Isaya 48
48
1Mu hulire yaga, avenyumba ya Yakobo, ava langangwa ku lieta lya Israeli, nokutwula mu madzi ga Yuda; mwinye avesuha ku lieta lya Yahova, nokutala lieta lya Nyasaye wa Israeli navutswa si ga veye mu geligali, kinga mu bulungi 2(kigira velanga avene va veye avandu velidala litakatifu, nokwidira ku Nyasaye wa Israeli; welieta lilye li langwa Yahova wa mahe): 3Inze nzilwadzi vindu vyoku matsyambiri kutwula kale; yee, ga twula mmunwa gwange, na nda ga lang'aminya: nda ga kola nonoho, na ga lombeka. 4Kigira nda manya u veye mutingu, ne ligoti li veye lyekivya, nobweni bubwo bu veye mugasa; 5kigira yaga nda kwilwadzira inkuva yiyi kutwula kale, nda ku vuulira ni i kikiri kuduka: gase u la vola, Kifwananyi kyange kya lomba yaga, na kifwananyi kyange kya vadzwa, na kifwananyi kyange kyokwelonga, kya laga yaga. 6Ive u huliye likuva yili: henza vindu yivi vyosi; na mwinye, si mu la li lang'aminya? Inze nku vuuliye vindu vihya kutwula inyinga ya kalunu, kali vindu vya viswa, vya ive wa vula kumanya. 7Vi lombeywi kalunu, si vya lombwa kutwula kale; na ive imbiri welidiku lya lero si wa vi hulira mba; gase u la vola, Henza, nda vi manya. 8Yee, si wa hulira; yee, si wa manya; yee, ugutu gugwo si gwigulika kutwula kale: kigira inze nda manya u veye wokukola ubugadi bunene, na walangwa muhyoli kutwula mu livulwa lilyo. 9Nda lindageridza ubutima bwange kigira inze mwene, kandi ndegalira ku ive kigira lidzominywa lyange, mbule kukudividza. 10Henza, mmali kukusiyira mmuliru, navutswa si ga veye kuli ifetha isiyangwa; nku tovoye mu kisambiru kye kivi. 11Kigira inze mwene, yee, kigira inze mwene, nda kola yaga; kigira lieta lyange li lononywa kuli ndi? Nobukumi bwange si nda ha wundi.
12Hulira inze, O Yakobo, na Israeli mulangwa wange: inze niye; inze mbeye wokutanga, kandi mbeye wekiheri. 13Yee, mukono gwange gu temi umuse gwelirova, kandi mukono gwange mulungi gu vagaye mwigulu: lwa mbi langa, vi singira halala. 14Mu vugane halala, mwinye mwosi, mu hulire; ni bwaha hagati henyu wilwadza vindu yivi? Uyu wa Yahova a yanza uyu a la kola ubulaliri bwibwe ku Babuloni, na mukono gwigwe gu la va ku Vakalidei. 15Inze, yee, inze mwene, mmali kuvola; yee, mmali kumuanga; mmali kumuleta, naye a la gaiidza inzira yeye. 16Mwisunde himbi ku inze, mu hulire likuva yili; kutwula mu litanga si nda vola mu liviswa; kutwula inyinga ya li ho, inze nda li ho: na kalunu Yahova Nyasaye u ntumi, na Roho wewe.
17Yahova, Mutungiri wowo, Mutakatifu wa Israeli, a vola ndi: Inze mbeye Yahova Nyasaye wowo, u kwegidzanga kunyola vyambeti, ukwimiriranga mu inzira i ku dukiranga kugenda kuyo. 18Nkano wa ka hulira amalago gange hene yaho mirembe gyigyo nkano gya ka va kuli mugera, nobulungi bubwo kuli viguvuli vyenyanza: 19lwivulu lulwo nkano lwa ka va kuli muyeke, na vivulwa vyomunda mumwo nkano va ka va kuli tsinzalo tsyomuyeke: lieta lilye nkano si lya twulidzwa imbiri wange.
20Mu twule Babuloni, mwiruke mu twule ku Vakalidei; mwilwadze nomwoyo gwokwimba, mu landidze makuva yaga, mu ga vole kuduka kiheri kyelirova; mu vole, Yahova u tungiye mutumekiri wewe Yakobo 21Si va lola buluhu lwa ya vimirira mu kyangalangwi; ya va twulidzira amadzi mu lwanda; yatannya lwanda, na amadzi ga bivuka. 22Yahova a vola, Si ha veye nemirembe ku vadamano.
©Bible Society of Kenya, 1967