Yakobo 1
1
1Yakobo, mutugwa wa Nyasaye nowo Mwami Yesu Kristo, ibaruura yange yiyi, i dukire tsihiri likumi na tsiviri tsye Lisalana, mirembe.
2Mu lole bu veye ubuyanzi bwere, avamitu, inyinga mu gwa mu ligeridzwa tsing'ano netsing'ano.
3Kigira mu manya ligeridzwa lyelisuuvira lyenyu li letanga ubwikudziri. 4Mu leke ubwikudziri bu ve nemiyinzi gyabwo midukiru, mwinye mu duke kuva avadukiru, navagyima, ava ta daka kindu ku vyosi.
5Navutswa mulala ku mwinye na a va na a daki ubugeeri, a saale Nyasaye, u hedzanga avandu vosi nobuhaani kandi si a vunzulanga: naye a la hebwa. 6Navutswa a saale mu Iisuuvira, a ta hayahayidza ku gosi: kigira u hayahayidzanga a veye kuli kiguvuli kyenyanza kye-rnbuudza i hunzulanga nokusikiswa. 7Kigira mundu uyu a ta ganagana a la nyola kindu ku vyosi ku Mwami; 8mundu wemyoyo gyiviri u degeranga ku tsinzira tsitsye tsyosi.
9Navutswa amitu u veye muyingu yiidzominye mu linenehidzwa lilye; 10na uyu mutugi mu ligehidzwa lilye: kigira kuli kimuli kyobulimu ni ndiyo litwulidzwa lilye li veye. 11Kigira liuva li twula halala nembuudza i sambanga, nokwuminya ubulimu; nekimuli kyabwo ki gwidzanga, nobugasu bwelifwana lyakyo bu gotanga: kandi ndiyo mutugi a la kamuluka mu tsing'endo tsitsye.
12A veye nobugasu wikudziranga mu ligeridzwa: kigira na a mali kubugirirwa a la nyola itaji yelivamwoya yo Mwami ya lagira yavo ava mu yanzanga. 13Ku vosi mundu inyinga a geridzangwa a ta vola, Nyasaye a ngeridzanga; kigira Nyasaye si a nyala kugeridzwa nobudamano kandi mwene si a geridzanga mundu ku vosi: 14navutswa mundu sa mulala a geridzangwa lwa a ng'usangwa nokutegwa nelikayirwa lilye mwene. 15Kandi likayirwa zana lwa li mala kuvereka livulanga ubwoni: nobwoni lwa bu mala kukula bu letanga likudza. 16Mu ta gadwa mba, avamitu avayanze. 17Vikululirwa vyosi vilahi kandi vihaanwa vyosi vilahi vi veye vidukiru vi twulanga migulu kwika hasi kutwula ku Dada wobulavu, weligirunkannya li ta veye kuye kali kiriri kyeligirunkana. 18Ku liyanza lilye mwene u kwivuye nelikuva lyeligali, ku duke kuva kuli ubuhya bwevilombe vivye.
19Avamitu avayanze, mu manya likuva yili. Navutswa mundu sa mulala a ve mwangu kuhulira, nomwihuliridzi ku livola, mwikudziri ku butima: 20kigira ubutima bwomundu si bu kolanga ubulungi bwa Nyasaye. 21Kigira yaga ku livika ha luvega kifwabwi kyosi, nobunyingi bwobudamano, mu vugule nobuhooma likuva li simikangwa li nyala kuhonnya myoyo gyenyu. 22Navutswa mu ve avakoli velikuva, mu ta va avahuliri vutswa navigadi avene. 23Kigira ku vosi mundu u veye muhuliri navutswa si a li mukoli, uyu a fwanana nomundu wehenzeranga mu kyelolero ligondo lya yivulwa nalyo: 24kigira yehenzanga mwene, ma na a tsia, nonoho yiviriranga kuli yeloli. 25Navutswa uyu u henzanga malago madukiru ageliboholola, nokumenya mu, uyu si a veye muhuliri wivirira navutswa mukoli wemiyinzi, mundu uyu a la va nobugasu ku likola lilye. 26Mundu ni yeganagana a veye wedini, naye na a ta boha lulimi lwilwe nelijamu, navutswa a gada mwoyo gwigwe, mundu uyu, idini yeye neya vutswa. 27Idini ya Nyasaye indahi i ta li nobudamano imbiri wa Nyasaye na Dada wetu ni yiyi, kutsia ku yavo avabisandu noku vakunzakali mu likupa kivi lyavo, nokwilinda ligali mwene a ve bugira imbala yevyelirova.
©Bible Society of Kenya, 1967