuhuliridzi, nobwezuye tsimbabasi na makuyu malahi, obu ta li nelyahulannya, obu ta li nobugadi. 18Likuyu lyobulungi li midzeywi mu mirembe ku yavo ava kolanga mirembe.
©Bible Society of Kenya, 1967