Yakobo 2
2
1Avamitu, mu ta va nelisuuvira lyo Mwami wetu Yesu Kristo uyu niye Mwami wobukumi, nelyeridza ku vandu. 2Kigira ni yingira mu livugana lyenyu mundu wiviki imingiri yethahabu, netsingubo tsindahi, kandi ni yingira mudaka u veye nengubo imandagalu; 3na mwinye mu henzanga wiviki ingubo indahi, nokumuvolera, Ive wikala hano halahi; kandi mu volera mudaka Singira hala, kinga wikala ha virenge vyange; 4si mu kola litovolannya avene navene, nokugwa avakalagi veliganagana lidamano? 5Mu hulire, avamitu avayanze; Nyasaye si ya tovola ava veye avadaka vomulirova, va ve avatugi velisuuvira, kandi va ve ava lia miyandu gyobwami bwa ya laga ava mu yanzanga? 6Navutswa mwinye mwononnyi lidzominywa lyomundu mudaka. Avatugi si va mu minanga, nokumung'usa kuduka imbiri wentebe yelikalaga? 7Yava si va nyega lieta lilahi lya mu langangwa ku? 8Navutswa ni mu dukidza malago gobwami kuli mang'oda, U yanze mutende wowo kuli weyanza mwene, mu koli bulahi: 9navutswa ni mu va nelyeridza ku vandu, mu kola ubwoni, kandi malago ga mu lang'aminya kuva avahyoli. 10Kigira ku vosi wenya kugumira malago gosi, navutswa yikigitala ku likuva lilala, u gwiye u volwa muhyoli wa gosi. 11Kigira uyu wa vola, U ta heya, ya vola kandi, U tiita. Kalunu nu u vula kuheya, navutswa wiita, u gwiye muhyoli wamalago. 12Mu vole ndiyo, nokukola ndiyo kandi, kuli avandu va li kalagirwa ku malago gelibubohololwa. 13Kigira likalaga si li veye netsimbabasi ku uyu u ta li netsimbabasi: tsimbabasi tsiidzominyanga ku likalaga.
14Avamitu, ga konya ki, mundu na a vola a veye nelisuuvira, navutswa si a veye nelikola? Iisuuvira zana li nyala kumuhonnya? 15Amitu kinga mbotso na a va na a veye kyahonyo nokudaka vyokulia vya kase, 16kandi mulala ku mwinye a va volera, Tsii nemirembe, mu nyole luya nokwiguta; navutswa si mu va ha vindu vyomubiri vi dakiywi; ga konya ki? 17Kandi ndiyo, lisuuvira li ta veye nelikola, li kudzi lyene. 18Yee, mundu a la vola, Ive u veye nelisuuvira, na inze mbeye nelikola: mmannya lisuuvira lilyo bugira likola lilyo, na inze nda ku mannya lisuuvira lyange ku likola lyange. 19Ive u suuvira Nyasaye a veye mulala; u kola bulahi: amademone kandi ga suuvira, ni ga degera. 20Navutswa u la manya, Ive mundu u ta li kindu, lisuuvira bugira likola li veye ligumba? 21Abrahamu guga wetu, si ya volwa kuva nobulungi ku likola, inyinga ya haana Isaka mwana wewe ku bwali? 22Ive u lola lisuuvira lya ya kola halala nelikola lilye, noku likola zana lisuuvira lya kolwa lidukiru; 23kandi mang'oda ga kolwa madukiru aga vola, Abrahamu ya suuvira Nyasaye, kandi ga volwa kuye kuva ubuhlngi; kandi ya langwa mulina wa Nyasaye. 24Mu lolanga mundu a volangwa kuva nobulungi ku likola, si ku li ku lisuuvira lyeng'ine. 25Kandi ndiyo Rahabu wamalaya, si ya volwa kuva nobulungi ku likola, kigira yingiridza avatumwa, na a va twulidza va tsie ku inzira yindi? 26Kigira kuli mubiri bugira mwoyo gu kudzi kandi ndiyo lisuuvira bugira likola li kudzi.
©Bible Society of Kenya, 1967