Ezekieli 9
9
1Hene yaho ya hanzuka mu matu gange nomwoyo munene, na a vola, Yavo ava hebwa kulinda lidala u va sunde himbi, sa mulala a ve nekyuma kikye kyokudividza mmukono gwigwe. 2Na henza, avandu vatano na mulala vadza kutwula ku inzira yekiribwa kya igulu, ku luvega lwa kasikasim, sa mulala ya li nekyuma kikye kyokwiita mmukono gwigwe; na hagati havo ya li ho mulala wivika ingubo yekatani, na ya li nechupa yobwino bwomung'odi mu mbalu mwimwe. Na vingira, ni va singira himbi nobwali bwomugasa.
3Ubukumi bwa Nyasaye wa Israeli bwa nina igulu kutwula ku mukerubi, wa bwa li kuye, bwa duka ha mukingi gwekiliango kyenyumba: yanira ku mundu wevika ingubo yekatani, wa li nechupa yobwino bwomung'odi mu mbalu mwimwe. 4Yahova ya mu volera, Vita hagati helidala, hagati ha Yerusalemi, nokuvika kilolero mu bweni bwavandu va kenyanga nokulira kigira kivihiri kyosi ki kolangwa hagati halyo. 5Navandi ya va volera ni mbuliranga, Viti hagati helidala inyima wa uyu, na mu kuye: tsimoni tsyenyu tsi ta leka mba, kandi mu ta va netsimbabasi mba: 6mwiite yavo ligali, umusakulu nomusoleli, muyai nomukana, avana navakali; navutswa mu tesunda ku mundu kali mulala u veye nekilolero: na mu tange hatakatifu hange. Nonoho va tanga ku vasakulu ava li imbiri wenyumba. 7Na ya va volera, Mu vike budamano ku inyumba, na migidzi gyayo mwizulitse mugyo mibiri mikudzu gya aviitwa: mu tsie. Navo va tsia, nokukuya mu lidala. 8Na ga duka, inyinga yeyo lwa va va kuya, nda lekwa ha zana, nonoho nda gwa hasi mammama, ni ndira, nokuvola, O Mwami Nyasaye u la dividza litigala lyosi lya Israeli mu litsuka ubutima bubwo ku Yerusalemi?
9Hene yaho ya mbolera, Ubudamano bwenyumba ya Israeli no bwa Yuda bu veye bunene ligali, nekivala yiki kizuye amasahi, nelidala yili lizuye likyaminya likalaga: kigira va volanga, Yahova u leki kivala yiki, Yahova a lolanga mba. 10Na inze, imoni yange i la vula kuleka, kandi si nda va netsimbabasi mba, navutswa nda leta inzira yavo ku mutwe gwavo. 11Henza, musatsa wiviki ingubo yekatani, wa li nechupa yobwino mu mbalu mwimwe, ya leta makuva genkuva yiyi, na a vola, Mmali kukola kuli wa ndaga.
Currently Selected:
Ezekieli 9: MBE
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 1967
