Isaya 21
21
1Ubuliduhu bwekyagalangwi kye nyanza. Kuli vihudzudzi vya Kusini vi vitanga hagati, bu twula mu kyangalangwi, nomu kivala kyelitihidza. 2Mmali kumannywa malola agokusaliridza; uyu u tumekiranga ubugadi a gadanga, na uyu u gotidzanga a gotidzanga. Yanegira, O Elam; u kumbiridze madala, O Media; mmali kuheridza likenya lyago lyosi. 3Kigira yaga kikenge kyange kizuye ubusaliri bunene; lilumwa li ng'umiye, kuli lihlmwa lyomukali u veye nelilumwa lyelivula: numangwa ligali kuduka si nyala kuhulira; ng'enyanga kuduka si nyala kulola. 4Mwoyo gwange gu herananga, litihidza li mbiki mu butii: inyinga ya bwiranga ya nyenyanga i girunkanyeywi kuva lidegera ku inze. 5Va lomba imeza, va vika ubulindi, va lia, va nwa: mu singire mwinye avanene, mu vake ingavo. 6Kigira Yahova ya mbolera likuva yili, Tsia, u vike umu lindi a henze; na aga a lola a vole: 7na lwa a lola kiduma ava nina ku tsiparasi, ava gendanga si vaviri kulala, kiduma kyetsisukiri, kiduma kyetsingamia, a la hulira ligali nokulinda ligali. 8Naye ya fwuma kuli king'ang'a, na a vola, O Yahova, nsingiye kazozo ku kitaradzi inyinga yombasu, na mbikiyi mu lilinda lyange ubudiku bei; 9na, henza, kiduma kyavandu kyadza, avanina ku tsiparasi, avagendanga si vaviri kulala. Naye ya tivula na a vola, Babuloni li gwiye, li gwiye; nevifwananyi vya vadzwa vya vanyasaye valyo vya vunanywa kuduka hasi.
10O ive wa inze nda huula, na u veye ubuswage bwo lodze lwange yaga ga mbulira ga twula ku Yahova wa mahe, Nyasaye wa Israeli, nzilwadzeye ive.
11Ubuliduhu bwa Duma. Mundu mulala a langanga inze mu Seiru, na a vola, Mulindi, ni makuva ki agobudiku? Mulindi, ni makuva ki agobudiku? 12Na mulindi ya vola, Mugamba gudzanga, na kandi budiku: ni mwenya kuteva, mu teve: mu girunkane, mudze. 13Ubuliduhu ku Arabia. Mu la gona mu mulitu gwa Arabia, mwinye Vadedan, ava samula halala. 14Va leta amadzi ku uyu ya li nobuluhu; avamenyi mu kivala kya Tema va tsia kwagana yavo aviruka noku vahilira vyokulia. 15Kigira viruka vivavi, ku kivavi kya somolwa, nobuta bwa nyirwa, nobuliduhu bwo bulwani. 16Kigira Yahova ya mbolera ndi, Mu inyinga yomuhiga mulala, kuli livalidza lyemihiga gya uyu u tungangwa, ubukumi bwosi bwa Kedari bu la gota; 17na va li tigala mu livalidzwa lya yavo ava tumekira ubuta, avaluviriri vavana va Kedari, va la va vakekeke; kigira Yahova, Nyasaye wa Israeli, ya vola likuva yili.
©Bible Society of Kenya, 1967