Isaya 47
47
1Yika hasi, wikale mulugukyi O mukana mugima wa Babuloni; yikale hasi bugira intebe yobwami, O mukana wa Kalidei: kigira ai u la gofwa kandi muyesereru nomwesiahi. 2Vugula lugina u sie ubusie, twulidza ingubo yemoni yoyo, tandula lukigiti lwengubo, vimbula kirenge kikyo, vita mu migera gyamadzi. 3Kyahonyo kyikyo ki la lang'aminywa, yee, tsisoni tsitsyo tsi la loleka: ndevanzira kisalya, si nda bugirira mundu kali mulala. 4Umu tungiri wetu, Yahova wa mahe ni lieta lilye, Mutakatifu wa Israeli. 5Yikala u kiring'ane, yingira mkisu ndi O mukana wa Vakalidei; kigira u la vula kulangwa kandi Mukali wobwami. 6Nda vihirirwa avandu vange, nda vika ubudamano ku miyandu gyange, nda va vika mmu kono gugwo; ive wa vula kuvavererera; na wa vika inira yoyo ku vasakulu nobuliduhu ligali. 7Na wa vola, Inze nda va mukali wobwami mibiga nemihiga; na wa luha na wa vula kuvika vindu yivi mmwoyo gugwo, na si widzulitsa kiheri kyevindu kuli ki li va.
8Kunangwa kalunu u hulire yaga, ive wevika mu vindu vi yanzanga, u menyanga bugira liganagana, u volanga mu mwoyo gugwo, Inze mbeye ho, si ha veye nowundi kuli inze; si ndikala kuli mukunzakali mba, kandi si nda manya likudzirwa lyavana: 9navutswa vindu yivi vyombi vi la duka ku ive idakika indala lidiku lilala, likudzirwa lya vana, nobukunzakali: vi la duka ku ive nekigero kidukiru, kali ubukumu bubwo ni bu veye bunyingi, nobunene bwobusegetiri bubwo. 10Kigira ive wa suuvira budamano bubwo; na u voye, Si ha veye nowandolanga; ubu geeri bubwo nelimanya lilyo, vya ku kyaminya; na wa vola mu mwoyo gugwo, Mbeye ho, na si ha veye nowundi kuli inze. 11Kigira yaga ubudamano bu ladza ku ive; na ive si u la manya livuka lyabwo: na likuva lyekivi li la ku gwira; si u la nyala kwehonnya kulyo: nobudivi bu la ku nyola nonoho, bwa u ta manya.
12Kalunu singira nobusegetiri bubwo, nobunyingi bwobukumu bubwo, bwa wa nyakana ku kutwula bwana buke; mbu'a u la nyala kukonywa, mbula u la guuta. 13U luhi mu bunyingi bwa makuva gogo: kalunu avang'oli, na va ng'olera ku tsing'e reng'ani, na vang'olera ku mweli nomweli, va singire, va honnye ive ku vindu vi duka ku ive. 14Henza, va la va kuli luvuva; muliru gu la va samba, avene si va lehonnya mu tsingulu tsyolumemo lwomuliru: si gu la va muliru gwamanda gwokwota, kinga muliru gwokwikala himbi. 15Ni ndiyo vindu yivi vya wa nya nkana ku vi la va ku ive: na ava gulana nive kutwula busoleli bubwo va la gotera sa mulala ku luvega lwi lwe, si ha la va nomundu kukuhonnya.
©Bible Society of Kenya, 1967