Isaya 22
22
1Ubuliduhu bwelivona lya malola. U veye na ki kalunu, kuduka wanegiye kutsia ligali ku visegese vyetsinyumba? 2O ive wizuye liha nzuka, lidala lyeliyoga, lidala lyelisangala: lyavandu vovo viitwa si viitwa nekivavi, kandi si va kudzira mu bulwani. 3Avamehanga vovo vosi viruka halala, avatumekiranga ubuta va va boha; avandu vovo vosi ava loleka va bofwa halala; viruka ni va tsia ihale. 4Kigira yaga nda vola, Girunkana mu ta henza inze nda lira ligali; u tinyangidza kuleminya inze mwoyo ku lyononnywa lyomukana wavandu vange.
5Kigira ni lidiku lyokukupa kivi, nokuduvagirwa hasi, nelyokugenya, lya Yahova a leti, Yahova wa mahe mu livona lyamalola; mu lisambulwa lyamadigi, nelyaniravigulu. 6Elam ya ginga imodia, halala na magari gobulwani gavandu va li nago, noku vaninanga tsiparasi; na Kiri ya vimbula ingavo. 7Na ga duka, ma vona gogo ama tovole gizula magari gobulwani, avanina ku tsiparasi navo velohidzira ha kiribwa. 8Naye ya twulidza kikuniko kya Yuda; nomu lidiku yilyo wa henza vyuma vyobulwani mu inyumba yomulitu. 9Na mwa lola ha sasuguka mu lidala lya Daudi, ha veye hanyingi ligali; na mwa vungidza amadzi gelidavalia lya hasi; 10na mwa validza tsinyumba tsya Yerusalemi, na mwa vunannya tsinyumba mu duke kudinnya lugaga; 11kandi mwa lombera amadzi gelidavalia lya kale, lidavalia hagati hetsingaga. Navutswa si mwa henza uyu wa kola yaga, kandi si mwa ganagana uyu wa vi lalira kale. 12Mu lidiku yilyo Yahova, Yahova wa mahe, ya langa li ve ho lilira, nelisyoma, nokuvegwa mitwe, nokwivika tsingubo tsyamagunia: 13na vutswa henza, ubuyanzi nobusangali, nokwiita tsing'ombe nokwiita magondi, nokulia inyama nokunwa iwaini: Gendi ku lie nokunwa, kigira mugamba ku kudzanga. 14Yahova wa mahe yelolekidza mu amatu gange, Ligali ubudamano yibu si bu la samefwa kutwula ku mwinye mu luhe mu kudze, Yahova a vola, Yahova wa mahe.
15Yahova a vola, Yahova wa mahe ndi, U tsie, ku uyu u lindanga ubutugi, livola li veye, ku Shebina, u veye igulu ku inyumba, mmu volere, 16U kola ki hano? Na u veye na bwaha hano, kuduka weyaviye kilindwa hano? Kumweyavira kilindwa igulu, nokwevadzira mwene ubume nyomulwanda 17Henza Yahova a la ku syuva netsingulu, kuli mundu wetsingulu; yee a la ku lingalinga ligali. 18Ligaii a la ku naza noku kusikisa kuli mupira kuduka mu kivala kinene; na u la kudzira yo namagari gobukumi bubwo ga la va yo, ive u veye tsisoni tsyenyumba yomunene wowo. 19Na nda ku twulidza mbugono bubwo; nokukwikidza u twule ha u singiranga. 20Ga la va mu lidiku yilyo, nda langa mutu mekiri wange Eliakim mwana wa Hilikia: 21nda mu vika ingubo yoyo yegulu, nokumuvika tsingulu nomusipi gugwo, na lyameha lilyo nda li vika mu makono gege, naye a la va dada ku yavo avamenyanga mu Yerusalemi, noku inyumba ya Yuda. 22Na lufunguo lwenyumba ya Daudi nda vika mwivega lilye; na a ligula, na si ha veye na u hana; na a la hana na si ha veye nowigula. 23Nda mu dinnya kuli musumari ha suuvira ngwa; na a la va intebe yobukumi mu inyumba ya dada wewe. 24Navo va la sunga kuye ubukumi bwosi bwenyumba ya dada wewe, lwivulo nekisukululwi, viju vikekeke sa kilala, kutwula ku viju vyevikombe kuduka ku viju vyevikopo vyosi. 25Mu lidiku yilyo musumari yigwo gwa dinyiridzirwa halahi gu la twula ho bugono bwagwo; Yahova wa mahe a vola, na gu la temagwa nokugwa hasi; na musigo gwa sungwa ku gu la twulidzwa; kigira Yahova ya vola.
©Bible Society of Kenya, 1967