Yakobo 5
5
1Henzi, mwinye avatugi, mu lire, mu kupe tsikwili, kigira kivi kyenyu kidzanga ku mwinye. 2Ubutugi bwenyu bu mali kugunda, netsingubo tsyenyu tsisere tsi liye. 3Ithahabu yenyu nefetha yenyu tsi kupi tsisisiniya; netsisisiniya tsyavyo tsi la va kilolekidzu ku mwinye, kandi tsi la lia tsinyama tsyenyu kuli muliru. Mwevikiye akiba mu madiku gekiheri. 4Henzi, amadanyi gavayinziri avagesa milimi gyenyu, aga mwinye mwigalira ku linuula, ga kupa tsikwili: nelilira lya yavo avagesa lingiye mu matu go Mwami Wamahe. 5Mu menyi nobwelemeridzi mu lirova, nokumenya noluyai; mu komeridzi myoyo gyenyu mu lidiku lyokuyaywa. 6Mu kalagiye nokwiita wobulungi; si a hingira mwinye.
7Kunangwa mwikudzire, avamitu, kuduka lidza lyo Mwami. Henzi, mulimi a lindiriranga lyama lyelirova lilahi, kandi yikudziranga kulyo kuduka li luhe li nyole imbula yokutanga neyenyima. 8Na mwinye mwikudzire; mu luviridze myoyo gyenyu: kigira lidza lyo Mwami li veye himbi. 9Mu ta monyana avene navene, avamitu, mu duke kuvula kukalagirwa: henzi, mukalagi u singiye ku viliango. 10Avamitu mu vugule avaprofeti ava vola ku lieta lyo Mwami, va ve kyokulolera ku lisaliridza lyobudamano bwa va gwira nokwikudzira kubwo. 11Henza, ku lola yava kuva nobugasu avikudzira: mu huliye amakuva gobwikudziri bwa Ayubu, kandi mu loli litwekidza lyo Mwami, kuli Mwami wizuye tsimbabasi, nelivererera.
12Navutswa kuvita vyosi, avamitu, mu tisuha ku ligulu kinga lirova kinga lisuha lindi ku lyosi: navutswa yee wenyu a ve yee, kandi auwa wenyu a ve auwa, gase mu la gwa mu likalagirwa.
13Mulala ku mwinye a kupanga kivi? A saale. Mulala a veye nekilema mwoyo? Yimbe tsinyimbo. 14Mulala ku mwinye a lwala? A lange avakulundu velivugana, va mu saalire nokumuvaka maguta mu lieta lyo Mwami: 15lisaala lyelisuuvira li la honnya uyu u veye mulwaye, na Mwami a la mu vukidza; na a va ni ya kola ubwoni, a la samefwa. 16Mweyamirane ubwoni bwenyu avene navene, mu saalirane avene navene mu duke kuhonnywa. Lisaala lyomundu mulungi li konya ligali mu likola lyalyo. 17Elija ya li umundu weliva lilala nekwinye, kandi ya saala nelisaala imbula i ta kupa; nembula ya vula kukupa ku lirova inyinga ya duka mihiga gyivaka nemyeli gyitano na mulala. 18Ma kandi ya saala; neligulu lya leta imbula, kandi lirova lyama lyama lyalyo.
19Avamitu, mulala ku mwinye na a gota nokuleka ageligali, na wundi na a mu girunkannya; 20a manye uyu u girunkannya mwoni kutwula mu ligovera lyenzira yeye, a la honnya mwoyo gwomundu mu likudza, nokukunika ubwoni bunyingi.
©Bible Society of Kenya, 1967